SAM 34:6-21

⁶Aminu sangana wena apaapa Buyambam tapae tumuk wam iniwa ita natake meya wa kaking kaknga aknga kuupbam sandeyamukut.

⁷Angela Buyambam tapatane tapata aminu Buyambam tapae gepbiatang yuaing aminde inengan yuak. Yuke ita gatayamuwawan meya takngatuta dua pasiwan maining.

⁸Buyambam tapata ninde take siknga tasinggak. Ginda tasiwa siwan kake Buyambam tapae take siknga natapning. Siwan aminu tapatuta Buyambam tapae gepbiaatang koke kusopuke take yuwik.

⁹Ginu aminu Buyambam tapatane, ginu kuupbam ie akgwauke yutnong. Dasingge? Aminu Buyambam tapae akgwauke ie gepbiatang yuaing aminu sanga tapatue dua dapmakaing.

¹⁰Sike kaap zongu laion gwengwenu kaapnae yawamba maiwanu tomnata yuke atuyukaning. Siwan ngana waaminda Buyambam tapae tawakaingu, ita sanga take akngae dua dapmakaing.

¹¹Waatdakana, ginda nae siknga apuke maak gwaang pake wamu nata yawiu natapnong. Apa nata ginu danindamumba Anutue akgwauke itane gepbiatang asinggan koyutnong.

¹²Siwan gata kayuk yutnanga takngaka take siwikge nataayak? Siwan gata kayuu mamaya siknga yuya. Yuke gatu gata take yuke apbakngnaya?

¹³Sike gata unzing yutnangge natakengu, ayok. Gata wamu waiaknga dua yawim. Siwan gatuka kem wamu dua yawim.

¹⁴Gata waiaknga masa imuke noman takngakan tawamso. Sike aminu kunduat musipza gwendukan teke noman takngae akekekake tawamso.

¹⁵Buyambam tapata aminu noman yuaingu ita akayuke tumuk wamnae maak panggak.

¹⁶Sike wai aminde Buyambam tapata asiknga bitanggak. Apbitake ita atzipan kupa aminda waaminde apbotaning.

¹⁷Siwan aminu noman yuaingga Buyambam tapae tumuk wam iniwanu ita atnataak. Natake ita gatayaman waaminu meyata dua yapbikgak.

¹⁸Anututa aminu musiaatang meya nataaing aminde inengan yuak. Ngan, ita banip sikaing aminu meya papanu, ita akgatayamunggak.

¹⁹Meya kwaapzangga amin nomande apba apning, ngana Buyambam tapata gatayaman meya waakwakga pasiwan dua pimaning.

²⁰Siakan. Ita dua pimamban Buyambam tapata take siknga kayuak. Kayuwawan waapatane kwatai tapatu dua puwik.

²¹Sanga wai kunduta wai aminu atzipa kumning. Siwan ngana Buyambam tapata amin nomande iwana dakngakaing aminu apasiwan maining.