SAM 33:3-18

³Taike kau kayuk takngatu ie tainong. Taike gita tanguke kau noman nomana siknga taiyuuk ie apbakngake kumzang siknga tainong.

⁴Buyambam tapatane wamu kuupbam siakan siknga. Ita puya takngatu takngatu tasinggak kaknga kuupbamu kepi nomana takngakan tawake tasinggak.

⁵Buyambam tapata aminu sanga nomana aknga tasikaing kakngae apbaknganggak. Ngan, aminu wam usanziwan noman singgak kakngae apbaknganggak. Sike asingganu Buyambam tapata aminde take natake akgatayamunggak kakngata kepna kepna tawanban sandekgak.

⁶Siwan Anututa wamban yawan, gunzit gwen gatu yekap gwen gatu yekapdaak ngangu ena kakaa komune aake yuking. Siwan gatu ita wamban yawan sanga kuupbam ena kakaa komune aaking.

⁷Ita yanggabam gwenu iniwan paku ina saak yukut. Unzing aminda yangga sospenu gwendunekan zikaing binga. Sike ita tasiwan yanggabam gwenu kutakngi kaya amunandang siknga siwan ina saak une yuak.

⁸Sike aminu kepdakane nana kuupbamda Buyambam tapae akgwautnong. Ngan, aminu kuupbam kepna kepna nana aminda akgwauke ie gepbiatang koyutnong.

⁹Dasingge, ita wamban yawan keu andaka yukut. Siwan ita wamu yawan sanga kuupbamu aake yuking.

¹⁰Buyambam tapata natdetdeu kepna kepna nana amindane pasiwan sopukaing. Sike aminda sanga takngatu tasinangge yandekaingu ita kepi asumuyaman waaminda tasiwa mainggak.

¹¹Siwan ngana Buyambam tapata sanga takngatu tasinangge yawan buyana asaake kekeknga asinggan yuak. Ita natetdeu sanga takngatu takngatu tasinangge natdekgau natdetdeu waaknga kekeknga asinggan asinggan yuak.

¹²Siwan Anututa dongu inae yawan yuaing aminda apbaknganong. Dasingge, dongu waakwau Buyambam tapata inae yawan yuaingge, waaminda apbaknganong.

¹³Anutu yekaune yuke enaneta amunane kaak. Ita aminu kuupbam kaak.

¹⁴Ita King kapa yotnane yuke enaneta keune nana aminu kuupbamde kaak.

¹⁵Sike ita ina siknga aminu kuupbamdane natdetdetna papan kakaakgak. Siwan sanga kuupbamu waaminda tasikaingu kuut siknga akaak.

¹⁶Kingu tapatuta amau tasike iwana yawamban kukaingu kekeknga amak aminu buyambamde kekekngane dua yapbikgak. Amak aminda iwana inane kekekngane dua yapbikgak.

¹⁷Siwan ikwawa gamanu hos ngang yanikaing gwegwenda amak amin gatayaman amake yapbitnanga dua. Amak aminu amak tasike tuyukawanu hosdane kekeknganata gatayamunanga dua.

¹⁸Siwan ngana natapnong. Buyambam tapata aminu ie gepbiatang yuaingu kakuya apasinggak. Ngan, aminu Buyambam tapata musip kwikwiu asinggan asinggan natayamikge banip sikaing aminu ita asinggan kakuya apasinggak.