SAM 31:7-24

⁷Sike gata nae butaya asinggan natangamunggayak. Unzingge nata gae apbaknganggat. Dasingge, gata meya natapbum taknga akakuyak. Ngan, gata natane musipmaatang meya takngatu takngatu natapbumu atnatapbuyak.

⁸Gata iwana dua kapewi waaminda na kaautde dua taking. Gata na gatangami na keu kakaa komune take yuat.

⁹Buyambam tapa, na meya buyambamu kaya. Unzingge nata kwanamu kumzang sikgawa kainata atzukngaing. Siwan kwatana tuyuknga singgakge gata nae musip kwikwik natangamuyo.

¹⁰Siwan musipmane meya nataat takngata na kayuk yutnanga aknga atzipmandaknganggak. Na kwanamu asinggan sike na tapduu mamaya yutnanga dua singgak. Na meya buyambam siknga. Unzingge natane kekekngana wena singgak. Siwan natane kwatana kuupbam atuyukakaing.

¹¹Sike iwanata na atnanisapdukaing. Siwan notna take yuamangga nae masa namukaing. Sike nata kepiapane kuwawa na nandupnangge bitake kusopukaing.

¹²Sike aminu kuupbamda nae gwa botaking. Unzing na aminu akupa kwaike botakaing binga yukum. Na unzing gapma gwegwenda atapan mukaing binga sikum.

¹³Dasingge, nata nataawa iwana kwaapzangga nae sapdut wam nanikaing. Siwan gatu kaut kaut yuke na tasiwa gwaumbitde kumzang tasikaing. Sike gatu unekan yuke wamu yawan kekekawan na tasiwa maiwitde yakaing. Waaminda atnuwa kupitde yakaing.

¹⁴Siwan ngana undanga. Buyambam tapa, nata gae banip singgat. Sike, “Ga natane Anutuna,” ngang yanggat.

¹⁵Sike asingganu nata gae kataune yuat. Gata na iwanae kataune gatu aminu na nawakaingge kataune sandeke tapso. Waaminda na tasiwa maiyat.

¹⁶Na gatane puya aminda. Unzingge gata nanduyuke musip kwikwik natangamuyo. Gata nae musip kwikwik asinggan asinggan natangamuke na iwanatane kataune sandeke tapso.

¹⁷Buyambam tapa, nata gae yangawawa gata gatangamuyo. Gatangamuke iwana ma kapewi waaminda na napbimbam. Sike gata kapewi wai aminda apmaakaning. Maakake waaminda gena kusiwan yusika matmat gwene pukuning.

¹⁸Sike waaminu yamandet sike sapdut wam yakaing. Siwan wamu waiaknga amin nomande yanikaing. Waaminu kem wamban yakaing. Unzing tasikaingge natake gata waaminu pasiwi maiwa waamindane gena tupakande pasiwi kusinong.

¹⁹Sike gata puya take siknga aknga tasike gae gepbiatang yuaing aminu akgatayamunggayak. Ngan, puya aaknga aminde kaine aminu gae gepbiatang yuaingge tasiyamuya.

²⁰Gata waaminu gika yuayak komune inengan pakusopunggayak. Pakusopuwawi aminda wam yawan kekekawan zipnangge tasiwa maiwik. Gata aminu gae gepbiatang yuaing aminu katak siknga pakusopunggayak. Siwan iwanata wamu waiaknga yaningga waaminu dua pasiwan maining.

²¹Tupanu iwanata na nutnangge nawake natane yotgapma yupbasiking. Yupbasiwawa ngana ita nae musip gwaang siknga natangamuke inane kekekngata gatangaman nata take yuat. Unzingge Buyambam tapatane umana yatangenatnong.

²²Buyambam tapa, tupa na iwana waakwau asiknga kagwauke anzing yakum, “Na apba nanikwasiwa na gae wesimu dua ba yuat,” ngang yakum. Siwan ngana gata natane wam natake gata na akgatangamukuyak.

²³Siwan aminu Anututane aminabam, ginda ie take siknga natapnong. Dasingge, ita aminu ie wam natake tawakaingu akgatayamunggak. Sike ngana aminu yamandet sikaingge yake toknga kapzang ayamunggak.

²⁴Ginu aminu kuupbamu Buyambam tapae banip sikaingu ginda kekeknga yutnong. Yuke musipzane asinggan natapa kekekayok.