Sam 27:1-11

¹Nabz ne Devet kx yrbzle mz kxrmailz ngr dzbe kxnzngrng. Yawe, nim Mevalu rnge kx arlapx-zvzle ninge. X trpnzngr kx namwxlrtix. Trnarnrcti-lzbq-ngrneu murde nim lrpalvc nyznge.

²Mzli kc kxdrka'-ngrng natz-ngrdr ninge mz nznibq-krdr ninge, Enqmi lcng sa nataong.

³Kxmule-esz' ami kxetu navzm mz nzoti-krmlr ninge, a' trpnzngr nzmwxlr-krnge. X kxmule-esz' otakr badr, a' drtwrnge sc tqabrtr-zvzbo bam.

⁴Yawe, da kx rlxtitxpwo bam nide sele: Sutitx zlwz drtwrnge nzmnc-zvz-krnge mz ma nyzm. Murde naxngi-zvzbo nzulr nzmyalz-krm mz nzaoti-zvzkr drtwrnge me pnz drtwrm.

⁵Murde krlzx kx sa na-aclve-angidrq ninge mz mzli r nzkxpu-krnge. X na-amnc-kapqq ninge mz Mangr-nzangiongr nim, mz nzngini-krm butqbr kx rlakitrx.

⁶Sa nabatrpe' nzaovxio-krnge enqmi lcng tztu-ngalelvzlr ninge. X sa namalq-zlwzx nzka-krbo bam blz mz Mangr-nzangiongr nim. X nangr-ngrbo bam nabz ngr nzawingr.

⁷Yawe, xlrm nzkrka'-krnge mz nzkqle-krnge nim. X nayc mz drtwrm ninge mz nzayzlu-krme natqnge.

⁸Mzli kc tqrpi-ngrme kx, “Vzm mz nzangio-krm ninge.” X ayzlubo natqm kx, “Eu, ninge la navzbo.”

⁹Delc, bzkq mnc-rlrume bange. Ninge kxnzawz nem. X bzkq esablqtiq ninge mz nzngyatikr drtwrm ninge. Murde okatr-zvzq ninge mzli kc. Mevalu rnge, bzkq pxtxpx-ngrn ninge mz nzaxtx-krm ninge.

¹⁰Kxmule-esz' trtenge x lxenge nzaxtxtxdr ninge, A' nim la tqaclve-angidrq ninge.

¹¹Alvztrp nqmq krmqng bange. X mailz ninge mz nzo-zli-zvz-krnge nzti kx tubq murde enqmi rngeng sa tzaukztilr ninge.