GWAY GI IDAWUU’D 27:1-11

¹Tap̱a a’di ta moŋkush pem mo dhali bway gi mowoṯẖ pem mo, kaja a’di imiga/ ḵo/ mo? Tap̱a a’di ta’da cur jin ṯelu gwo sho’k mo gom mondiki/em pem mo, dhali kaja a’di imiga/ ḵo/ is mo?

²Ki imanmii tonthus tiḵki aha/ e mo tani uni thu’thkina thu’th ’pen kagahara ap̱o/ aha/ mo, uni gun ta ’kup̱ ki aha/ mo dhali kun ’kwarkina ’kwar ka gwap̱i/ mo tani uni mini ḵal ’bar mo dhali ṯa’k mo be.

³Ba aris uni kun ’kamkina ’kam ap̱o/ aha/ mo tani adum pem yisa ḵo/ is yisa. Ba ki mo ma mee cuu’da p̱o/ aha/ mo tani hili aha/ mina wu is ka ’cesh mo.

⁴Ton ṯal ’de/ doṯkika/ ’peni Tap̱a mo, a’di jin miga/ simm e mo mmobaṯẖi ’ko’d mo, ki aha/ mina c̱a’b e gu’b gi Tap̱a mo ka risa cim pemi ’baar mo ki mondiki/em pem mo, mmohil monyjaro/ gi Tap̱a mo, dhali mmohil isi gwo i e mo gom gu’b gi mondheleladhelel piti mo be.

⁵Haali/ a’di midi bag aha/ eya darha’dam piti mo ka tee jin ṯocu aha/ bwa mo. A’di midi bag aha/ e bwaŋ’kwariny gi gu’b burrinyem piti mo. Dhali a’di midi kar aha/ i’kuwosh jin turatur mo.

⁶Dhali shwane/ ’kup̱ pem minu ’de’k ki mis mo ap̱owa ris uni gun ta ’kup̱ ki aha/ mo kun ’kamki aha/ is mo be. Dhali aha/ mina c̱i to jin ’ciṯẖu/ ’kus mmomiiya bas e gu’b burrinyem piti mo ki cuuwa/ gi moŋ’kuny bwa mo. Dhali aha/ mina yuḵ gway mo dhali mii ko gom Tap̱a mo.

⁷Ciḵi ko mo ma, ayy Tap̱a, ki aha/ ’thera cuuwa/ kagahara mo. Miiyi mii ka ’the gom aha/ mo dhali thoḵi aha/ ’twa/ mo.

⁸/E oki gwo mo ki: Simmi um bwam/em pem e mo. Adum pem o gwo gom /e mo ki: Bwam/em pini Tap̱a, a’di isimmkika/ e mo be.

⁹Dhalku/ ki bag bwam/em pini ’peni aha/ mo. Dhalku/ ki ṯu’k c̱iŋkinam pini jin mii /e to ka nyor mo, /e jin tana manwoṯẖ pem ’thissa/ mo. Dhalku/ ki biṯ aha/ asho mo, dhali dhalku/ ki dhal aha/ ’pen mo, ayy Arumgimis gi mowoṯẖ pem mo.

¹⁰Haala babam pem dhali ata’dam pem uni dhalki aha/ ’pen mo, hili Tap̱a a’di imidi hil aha/ i e mo.

¹¹Ṯori aha/ bway pini mo ma, ayy Tap̱a, dhali susi aha/ e bway tur jin ba’da/ ba’d mo haali/ goma ris uni kun ta ’kup̱ ki aha/ mo.