SAM 19:1-9

¹Ena kakaa komune nana sangabamu kaamangga Anutu tupan sikngaapa ngang yeutnimukaing. Sanga kuupbamu ena kakaa komune yuaingga puya noman taknga ita tasikut ngang yeutnimukaing.

²Siwan tapduk bamu sanga waakwakga ie atninikapmakaing. Siwan gatu zikaane kuut natdetdeu kekeknga yeutnimukaing.

³Sike aminu kepna kepna nana aminda wamu inata inata yakaing ngana sanga waakngatane wamu aminu kuupbamda atnataaing.

⁴Siwan sanga waakngaatdane wamu yotna yotna kuupbam tawamban sandekgak. Ngan, wamna waakngata kepna kepna kuupbam tawamban sandekgak. Sike ena kakaa komune Anututa sel you gwendu gunzitde mitapbut.

⁵Gunzitda kepmanu aminda maatna tanangge apbakngake yotna teke epu kunggak binga epu kunggak. Epuke inane kepinane kunggak. Unzing aminu asisapnangge tandakngake apbaknganggak binga.

⁶Gunzitda ena kakaa komu kwaimune kuke uneta kautdu saak kunggak. Siwan sanga tapatuta itane tokngana akngae kusopunanga dua.

⁷Mama wamu Buyambam tapatane taknga noman siknga. Siwan Buyambam tapatane wamda ninde banip tangenakgak. Siwan ninu mama wamu Buyambam tapatane takngae banip siknga sikamang. Sike ita natdetdeu nomanu aminu natdetdetna matekngae ayamunggak.

⁸Buyambam tapatane mama wamu nomana siknga. Siwan wamu waakngata nindane musipmin pangenawan apbakngakamang. Siwan Buyambam tapatane mama wamu kakaa aknga binga. Ita gataniman katak kaamang.

⁹Siwan aminu tapatuta ie munu puke ininggau ita kepi noman takngakan tasinggak. Tasiwawan kepi nomanu waaknga asinggan asinggan yuwik. Ngan. Ita mama wamu kuupbam tasinimde nininggau wamu waaknga siakan siwan noman siknga.