Sam 18:31-41

³¹Yawe nide txpwz Gct angidr, X butqbr nyzgu.

³²Nide Gct kc tqaxplr-zvzle ninge, X tzbzle lrpzki rnge kxtubq kx nao-zlix.

³³Axplr-zvzbzle nanycnge Mz nzvzne-krnge mz nartrkla ngr newz.

³⁴Alvztrple bange nzrpnangr, Murde nakrlzx nzrvecngr nalr popz'.

³⁵Yawe, apume bange temz ngr lomrnge kc tqyrputrngr nipna. X zmatq ngrm ngi popz' ngr nibrnge. Vzome murde namyalzx.

³⁶Okatr-zvzq ninge, x rblx enqmi rngeng nzlolvz-krdr ninge. X trnzta-pulro-ngrdru ninge mz drtc'.

³⁷Maneux enqmi rngeng, Vz vz x lolvz-zpwxxng mz nzodati-krnge nidr.

³⁸Tzx nidr, vz vz x nztaong amrlx mz drtc'. X trpnzngr kx tulzm.

³⁹Axplrq ninge mz nzotangr. Delc tqaovxio-ngrne enqmi rngeng.

⁴⁰Nim kx rngi-batrp nzdwaszkr enqmi rngeng ninge, Murde naodatix krkcng tzpxtxpx-ngrdr ninge.

⁴¹Nzbztidr nzyrningr kx naokatrng. Nzkqlelr Yawe. A' trpnzngr kx arlapxle nidr.