SAM 119:32-143

³²Nata zaatgaman gikane wamba tawambit. Dasingge, gata meya musipmaatang yukingu gwa sandekuyak.

³³Buyambam tapa, gata na mama wamba katak siknga tawambitde nanindamumso. Nanindamumbi nata asinggan tasitakuusika kupit.

³⁴Gata nae natdetdeu noman siknga naminu nata apme tawambit. Nata musipma tewa gatane mama wambae kuwan kuutgan tawambit.

³⁵Gata kepina tanomanuwi nata kepi mama wambata yanggak saak sukuwit. Dasingge, na mama wamu waakngae natapa take siknga singgak.

³⁶Gata musipma tangenawi nata wamba waaknga tawananggengu take natapit. Natake sanga kwaapzangbam papitde dua natapa kuwik.

³⁷Gata gatangami sanga yapiina wena, moo akngae masa yamit. Gika ayawi kekekakut taknga saak na katak toimso.

³⁸Na gikane puya amin tapaka gae akgwaukgatde wamu gika naniwi kekekakut taknga saak tasiyo.

³⁹Sike aminu kunduta nandupa aminu waiapa siwik kakngae apbitanggat. Siwan sanga waaknga sandekngami take siwik. Dasingge, gatane mama wambae natapa take siknga singgak.

⁴⁰Na gatane mama wamba kuutgan tawambitde take siknga nataat. Gatane yuyukga noman gan siknga. Unzingge kayuk yutnanga aknga gata namuyo.

⁴¹Buyambam tapa, gata nae take siknga natangamunggayak kaknga yeikngamuyo. Yeikngamuke na gatuka tapso. Unzing tasinangge gwa yawi kekekakut.

⁴²Na gata unzing gatangami aminu atnanisapdutningu yake yaniwit. Dasingge, na gatane wam takngae banip singgat.

⁴³Gata gikane siakan wam takngaka genane ma sandewim. Dasingge, na gatane wamu noman takngae baniu asinggat.

⁴⁴Sike nata gatane mama wamba asinggan tawambit. Ngan, asinggan asinggan tawambit.

⁴⁵Na gatane wam taknga natdetnangge tawanggat. Unzingge waiakngata dua umukngaman na meya dua kake takekan sukuwit.

⁴⁶Siwan nata king takwau gatane wam takngae yanikapit. Na unzing tasiwa aminu kunduta na maakawitde tasiwa maiwik.

⁴⁷Dasingge, na gatane mama wamde natapa take siknga singgak. Siwan mama wamu waaknga tawanangge musip gwaang nataat.

⁴⁸Sike na gatane mama wam takngaka yatangenakgat. Gatane mama wambae natapa take siknga singgak. Siwan nata asingganu gatane mama wamu waakngae natanggamatanggat.

⁴⁹Gata gatuka wamu tupa nae yawi kekekakut takngae natapso. Na puya aminda. Wamu waakngata musipma tangenawan nata wamu yawi kekekakut takngae banip singgat.

⁵⁰Sike tapduu meya kaya sikut kopatangu na musip kwikwik takum. Dasingge, ayawi kekekakut takngata kayuk yutnanga aknga inata kundu namukut.

⁵¹Sike yamandet aminda sapdut wamu wai siknga tendeknga wena nanikaing. Siwan ngana na gatane mama wamde masa dua imunggat.

⁵²Buyambam tapa, na mama wamu tupa siknga namukuyak takngae natayuat. Sike wamu waakngae natake musipmaatang kwikwiknga nataat.

⁵³Sike nata kaawanu yamandet aminda gatane mama wamba gwa peking. Pewa kake nata musipma toknga siknga nataat.

⁵⁴Sike keu andakane yukuuk gatane mama wamde natake kap taiwit.

⁵⁵Buyambam tapa, na zikaane gatane umandae atnatayuat. Natayuke gatane mama wamba tawanggat.

⁵⁶Gatane mama wamu nata kuutgan tawanggat. Ngan, gatane wamu waaknga asinggan asinggan apbakngake gwaamukgat.

⁵⁷Buyambam tapa, ga naat yuke gae natapa take siknga singgak. Nata gae anzing yawa kekekakut, “Nata itane mama wamu kuutgan tawambit,” ngang yakum.

⁵⁸Gata musip kwikwiu nae namiyakge kekeknga siknga ganikwaikgat. Dasingge, gika unzing tasinangge gwa yawi kekekakut.

⁵⁹Na kepi sukunggatde atnatapasinggat. Unzingge apmanu gae mama wam tawambitde gwa yawa kekekanggak.

⁶⁰Sike na moo dua yuwit. Gatane mama wamu zet tawambit.

⁶¹Na wai aminda napda wamake inane waiakngaatang nanitake kunangge tasikaing. Siwan ngana na gatane mama wamde dua botawit.

⁶²Sike petakumat dakaatangu na asenake gatane mama wamu noman takngae natake ganimbaknganggat.

⁶³Na gae akgwauke mama wamba tawakaing aminkat naat notna notna yuamang.

⁶⁴Buyambam tapa, ga keu andakane yuaing aminu kuupbamde take siknga nataayak. Gikane mama wamu kuupbam siknga nanindamumso.

⁶⁵Buyambam tapa, gata nae takeaknga tasinggayak. Na puya amin tapakaen. Gika wamu ayawi kekekakut taknga saak tasingamunggayak.

⁶⁶Na gatane mama wamu kuupbamde banip siknga singgat. Unzingge gata nanindamumbi natdetdeu take aknga pake sanga kuupbam katak usanziwit.

⁶⁷Tupa gata nae kepi yeikngamukuyau atekum. Teke kuwa nanduke gata meya takngatu takngatu atnamukuyak. Nami kake apmau nata gatane wamu atawanggat.

⁶⁸Sike ga take siknga. Ge sanga gata tasinggayak kakngae natapa take singgak. Siwan gata mama wamba katak siknga nanindamumso.

⁶⁹Sike yamandet aminda kem wamu kwaapzang nanisapduking. Siwan ngana na natdetdeu takngatu wena. Na gatane mama wamba asiknga tawambit.

⁷⁰Aminu waakwau natdetdeu butaya aknga takngatusimu wena. Sike ngana na gatane mama wamde siknga nataat.

⁷¹Gata meya aknga namukuyakge natapa take singgak. Dasingge? Meya waakngata gatangaman mama wambae take siknga natdekum.

⁷²Na moningu buyambam siknga panangge take dua nataat. Siwan ngana gatane mama wambae take siknga nataat.

⁷³Sike na gika siknga katakgata tumukuyak. Siwan gata natdetdet nami gikane mama wambae kuutgan natdewit.

⁷⁴Siwan nata natapa aminu gae akgwaukaingu na nanduke waakwau apbaknganingge nataat. Dasingge, na gika wamu yawi kekekakut takngae banip singgat.

⁷⁵Buyambam tapa, na atnataat. Gatane mama wamba noman gan siknga. Sike gata meya nae namukuyau gata asinggan gatangamunangge natake tasikuyak.

⁷⁶Sike nata nataau gata nae musip kwikwik natangamunggayak kakngata musipma tapan kekekanggakge nataat. Dasingge? Wamu gata na puya amin tapakae wa yakuyau atasinggayak.

⁷⁷Gata apmanu nae butaya natangamuyo. Natangami kayuk yutnanga akngana atapit. Dasingge, na gatane mama wamde natapa take siknga singgak.

⁷⁸Sike yamandet aminu kunduta yumdekan nae yawa maiwitde tasingamuking. Unzingge nata nataau aminu waakwau apmaakaningge nataat. Siwan ngana na, na gatane mama wamde asinggan natayuwit.

⁷⁹Aminu gae akgwaukaingkat gatu gatane mama wambae nataaing aminkat nae apa notna notna daknganimde nataat.

⁸⁰Gata gatangami gikane mama wamu siakande siknga tawambitde nataat. Tawamba nanduke aminu kunduta na maakawitde tasiwa maiwikge nataat.

⁸¹Sike na gata tapiakge ganduyuwawa kekekngana tuyuknga gwasik. Ngana na wamu gata yawi kekekakut taknga tawambiyakge banip siknga singgat.

⁸²Na wamu gika yawi kekekakut takngae natake ganduyuwawa kaina toknga nasikaing. Siwan anzing yanggat, “Zaapduknga natane musipma tasiwan wikawik,” ngang yanggat.

⁸³Sike na memetane gupna yangga zikaingu kupan takngata tasiwan bumi siwan mumba kuwa maikaing binga mainggat. Siwan ngana gatane mama wamde dua botanggat.

⁸⁴Tapduu datdasing ganduyuwawit? Siwan zaapduknga gata na puya amindae wai tasikaing aminde meya yake yamuya?

⁸⁵Sike yamandet aminu gatane mama wamba dua tawakaing. Dua tawake ita gapma kundu nata une pimapitde kusopuknga kwaikaing.

⁸⁶Gatane mama wamba kuupbam wa sanga ninda ie banip sinanga taknganin. Siwan ngana aminu kunduta nae kem wam moo siknga yake tasiwan mainggat. Unzingge gata gatangamuyo.

⁸⁷Sike na nutapan kupitde gwa dapakakut. Siwan ngana gatane mama wamba dua tekum.

⁸⁸Gata nae take siknga asinggan natangamunggayak. Siwan gata na katak nanduyuwi na zaat dua kupit. Dua kungwake nata gatane mama wamu kuutgan tawambit.

⁸⁹Buyambam tapa, gatane wamu asinggan asinggan yuwik. Wamu waaknga yekaune kekeknga yuak.

⁹⁰Gata wamu yawi kekekakut taknga asinggan asinggan tawanggayak. Gata kepdaka tangine tekuyak. Siwan waomune unzing yuke dua isakunggak.

⁹¹Mama wamu gata tupa yakuyau apman kaya unzing yuak. Ngan, sanga kuupbamda gikae banip tawakaing.

⁹²Sike nata mama wamu gatane akngae take dua ba natapbum gamu, nata meya takngatu takngatu kakum gwekatangu gwa kupam.

⁹³Nata gatane mama wamba dua pewit. Dasingge, na unin tawamba gata tasiwi na kayuk yuat.

⁹⁴Sike na gikanekan. Unzingge gata na tapso. Gatane wamu asinggan tawanangge tasinggat.

⁹⁵Wai aminu na nutapan kupitde undang kusopuke yuaing. Siwan ngana na gatane mama wambae natapa kuwan nata ie nangaakan dua nataat.

⁹⁶Na apmanu gwa nataat. Sanga take tapatu wena. Siwan ngana gatane mama wamba take siknga. Take akngana kwaapzang siknga. Sangabamu ita gwa yapbikut.

⁹⁷Na gatane mama wamde take siknga nataat. Na ie kwakngaom gatu zikaane ngang ie natanggamatanggat.

⁹⁸Gatane mama wam takngakata tasiwan na natdetdetna bamban sikngaapa dakngake iwanatane natdetdetna ayapbike yuat. Dasingge, wamu waakngaat naat gatake yuamak.

⁹⁹Nata gatane mama wam taknga atawanggat. Siwan wamu wa tawanggat takngata tasiwan na natdetdetna bamban sikngaapa dakngake aminu nanindamukaing amindane natdetdetna ayapbike yuat.

¹⁰⁰Natane natdetdeu kwekngatane natdetdetna gwa yapbikut. Dasingge, na gatane mama wamu noman takngakan tawanggat.

¹⁰¹Sike na kepi waiaknga tawanangge natapit gamu nata asisakuwam. Dasingge, na gatane wam takngakan tawambitde nataat.

¹⁰²Gikane wam taknga gika siknga nanindamukuyak. Unzingge wamu waaknga dua tekum.

¹⁰³Sike iningou genane napanu kaa singgak. Siwan ngana gatane wamu kaa siknga.

¹⁰⁴Gatane mama wambata natdetdeu take namunggak. Unzingge waiaknga kuupbamde asiknga bitanggat.

¹⁰⁵Sike gatane wam taknga lam gwenda binga gatangaman kepi noman sukuwit. Ita kakaa kepiapa yeikngaman kuwit.

¹⁰⁶Sike na gatane wamu noman taknga kuupbam tawambitde gwa yawa kekekakut. Unzingu apme tasiwit.

¹⁰⁷Buyambam tapa, natapso. Na meya buyambam takngata usukwatapbut. Unzingge gika gwa yawi kekekakut taknga tasiwi na kayuk yuwit.

¹⁰⁸Buyambam tapa, nata gae ganimbaknganggat takngae natapi take siyok. Siwan gata mama wamba nanindamumso.

¹⁰⁹Sike na asinggan kumnangge tandakngawa dapaknga singgak. Siwan ngana mama wambae dua botanggat.

¹¹⁰Aminu wai akwau na tanggaganutnangge yapapna kaiwan dandakawan yuaing. Siwan ngana na gatane wam taknga dua tewit.

¹¹¹Na gatane wam taknga dumza siknga asinggan asinggan tanggaganukgat. Sike wamu waakngata tasiwan musip gwaang natake asiknga baknganggat.

¹¹²Na gatane mama wamu kuupbam tawanangge gwa natapa kekekanggak. Mama wamba tawake yusika kupit.

¹¹³Sike na musia gweaya nataing aminde take dua nataat. Ngana mama wambae take siknga nataat.

¹¹⁴Ga natane kakuya tasinggayak kapana ga unin. Siwan natane damanu kekeknga gwena ga unin. Siwan na gika yawi kekekakut takngae banip singgat.

¹¹⁵Ginu waiaknga tasiya amin, na napmanong. Na Anutunatane mama wamna tawanangge nataat.

¹¹⁶Sike gata kekekangami kayuk yuwitde gwa yawi kekekakut. Wa yawi kekekakutde gae banip singgat. Gatangami gae banip singgat taknganata pimamsak.

¹¹⁷Gata katakngane tapinu na take apme yuwit. Siwana nata maak gwaangu gatane wam takngae tewa kuwan nata asinggan tawambit.

¹¹⁸Sike aminu gatane mama wam taknga teaingu gata masa yamunggayak. Itane natdetdet gwaangu waiaknga tasinangge nataaingu moo siknga kuning.

¹¹⁹Gata aminu wai tasikaing takwau kuupbamde natapinu wai sipisipi binga singgak. Siwan waaminu mupewi kuning. Unzingge na gatane wam takngae siknga nataat.

¹²⁰Sike na gae asiknga gwaumba gupma apa atepan yamukgak. Na gaat wam yananga komde natapa siwan ie akgwaukgat.

¹²¹Nata take akngaat gatu noman takngaat ngang tasikum. Unzingge gata na dua napmambi iwanata tasiwan maiwit.

¹²²Gata na gatangamiakge yawi kekekawikge nataat. Na gikane puya aminda. Gata yamandet aminu dua kapewi meya nae namuning.

¹²³Na gata wai aminde kataune sandeke tapiakge natake kai take yuwa yuwa mainggak. Unzing tasinangge tupa gika gwa yawi kekekakut.

¹²⁴Gata nae butaya natangamuyo. Natangamuke gika siakan wam taknga katak siknga nanindamumso.

¹²⁵Sike na gikane puya aminda. Unzingge natdetdeu gata nami gikane wam takngae natdewit.

¹²⁶Buyambam tapa, aminbamda gatane mama wamu ayamasandekaing. Unzingge gata ie meya yamunangge tasiyo.

¹²⁷Na gatane mama wambae take siknga nataat. Sike na golmani ngang yanikaingge take dua nataat. Siakan. Gol kundu noman siknga ngana ie take siknga dua nataat. Aho. Na gatane wamba akngae siknga nataat.

¹²⁸Ngan, na gatane mama wamu kuupbamde natapa nomangan singgak. Unzingge na kepi gutonga aknga kuupbamde dua siknga nataat.

¹²⁹Gatane wamu take siknga. Unzingge nata kuupbam tawanggat.

¹³⁰Aminu tapatu gatane wamde natdetdetna buyambam duaapa inindamubanu waapata gatane wamdane yapii natapanu, kakaa aknga musiaatang atapik. Ngan, wamu waaknga natdetna wenaapa natdetdet imunggak.

¹³¹Nata mama wamde take siknga nataat. Siwan musipmaatangu atawambitde siknga enakgak.

¹³²Gata nae apuke musip kwikwik natangamuyo. Sike aminu gae umandae take siknga nataaing aminde unzingu atasinggayak.

¹³³Gata na kakuya tasiwi na waiakngaatang dua pimambit. Unzing tupa gika tasinangge gwa yawi kekekakut. Gata waiaknga dua katewi napbimban.

¹³⁴Sike na gata gatuka tapso. Siwan aminu na naitakepu tenangge tasikingga na dua tasiwan maiwit. Siwana nata gatane wamban tawambit.

¹³⁵Gata nae wesim yuke mama wamde kuupbam nanindamumso. Siwan mama wamba kuutgan nanindamuke nanduyuyo.

¹³⁶Sike kai yanggana kwaapzang apukaing. Dasingge, aminbamda gatane mama wamu dua tawakaing.

¹³⁷Buyambam tapa, ga noman sikngaapa. Siwan gatane mama wambaaya kuupbam noman gan siknga.

¹³⁸Sike mama wamu ninde nimukuyau wa kuupbam noman siwan take siknga.

¹³⁹Natane iwana gatane wamba akngae dua nataaing. Unzingge natane musipmaatangu katap gwenda binga isikopan kwatan siknga singgak.

¹⁴⁰Gata wamba yawi kekekakuu siakan siknga. Siwan nata gwa tasiwa sikut. Unzingge na, puya amin tapakata, wamu waaknga yawi kekekakutde take siknga nataat.

¹⁴¹Sike na aminu moo apa, ge aminbamda na sapdut wam nanikaing. Siwan ngana na gatane mama wambae dua botanggat.

¹⁴²Natane musipmaatangu gatane sanga noman nomana aknga asinggan asinggan yuwik. Sike gatane mama wamba kuupbam siakan siknga.

¹⁴³Sike meya nae kwaapzangga apukaing. Siwan ngana na gatane mama wambae apbaknganggat.