Pesalem 119:32-143

³²Aê gabe jalêti jasa aômnêm biŋsu ŋalêŋ gebe ŋoc ŋalêlôm kêkac aê lêŋ tonaŋŋa.

³³O Apômtau, ôndôŋ aê nêm biŋsu ŋalêŋ. Aê gabe matoc êsap e wacjaô lasê.

³⁴Ôkêŋ ŋoc kauc êsa gebe jamansaŋ aômnêm biŋsu ma jamansaŋ toŋoc ŋalêlôm samucgeŋ.

³⁵Ôwê aê jasa aômnêm biŋsu ŋalêŋ gebe katu samuc aômnêm biŋ tonaŋ.

³⁶Ôkêŋ ŋoc ŋalêlôm êsap awa tôŋ atom, êsap nêm biŋsugeŋ tôŋ.

³⁷Ônam matocanô ôkwi aŋga gêŋ nomŋa. Ôkêŋ aê jasa nêm lêŋ topalêgeŋ.

³⁸Ôkêŋ biŋ, taŋ gôjac mata gêdêŋ lau-têtêc-aômwaga naŋ, ŋanô êsa êpi nêm sakiŋwaga aê amboac tonaŋgeŋ.

³⁹Ôkac biŋ susu, taŋ katêc naŋ su gebe nêm ŋagôliŋ ŋajam.

⁴⁰Biŋ ŋanô, aê gajam aoc su nêm jatu, taŋ gôjac jatu naŋŋa. Ôkêŋ nêm biŋgêdêŋ êpuc aê tôŋ.

⁴¹O Apômtau, ôkêŋ nêm moasiŋ êmoasiŋ aê. Ônam aê sa êtôm, taŋ gôjac mata naŋ,

⁴²gebe jajô ŋac, taŋ kêsu aê susu naŋ awa, gebe aê kakêŋ gêwiŋ aômnêm biŋ.

⁴³Ma ôkôc biŋŋanô ŋamêtê su aŋga aê aocsuŋ samucgeŋ atom gebe aê kakêŋ matoc aômnêm gôliŋ.

⁴⁴Aê gabe jamansaŋ nêm biŋsu toŋanôgeŋ ma gabe jaŋgôm endeŋ tôŋgeŋ ŋapaŋ.

⁴⁵Amboac tonaŋ jasa laŋôcnêm sawageŋ gebe aê gasom aômnêm biŋ, taŋ kôjatu naŋ.

⁴⁶Aê gabe jasôm aômnêm ŋagôliŋ êndêŋ kiŋ tomajoc êmbacgeŋ.

⁴⁷Aê têtac ŋajam kêtu nêm biŋsuŋa, taŋ aê têtac gêwiŋ naŋ.

⁴⁸Aê jatoc aômnêm biŋsu, taŋ têtac gêwiŋ naŋ sa ma taêc ênam japuc aômnêm gôliŋ ŋam.

⁴⁹Taêm ênam biŋ, taŋ gôjac mata gêdêŋ nêm sakiŋwaga aê naŋ. Biŋ tau kêkêŋ aê kakêŋ matoc.

⁵⁰Aê gaŋgôŋ jageo ŋasec, mago biŋ, taŋ aôm gôjac mata naŋ, tec kêpuc aê tôŋ ma gê malô aê.

⁵¹Lau sêkêli tauŋŋa sêsu aê susu ŋasec, mago aê kakac tauc su aŋga aômnêm biŋsu atom.

⁵²O Apômtau, aê embe taêc ênam aômnêm ŋagôliŋ laŋgwaanôŋa, naŋ oc ênac têtac tôŋ.

⁵³Aê têtac ŋandaŋ sec kêtu lau, taŋ sêkac tauŋ su aŋga Anôtônê naŋ, gebe lau tonaŋ sêwi nêm biŋsu siŋ.

⁵⁴Aômnêm biŋsu kêtu ŋoc wê lanemŋa gêdêŋ taŋ kasa ŋoc lêŋ gamoa jaê ŋoc malacmôkê ŋanô naŋ.

⁵⁵O Apômtau, aê taêc gêjam aômnêm ŋaê gêdêŋ gêbêc ma kamasaŋ aômnêm biŋsu.

⁵⁶Moasiŋ ŋanô, taŋ gawê kaiŋ naŋ, tonec gebe kamasaŋ aômnêm biŋsu.

⁵⁷Apômtau kêtu ŋoc gêŋlênsêm. Aê kasôm kêtu tôŋ gebe jamansaŋ aômnêm biŋsu.

⁵⁸Aê kateŋ aôm toŋoc ŋalêlôm samucgeŋ gebe taêm walô aê êtu biŋ, taŋ gôjac mata naŋŋa.

⁵⁹Aê taêc gêjam ŋoc lêŋ ma gajam gôliŋ ockaiŋ gêdêŋ aômnêm ŋagôliŋ.

⁶⁰Aê gajam gamêŋ tôŋ atom, kakac taucgeŋ gebe jamansaŋ aômnêm biŋsu.

⁶¹Lau alôb-alôb nêŋ lêpoa gêsô aê tôŋ, mago kaliŋ aômnêm biŋsu siŋ atom.

⁶²Aê gadi sa gêdeŋ gêbêcauc gêja lu gabe janam daŋge aôm êtu nêm gôliŋ gêdêŋŋa.

⁶³Lau taŋ têtêc aôm ma êsêac, taŋ taŋeŋ wamu nêm jatu naŋ, nêŋ ŋac teŋ aê.

⁶⁴O Apômtau, aômnêm têmtac gêwiŋ teŋgeŋŋa gêjam nom auc. Ôndôŋ aômnêm biŋsu êndêŋ aê.

⁶⁵O Apômtau, aôm kômoasiŋ nêm sakiŋwaga ŋanôgeŋ, kêtôm biŋ, taŋ gôjac mata naŋ.

⁶⁶Ôndôŋ mêtê tokauc ma mêtê jakip biŋ saŋa êndêŋ aê gebe aê taêc kêka aômnêm biŋsu.

⁶⁷Gêdêŋ taŋ kôkôniŋ aê atomgeŋ naŋ, gao gamoa, mago galoc kamasaŋ aômnêm biŋ kêtu tôŋ.

⁶⁸Aôm ŋac gabêjam ma kômoasiŋ lau. Ôndôŋ aômnêm biŋsu êndêŋ aê.

⁶⁹Lau teŋbeleŋ aŋgeŋ sêga biŋ kêpi aê, mago aê kamasaŋ nêm jatu toŋoc ŋalêlôm samucgeŋ.

⁷⁰Êsêacnêŋ ŋalêlôm ôliŋ ŋakam amboac ŋalêsi kêkêkam lau, mago aê tec ŋoc ŋalêlôm kêkac aê kêtu nêm biŋsuŋa.

⁷¹Aôm kôkôniŋ aê, tec kêmoasiŋ aê gebe nêm mêtôc tau kêdôŋ nêm biŋsu gêdêŋ aê.

⁷²Awamsuŋ ŋabiŋsu kêmoasiŋ aê kêlêlêc awamata totoŋ-totoŋ su.

⁷³Aôm lêmam kôkêŋ to kôlêsôb aê. Ôwa ŋoc kauc sa gebe jajala aômnêm biŋsu.

⁷⁴Êsêac taŋ têtêc aôm naŋ, embe sêlic aê oc têntac ŋajam êsa gebe aê kakêŋ matoc aômnêm biŋ.

⁷⁵O Apômtau, aê kajala gebe aôm kômêtôc biŋ jagêdêŋgeŋ, tec kôkôniŋ aê kêtôm aômnêm biŋ ŋaŋêŋ.

⁷⁶Ôkêŋ nêm têmtac gêwiŋ teŋgeŋŋa ênam maŋ aêmaŋ, êtôm nêm biŋ, taŋ gôjac mata gêdêŋ nêm sakiŋwaga aê naŋ.

⁷⁷Taêm walô aê gebe jaŋgôŋ matoc jali gebe aê têtac gêwiŋ aômnêm biŋsuŋageŋ.

⁷⁸Teŋbeleŋ aŋgeŋ, taŋ sêgôm aê waec sec naŋ, majeŋ êsa ma aê tec taêc gêjam aômnêm biŋ, taŋ kôjatu naŋ ŋam.

⁷⁹Ôkêŋ êsêac, taŋ têtêc aôm to sêjala aômnêm biŋ, taŋ gôwa sa naŋ, gebe sêkac tauŋ ôkwi dêndêŋ aê.

⁸⁰Ôkêŋ aêŋoc ŋalêlôm êsap aômnêm biŋsu tôŋ gebe jaŋgôm tauc paliŋ atom.

⁸¹Aôm nêm moasiŋ gêjô katuc ma kakêŋ matoc aômnêm biŋ.

⁸²Matocanô kêkac gebe jalic biŋ, taŋ aôm gôjac mata naŋ, ma katu kênac gebe “Êndêŋ ondoc, go ônam malô aê.”

⁸³Aê katôm bêlabi, taŋ dedeŋ e kêtu toŋ naŋ, mago kaliŋ aômnêm gôliŋ siŋ atom.

⁸⁴Aômnêm sakiŋwaga nê bêc tendocgeŋ gêc. Êndêŋ ondocgeŋ, go ômêtôc lau, taŋ sêlêsu aê naŋ, nêŋ biŋ.

⁸⁵Lau taŋ sêkêli tauŋ naŋ, sêkwê sê aê. Lau taŋ seo gala aômnêm biŋ naŋ, sêgôm biŋ tonaŋ.

⁸⁶Aômnêm biŋsu samob tobiŋŋanôgeŋ. Êsêac sêôc aê ôkwi ŋa biŋ dansaŋ, amboac tonaŋ ônam aê sa.

⁸⁷Sauŋgeŋ oc senseŋ aê su janaŋa aŋga nom, mago aê tec gabe jawi biŋ, taŋ aôm kôjatu naŋ, siŋ atom.

⁸⁸Aôm ŋacmoasiŋ ônam aê sa êtu nêm têmtac gêwiŋ teŋgeŋŋa gebe jaŋgôŋ matoc jali gebe jaŋgôm awamsuŋ ŋabiŋ ŋanô êsa.

⁸⁹O Apômtau, aômnêm biŋ kêtu tôŋ kêsa aŋga undambê ma ênêc endeŋ tôŋgeŋ.

⁹⁰Aômnêm biŋ ŋaŋêŋ ênêc êtôm gôlôac to gôlôac. Aôm kôsuŋ nom su, tec gacgeŋ kêkô ŋajaŋa kêsa.

⁹¹Gêŋ taŋ kôkêŋ naŋ, kêkô e gêdêŋ galoc gebe gêŋ samob têtu nêm sakiŋwaga.

⁹²Aômnêm biŋsu embe êtu aê têtac gêwiŋ ŋamôkê atom, oc janaŋa êndêŋ taŋ gêŋwapac kêkôm aê auc naŋ.

⁹³Aê gabe jaliŋ aômnêm jatu siŋ atomanô gebe aôm kôkêŋ, tec kêpuc aê tôŋ gaŋgôŋ matoc jali.

⁹⁴Aê katu aômnêm gêŋ, ônam aê sa gebe aê kapuc aômnêm gôliŋ tec gamoa.

⁹⁵Lau alôb-alôb dêdib aê gebe senseŋ aê su, mago aê taêc gêjam aômnêm biŋ, taŋ gôwa sa naŋ.

⁹⁶Aê galic gêŋ samob ŋatêku gêc. Aômnêm biŋsu tageŋ tec ŋamadiŋ masi.

⁹⁷Aê têtac gêwiŋ nêm biŋsu kêlêlêc ma taêc gêjam kêtôm bêcgeŋ.

⁹⁸Nêm biŋsu gêc aêŋa ŋapaŋ ma gêgôm ŋoc kauc kêsa kêlêlêc ŋoc ŋacjonêŋ su.

⁹⁹Aêŋoc kauc kêlêlêc ŋoc kêdôŋwaga samob nêŋ su gebe aê taêc gêjam biŋ tageŋ, taŋ aôm gôwa sa naŋgeŋ.

¹⁰⁰Aêŋoc kauc kêsa kêlêlêc kwalam laŋgwa nêŋ su gebe aê kamasaŋ aômnêm jatu.

¹⁰¹Aê kagamiŋ ockaiŋ gêdêŋ lêŋ geo samob gebe Jamansaŋ aômnêm biŋ ŋapep.

¹⁰²Aê kakac tauc su aŋga nêm gôliŋ atom gebe aôm taôm kôdôŋ aê.

¹⁰³Aê kasaê aômnêm biŋ gebe ŋakana ŋajamanô. Kasaê ŋakana kêlêlêc lêp su gêc aocsuŋ.

¹⁰⁴Aômnêm jatu gêwa ŋoc kauc sa, tec kakêŋ kisa gêdêŋ biŋdansaŋ samob.

¹⁰⁵Aômnêm biŋ kêtu ockaiŋ ŋadaweŋ ma ja teŋ kêpô ŋoc intêna.

¹⁰⁶Aê katôc lemoc ma jamansaŋ êtu tôŋ gebe taŋoc wamu aômnêm gôliŋ gêdêŋ.

¹⁰⁷Gêŋwapac gêjac aê tôŋ kasêp ŋêŋgeŋ gaja. O Apômtau, ojop aê jamoa matoc jali êtôm nêm biŋ, taŋ gôjac mata naŋ.

¹⁰⁸O Apômtau, ôkôc ŋoc da lambiŋŋa sa ma ôndôŋ nêm gôliŋ êndêŋ aê.

¹⁰⁹Aê kasa paŋ lêndaŋ gebe jamac ênduŋa endeŋ tôŋgeŋ, mago kaliŋ aômnêm biŋsu siŋ atom.

¹¹⁰Lau alôb-alôb sêwa lakô aê, mago aê gao gala aômnêm jatu teŋ atom.

¹¹¹Biŋ taŋ aôm gôwa sa naŋ, kêtu ŋoc gêŋlênsêm teŋgeŋŋa kêtu aêŋoc ŋalêlôm kêtu samuc ŋam.

¹¹²Aêŋoc ŋalêlôm taê gêjam kêtu tôŋ gebe jaŋgôm aêmnêm biŋsu ŋanô êsa, jaŋgôm endeŋ tôŋgeŋ e jamac êndu.

¹¹³Aê kakêŋ kisa gêdêŋ lau, taŋ nêŋ ŋalêlôm gêja lu naŋ, mago aê têtac gêwiŋ aômnêm biŋsu.

¹¹⁴Aôm kôtu ŋoc lamu to lautuc. Aê kakêŋ matoc aômnêm biŋ.

¹¹⁵Amac lau secwaga, akac taôm sa naamoa jaêc. Aê gabe jamansaŋ ŋoc Anôtônê biŋsu.

¹¹⁶Ôpuc aê tôŋ êtôm biŋ, taŋ gôjac mata naŋ, gebe jamoa matoc jali. Aê kakêŋ matoc aôm, amboac tonaŋ ôŋgôm aê majoc êsa atom.

¹¹⁷Ôpuc aê tôŋ gebe jamoa ŋajam ma jamansaŋ aômnêm biŋsu endeŋ tôŋgeŋ.

¹¹⁸Aôm oc ôtiŋ lau samob, taŋ seo gala aômnêm biŋsu naŋ, siŋ gebe êsêac sêsau tauŋ ŋamelocŋageŋ.

¹¹⁹Lau samob, taŋ sêkac tauŋ su naŋ, aôm gôlic êsêac amboac gêŋ gambu. Ma aê tec têtac gêwiŋ biŋ, taŋ aôm kôdôŋ naŋ.

¹²⁰Aê katêc aôm e ôlilu gêli. Aê katêc tauc kêtu nêm mêtôcŋa.

¹²¹Aê kamasaŋ biŋ solop to biŋgêdêŋ kêtu tôŋ. Ôwi aê siŋ êndêŋ sêlêsutêna atom.

¹²²Ôjô nêm sakiŋwaga awa gebe ômoasiŋ eŋ. Ôkêŋ teŋbeleŋ aŋgeŋ sêkôniŋ aê tôŋ atom.

¹²³Matocanô ŋawapac kêsa gebe aê gaôŋ nêm moasiŋ, gaôŋ aôm gebe ônam aê sa êtôm gôjac mataŋa.

¹²⁴Ônam nêm sakiŋwaga sa êtôm nêm têmtac gêwiŋ teŋgeŋŋa ma ôndôŋ nêm biŋsu aê jajala.

¹²⁵Nêm sakiŋwaga aê, ôwa ŋoc kauc sa gebe jajala biŋ, taŋ aôm ôwa sa naŋ ŋapep.

¹²⁶Apômtaunê noc gebe êwaka tau saŋa kêdabiŋ gebe êsêac sêgôm aômnêm biŋsu popoc.

¹²⁷Kêtu tonaŋŋa aê têtac gêwiŋ nêm biŋsu kêlêlêc awamata totoŋ-totoŋ su.

¹²⁸Kêtu tonaŋŋa nêm jatu gêjam gôliŋ aê. Aê gadec lêŋ dansaŋ samob.

¹²⁹Biŋ taŋ aôm gôwa sa naŋ, kaiŋ teŋ. Kêtu tonaŋŋa ŋoc ŋalêlôm kêsap biŋ tau tôŋ.

¹³⁰Aôm embe ônac nêm biŋ lêtêŋ, oc êpô gamêŋ ma êwa lau meloc-meloc nêŋ kauc sa.

¹³¹Aômnêm biŋsu gêjô aê e aoc ec-ecgeŋ.

¹³²Ôkac taôm ôkwi êndêŋ aê ma taêm walô aê, êtôm gôgôm gêdêŋ lau, taŋ têntac gêwiŋ nêm ŋaê naŋ.

¹³³Ôkêŋ nêm biŋ êpuc ockaiŋ tôŋ ma ôkêŋ gêŋ sec teŋ ênam gôliŋ aê atom.

¹³⁴Ônam aê kêsi êndêŋ ŋamalac, taŋ sêkôniŋ aê tôŋ naŋ, go jamansaŋ aômnêm jatu êtu tôŋ.

¹³⁵Ôkêŋ laŋômanô êpô nêm sakiŋwaga ma ôndôŋ nêm biŋsu êndêŋ aê.

¹³⁶Matocsulu keseleŋ amboac bu kêtu lau sêmasaŋ aômnêm biŋsu atom ŋa.

¹³⁷O Apômtau, aôm ŋac gêdêŋ ma aômnêm gôliŋ jagêdêŋ samob.

¹³⁸Aôm kômasaŋ nêm biŋsu tobiŋgêdêŋ ma kômasaŋ tobiŋ ŋaŋêŋ ŋanô amboac tonaŋgeŋ.

¹³⁹Aê têtac ŋandaŋ kêlakoc aê sec kêtu ŋoc soŋo-soŋo sêliŋ aômnêm biŋ siŋŋa.

¹⁴⁰Aômnêm biŋ, taŋ gôjac mata naŋ, ŋakêŋkêŋ laŋgwageŋ ma nêm sakiŋwaga têtac gêwiŋ biŋ tau.

¹⁴¹Aê katu ŋac sawa to sêbu aê, mago kaliŋ aômnêm jatu siŋ atom.

¹⁴²Aômnêm biŋgêdêŋ kêtu biŋgêdêŋ teŋgeŋŋa ma aômnêm biŋsu tau biŋŋanô.

¹⁴³Aê kapô lêna to gêŋwapac gêgôm aê, mago nêm biŋsu gêgôm aê têtac ŋajam kêsa.