Salmos 92:5-13

⁵Tayta Dios, rurashayquicunaga fiyupa almiraypämi. Yarpayniquega mana atipaypämi.

⁶Chaymi mana tantiyacunchu llutan ruraj runacunaga.

⁷Fiyucuna guewano mirashpanpis, llapan mana allita rurashancuna alli llojshipaptinpis paycunaga carcaycan para-simri illgänallanpämi.

⁸Tayta Dios, gammi ichanga janaj pachacho imaycamapis mandaycanquipaj.

⁹Tayta Dios, chiquishojcunaga ushajpämi illganga. Mana allita rurajcunaga machiypa-machirmi mashtacanga.

¹⁰Callpätapis gammi yurichishcanqui törupa callpanno cananpaj. Gammi alli jamachimashpayqui umämanpis alli asyaj asëtita wiñapämashcanqui.

¹¹Chiquimajcuna mana alliman chayajtapis ricashcämi. Fiyucuna llaquicuycashantapis wiyashcämi.

¹²Alli runacunaga carcaycan cuyayllapaj palma yöra tucturaycajnörämi. Miranpis Libanucho sedru wiñamojnörämi.

¹³Chay lantacunanömi Tayta Diospa Wasincho carcaycan allita ruraj runacunaga. Wasin Puncunchöpis carcaycan lantacuna waytajnörämi.