Salmos 78:15-70

¹⁵Chunyaj chaqui jircacho gagatapis shillirachiran. Chaypitanami aypalla yacu llojshimuran llapan upunanpaj.

¹⁶Tayta Dios gagapita yacuta llojshichimuran. Chaura yacuga jatun mayunöraj aywaran.

¹⁷Chayno ruraycaptinpis awilunchïcunaga juchata ruraran. Chunyajcho Tayta Diospa contran jatariran.

¹⁸Gustashallan micuyta mañashpan musyapayta munaran.

¹⁹Tayta Diospa contran rimaran: «¿Diosga alli micuyta chunyajcho garamashwanchuraj?

²⁰Diosga rasunpami gagatapis shillirachiran. Chaypa yacutapis llojshichimuran mayutano. Yacu gochacar pampatapis ñiticurcuranraj. Ichanga ¿micuyta garamashwanchuraj? Llapanchi runataga aychata ¿garamashwanchuraj?» nir.

²¹Chayno parlajta wiyaycur Tayta Diosga rabyacurcuran. Israelcunapäga nina ratarejnöraj ricacuran. Paycunapäga fiyupa rabyacurcuran.

²²Paycunaga manami yäracuranchu Tayta Diosman. Ni riguiranpischu yanapänanpaj cashantapis.

²³Chayno caycaptinpis Tayta Diosga pucutayta cachamuran. Syëlupa puncuncunapis quichacäcuran.

²⁴Acrashan runacunaman shicwachimuran manäta. Chayga caran syëlucho caycaj rïgumi paycuna micunanpaj.

²⁵Anjilcunapa tantantami runa micuran. Tayta Diosmi aypalla micuyta gararan.

²⁶Tayta Diosmi munayninwan wayrata wayrächimuran. Syëlupita-pachami wayrächimuran.

²⁷Chay wayrawanmi acrashan runacunamanga aychata chayachimuran. Äbicunami shicwamuran lamarcho caj agushnöraj aypallanpa.

²⁸Israelcuna tiyarcaycashan partiman y tolduncunapa ñaupancunaman Tayta Dios shicwachimuran.

²⁹Chaura runacunaga micuran sacsananyaj. Chaynömi Tayta Diosga runacuna munashanno camacächiran.

³⁰Chayraj cushisha micurcaycaptin, jinallaraj amurpaycaptinmi

³¹contran jatarishanpita Tayta Diosga rabyacurcuran. Chaymi mas callpayoj caj runacunata wañurachiran. Israelcho mas mijurnin caj runacunata ushariran.

³²Chaypis yapaymi juchata ruraran. Manami riguiranchu Tayta Dios milagrucunata rurashanta ricasha caycarpis.

³³Chaynöpami Tayta Diosga camacächiran illajpita jämayta cachaynölla wañunanpaj. Paycunaga ñacayllachömi goyaran.

³⁴Castigaptinrämi paycunaga Tayta Diosman yäracoj. Chayno ruraptinrämi arpinticur Tayta Diosta ashej.

³⁵Chayrämi yarpärej paycunataga Tayta Dios imapitapis chapashpan maypitapis jorgushanta.

³⁶Paycunaga janan shongullami Tayta Diosta alabaj. Imata nirpis llullapajmi.

³⁷Manami rasun cajtaga nejchu. Dioswan parlacushantapis manami cumliranchu.

³⁸Imano captinpis Tayta Diosga cuyaparanmi. Juchancunapita perdunaran. Chaynöpami ushajpäga mana illgächiranchu. Achca cutimi rabyashpanpis pasinsacuran. Rabyarpis mana castigaranchu.

³⁹Tayta Diosga yarpäriran paycuna runalla cashanta, wayra päsacojnölla imaypis mana cutimoj cashanta.

⁴⁰¡Achca cutimi chunyajcho Tayta Diostaga rabyachiran! ¡Chayno rurashpanmi llaquicachiran!

⁴¹¡Achca cutimi Tayta Diostaga musyaparan! ¡Israelcunaga Santo Diosninta llaquicachiran!

⁴²Gongaycärirannami juc junaj Tayta Dios munayninwan chiquejcunapita salbashanta.

⁴³Manami yarparannachu Egiptucho caycaj Zoán particho fiyupa almiraypajcunata rurashanta.

⁴⁴Chaychömi mayucunatapis yawarman ticrarachiran. Chaura Egipto runacunaga mananami chay yacuta upurannachu.

⁴⁵Paycunacho yurichiran upucruycunata säpucunata. Chaycunaga paycunatami ñacachiran.

⁴⁶Chüpacacunatanami yurichiran Egipto runacunapa micuynincuna wayuraycajta ushananpaj.

⁴⁷Runtu tamyawan gasapawanmi illgächiran übascunata, ïguscunatapis.

⁴⁸Runtu tamyawan räyuwannami wäcancunata, uyshancunatapis wañurachiran.

⁴⁹Tayta Diosmi fiyupa rabyashpan Egipto runacunataga castigaran. Tucuy-niraj mana allicunatami yurichiran usharinanpaj.

⁵⁰¡Fiyupa rabyasha cashpanmi mana cuyapaypa ushariran! Manami perdunaranchu ni juctapis. Llapantami wañuchiran.

⁵¹¡Egipto runacunapataga guechpa ollgu wamrancunatapis jinanchömi wañurachiran!

⁵²Israel famillyacunataga jorgamuran juc röpa uyshatano. Nircur paycunata pusharan chunyajpa.

⁵³Paycunataga mana manchacunanpaj allimi pusharan. Chiquejcunatami ichanga lamar yacuwan ñitirpachiran.

⁵⁴Acrashan runacunataga pushamuran aunishan partiman. Chay partitaga quiquin Tayta Diosmi guechuran.

⁵⁵Israelcunawan tacucänanpita quiquin Tayta Diosmi garguran payta mana rispitajcunataga. Nircur chacrataga raquiparan jircanpa-jircanpa cada trïbuta shuyni-cama. Chaychönami tolducunacho tiyachiran.

⁵⁶Ichanga Tayta Diosta musyapänanpaj rurachiyta munaran. Janaj pachacho caycaj Tayta Diospa contran rimaran. Mandamintuncunatapis mana cumliranchu.

⁵⁷Paycunaga unay caj awiluncunanömi Tayta Diospa contran ricacuran. Manami ruraranchu Pay munashannöga. Wicsu lëcha aywar llutanman chayajno Tayta Diostaga manana wiyacurannachu.

⁵⁸Mana sirbej altarta puytush lömacunacho rurar, ïdulucunata adurashpan Tayta Diosta rabyachiran.

⁵⁹Chayno rurajta ricashpanmi Tayta Diosga fiyupa rabyacurcuran. Chaymi Israelcunataga melanäcuranna.

⁶⁰Cachaycuranna Silo particho caycaj wasintapis. Cay pachachöga chay Siluchömi wasin caran.

⁶¹Chaymi conträtu babulnintapis contrancuna apacunanpaj camacächiran. Chay babulchöga caycaran acrashan runacunawan parlashan conträtumi.

⁶²Fiyupami rabyasha caycaran acrashan runacunapäga. Chaymi chiquejcuna wañuchinanpaj cachaycuran.

⁶³Mösucunataga guërrami ninano ushacurcuran. Chaura jipashcuna majachacänanpaj manana mösucuna carannachu.

⁶⁴Cüracunapis sabliwan wañuran. Biyüdacunapis paycunapäga manami wagaranchu.

⁶⁵Chay örami runa puñushanpita riccharamojno Tayta Dios jataricurcuran. Bïnuwan machashanpita pillyaj runa paucar jataricurcojno

⁶⁶contrancunataga binsir gaticacharan. Imaycamapis pengaycho cananpaj binsiran.

⁶⁷Josëpita mirar aywajcunata mana yanaparannachu. Efraín trïbutaga mananami acrarannachu.

⁶⁸Chaypa ruquenga Judäpita miraj cajtawan cuyashan Sión lömatanami acraran.

⁶⁹Chaychönami rispitädu wasinta syëlutano fiyupa jatunta ruraran. Cay pacha imaycamapis cashanno cananpämi sumaj camacächiran.

⁷⁰Sirbejnin Davidtapis uyshëru caycajta acraran.