SALMOS 65:2-12

²Ta titechnanquilía quema timomaijtohuaj huan titechmaca tlen timitztlajtlaníaj, huajca nochi tlacame ipan tlaltepactli ma hualaca campa ta.

³Yonque toyolo temitoc ica tlajtlacoli, ta titechtlapojpolhuía nochi totlaixpanolhua.

⁴¡Nelía tipaquij miyac tojuanti tlen titechtlapejpenijtoc para ma tihualaca, huan ma tiitztoquij mohuaya ipan motiopa tlen tlatzejtzeloltic! ¡Ta titechmacas hueyi paquilistli huan nochi tlen cuali tlen onca nopano!

⁵Quema timitztlajtlaníaj se tlamantli, ta titechnanquilía ica huejhueyi tlamantli. Toteco Dios, nochi tlacame ipan tlaltepactli motemachíaj ipan ta. Quena, yonque itztoque hasta campa ontlantoc hueyi atl, nochi motemachíaj para ta tiquinpalehuis.

⁶Ta ica mohueyi chicahualis tiquinchijchijqui nopa tepetini huan tiquintlatzquilti campa eltoc.

⁷Ta tijseseltía nopa hueyi atl quema mosisinía. Huan tiquinyoltlalía tlacame campa hueli quema quinequij motehuise.

⁸¡Yeca nochi tlacame tlen itztoque hasta campa ontlantoc tlaltepactli, mitztlepanitaj huan mitzimacasij para mitzixpanose quema quiitaj nopa huejhueyi tlamantli tlen tijchihua! Tijchihua para tlacame ma paquica tlen quema tlanesi huan hasta quema tlayohuiya.

⁹Ta ticatequía ni tlaltepactli para ma tlaelilti, ica nopa atemitl tlen ta moaxca tlen ax quema huaquij. Ta tijcualtlalía ni tlali para motlacajhua ma quitocaca ininxinach, huan teipa tijchihua para ma onca se hueyi pixquistli.

¹⁰Ta tijxolonía ica miyac atl nopa surcos ipan mila. Tijchihua ma huetzi atl para ma yamanía nopa tlali huan ma poxoni nopa tlaltojtolomitl. Huan tijchihua para ma ixhua nochi tlamantli tlatoctli ipan nochi tlaltepactli.

¹¹Teipa sesen xihuitl tijtlamiltía ica se pixquistli tlen nelía yejyectzi. Huan nopa mixtli tijchihua para tlaahuetziltía miyac.

¹²Onca sacatl ipan huactoc tlali, huan campa tlaixtemolis moscaltíaj cuajcuali xihuitl, huan temacaj ininxochiyo. Nesi queja moscaltíaj ica miyac paquilistli.