SALMOS 59:5-12

⁵TOTECO, Ta Tlen Tiquinyacana Moelhuicac Ejcahua Ma Tlatlanitij, ta tlen titoDios tiisraelitame, ximotlalana huan xiquintlatzacuilti nopa tlaltini tlen ax mitztlepanitaj. Amo xiquintlapojpolhui nopa tlacame tlen mosisiníaj huan nimantzi tlaixpanoj.

⁶Mojmostla ica tlapoyahui hualahuij para quitlachilise quejatza huelis techtlanise. Tzajtzitinemij queja chichime tlen quiyahualojtinemij ni altepetl.

⁷Nijcaqui camatij fiero hasta camaposonij, huan mitztelchihuaj Toteco, pampa inijuanti quiijtohuaj: “Axaca techcaqui.”

⁸Pero ta TOTECO, san xiquinhuetzquili, huan xiquinpinahualti ni tlacame tlen sequinoc tlaltini.

⁹NoTeco Dios, pampa nocualancaitacahua quipiyaj chicahualistli, ipan ta nimotemachis, pampa ta tlen tinechmanahuía.

¹⁰NoTeco Dios, ta nochipa tinechicnelijtoc miyac, yeca nijmati para temachtli tinechyacantiyas. Tijchihuas ma niquitas tlen tlahuel nijnectoc ma ininpanti nocualancaitacahua.

¹¹NoTeco, ta tlen tinechmanahuía, amo xiquinmicti nimantzi ni nocualancaitacahua, pampa huelis ni notlacajhua nimantzi quiilcahuase tlen ininpantis nopa mosisinijca tlacame. Más cuali san xiquinsemana ica mohueyi chicahualis huan xiquinechcapantlali.

¹²Quena, xiquintlatzacuilti pampa nochi inijuanti tlahuel istlacatij, mohueyimatij huan tlatelchihuaj.