SALMOS 59:5-12

⁵TOTECO, Ta Cati Tijpiya Nochi Chicahualisti, ta cati titoDios tiisraelitame, ximotanana huan xiquintatzacuilti nopa talme campa itztoque masehualme cati amo israelitame, pampa techyahualojtoque. Amo xiquintapojpolhui nopa masehualme cati mosisiníaj huan nimantzi taixpanoj.

⁶Mojmosta ica tapoyahui hualahuij para quitachilise quenicatza huelis techtanise. Tzajtzitinemij quej chichime cati quiyahualojtinemij ni altepet.

⁷Nijcaqui camanaltij fiero hasta camaposonij, huan mitztelchihuaj Toteco, pampa inijuanti quiijtohuaj: “Amo aqui techcaqui.”

⁸Pero ta TOTECO, san xiquinhuetzquili, huan xiquinpinahualti ni masehualme ten sequinoc talme cati nechyahualojtoque.

⁹NoTeco Dios, pampa nocualancaitacahua quipiyaj chicahualisti, ipan ta nimotemachis, pampa ta cati techmanahuía.

¹⁰NoTeco Dios, ta nochipa techicnelijtoc miyac, yeca nijmati para temachti techyacantiyas. Tijchihuas ma niquita cati tahuel nijnectoc ma ininpanti nocualancaitacahua.

¹¹NoTeco, ta cati techmanahuía, amo xiquinmicti nimantzi ni nocualancaitacahua, pampa huelis ni nomasehualhua nimantzi quielcahuase cati ininpantis nopa mosisinijca masehualme. Más cuali san xiquinsemana ica mohueyi chicahualis huan xiquinechcapantali.

¹²Quena, xiquintatzacuilti pampa nochi inijuanti tahuel istacatij, mohueyimatij huan tatelchihuaj.