SALMOS 25:5-17

⁵Xinechyacana ipan moojhui tlen xitlahuac huan xinechmachti, pampa ta tinoTeco Dios huan tinotemaquixtijca. Mopan ta nimotemachía ipan tlen hueli hora.

⁶TOTECO, xiquilnamiqui moteicnelilis tlen tijpixtoc para nochipa, huan tlen hasta huejcajquiya titenextilijtoc, huan yeca xinechtlasojtla.

⁷Amo xiquilnamiqui notlajtlacolhua tlen nijchijqui quema nitelpocatixtoya. Xiquilcahua quema nimotlepanitayaya moixpa. TOTECO, xinechilnamiqui ica moteicnelilis pampa hueyi moyolo nohuaya.

⁸TOTECO, ta nelía ticuali huan tixitlahuac. Yeca tiquinnextilía tlajtlacolchihuani nopa cuali ojtli tlen ipan ma nejnemise.

⁹Tiquinyacana tlen moicnonequij ipan nopa ojtli tlen más xitlahuac. Quena, tiquinmachtía inijuanti tlen quitemohuaj tlachque mopaquilis.

¹⁰Quema se tlacatl quitoquilía motlanahuatil, TOTECO, nochi ojtli tlen ipan tijhuica quinextilía moteicnelilis, huan quinextilía para ta tiitztoc tixitlahuac.

¹¹¡TOTECO! Xinechtlapojpolhui notlajtlacol yonque nelía hueyi. Xinechtlapojpolhui pampa queja nopa tiquijtojtoc tijchihuas.

¹²TOTECO, ica tlacame tlen quiimacasij mitzixpanose, tiquinnextilis nopa cuali ojtli tlen tijtlapejpenijtoc para inijuanti.

¹³Tiquintiochihuas miyac, huan ininconehua quiselise nopa tlali tlen tiquinmacas.

¹⁴TOTECO tiquinpohuilía tlen eltoc ipan moyolo inijuanti tlen mitztlepanitaj huan quiimacasij mitzixpanose. Quena, tiquinnextilía nochi tlen ininhuaya timocajtoc tlacame.

¹⁵Nochipa nimitztemohua TOTECO, huan nijchiya para tinechpalehuiqui, pampa san ta tihuelis tinechmanahuis tlen ni tlaquetztli.

¹⁶Xinechtlachili, TOTECO, huan xijpiya hueyi moyolo noca na, pampa niitztoc noselti huan nimoyolcuesohua.

¹⁷Nimoyolcuesohua ica tlahuel miyac tlamantli tlen ohui. Xinechmanahui tlen ni cuesoli.