SALAMO 9:1-14

¹Lohiabada e, oi do lau hanamoa, mai egu kudouna ibounai danu. Oiemu hoa karadia ibounai, be do lau herevalaia.

²Mai moale bada danu, oi do lau hanamoa noho. Siahu Ibounai Dirava e, oiemu ladana hanamoa totona, ane do lau abia.

³Oi be oi hedinarai neganai, lau dekenai idia tuari henia taudia, be idia giroa lou. Idia moru kava, bona oiemu vairana dekenai idia mase.

⁴Lohiabada e, oiemu kota hereva ibounai, be maoromaoro bona momokani, bona oi ese egu kara maoromaoro, be oi hamomokania vadaeni.

⁵Bese idauidau be, oi ese oi gwau henia vadaeni, bona kara dika taudia be, oi ese oi hadikaia ore vadaeni. Idia edia ladana be, tau ta ese do ia laloa lou lasi.

⁶Ai dekenai idia tuari henia taudia, be do idia dika, ela bona hanaihanai. Idia boio vadaeni. Oi ese edia hanua ibounai, be oi hadikaia ore vadaeni, bona edia ladana be, taunimanima ese do idia laloa lou lasi.

⁷To Lohiabada ena King siahuna, be do ia noho ela bona hanaihanai. Ia ese iena terona ia haginia vadaeni, kota gaukara do ia naria totona.

⁸Ia ese mai maoromaoro bona momokani danu, tanobada do ia kota henia. Bese idauidau ibounai, be Lohiabada ese do ia kota henia, mai ena laloa maoromaoro danu.

⁹Tau dikadia ese idia dagedage henia taudia, be Lohiabada ese do ia bogahisihisi henia. Ia be edia heau mauri gabuna momokani, dika ia ginidae neganai.

¹⁰Lohiabada e, oiemu ladana idia diba taudia ese, oi do idia abidadama henia. Oi dekenai idia mai taudia, be oi ese idia do oi rakatania lasi, lasi momokani.

¹¹Lohiabada, Siona dekenai ia noho Dirava, be do umui hanamoa! Iena kara be, bese idauidau edia huanai do umui herevalaia!

¹²Badina be rara ena davana, ia henia noho ena Dirava ese, hisihisi idia abia noho taudia ia laloa. Edia taitai ia laloaboio lasi, bona idia dekenai hisihisi idia henia taudia, edia kerere davana be Dirava ese do ia henia.

¹³Lohiabada e, lau dekenai do oi bogahisihisi henia! Lau idia hadikaia noho taudia dekena amo, lau abia hisihisi mani do oi itaia. Lohiabada e, mase dekena amo lau do oi hamauria.

¹⁴Unai neganai, Ierusalema taudia, edia vairanai do lau gini diba, bona oi ese lau oi hamauria kara ibounai, be idia dekenai do lau hamaorolaia. Oi ese lau oi hamauria dainai, do lau moale bada herea momokani.