SALAMO 80:5-19

⁵Oi ese aiemai taitai oi havaraia, bona aiemai matana ranu, be aniani bona inuinu gauna hegeregerena ai dekenai.

⁶Oi ese idau bese taudia oi koua lasi, vadaeni idia ese tuari idia karaia noho, aiemai tano do idia abia totona, bona ai dekenai idia tuari taudia ese, ai dekenai idia hereva dika henia noho.

⁷Siahu Ibounai Dirava e, ai do oi abia dae lou! Ai dekenai do oi bogahisihisi, bona ai do oi durua, vadaeni mauri do ai davaria!

⁸Gunaguna oi ese vain ta Aigupito dekena amo oi mailaia, bona idau bese taudia be inai tano dekena amo oi lulua. Vadaeni inai vain be oi ese inai edia tano dekenai oi hadoa.

⁹Tano oi geia hegaegae, vadaeni vain oi hadoa. Iena ramuna be idia diho dobu, bona vain ese tano ibounai ia koua.

¹⁰Inai vain ese danu, ororo gabudia be iena kerumakeruma dekena amo ia koua. Iena rigi be bada, idia ese sida audia badadia edia rigi idia koua.

¹¹Inai vain ena rigina be lata herea idia lao, ela bona davara badana, ma ela bona Euperate Sinavai dekenai.

¹²To badina dahaka oi ese vain uma ena magu oi makohia? Harihari raka hanaia taudia ibounai ese, vain ena huahua idia henaoa noho,

¹³bona uda boroma ese vain auna idia makohia noho. Uda ena mauri gaudia ibounai be vain ese ia ubudia noho.

¹⁴Siahu Ibounai Dirava e, mani emu kara ai dekenai do oi laloa. Oi be guba dekenai oi noho, mani oiemu matana ese ai do idia itaia. Mani oi diho mai, oiemu bese do oi hamauria.

¹⁵Mani oi mai, inai vain, oi ese oi hadoa gauna do oi hamauria. Inai vain matamatana, oi ese oi hagoadaia herea gauna mani do oi durua.

¹⁶Ai idia tuari henia taudia ese, inai vain be lahi dekenai idia gabua, bona idia utua diho. Mani idia dekenai do oi badu, bona oi ese idia do oi hadikaia ore.

¹⁷Oi ese ai oi abia hidi vadaeni, oiemu bese korikori. Oi ese ai oi habadaia, bona oi ese ai oi hagoadaia momokani. Mani emu kara ai do oi naria, bona ai do oi durua.

¹⁸Unai bamona oi karaia neganai, ai ese oi do ai rakatania lou lasi. Mauri ai dekenai do oi henia, vadaeni ai ese oiemu ladana do ai hanamoa bada.

¹⁹Lohiabada e, Siahu Ibounai Diravana e, oi ese ai do oi hakaua lou. Ai dekenai oiemu bogahisihisi do oi hedinaraia, oi ese ai do oi hamauria.