SALAMO 78:36-68

³⁶A ududia amo e hanamoa kava, maladia amo e koia;

³⁷lalodia na asie hatutukadia ienai, ena taravatu asie badinaia.

³⁸Ḡau tamona, ena hebogahisi dainai ia ese edia dika e gwau tao, bona se habuadia tari; nega momo ena badu e dogoa tao, ena badu siahuna idoinai asine havaraia.

³⁹E helalo tao, idia na hidio mo, lai nega tamona e toa bena ma se toa lou.

⁴⁰Nega momo idia ese tano ḡaḡaena ai e gwau edeede heniava, oibe, tano deḡedeḡe rahu ai lalona e hahisihisiava.

⁴¹E tohoa loulouva, Israel edia Helaḡa Diravana e habaduava.

⁴²Ena siahu asie laloa taova, inai tauna imana amo e hamauridia dinana na asie laloa taova.

⁴³Una negana ai, ia ese ena toa e kara Aigupto ai, bona ena hoa karadia Soan taorana ai.

⁴⁴Edia sinavai na rara ai e halaodia, taunabunai edia sinavai ranudia asie inu dibava.

⁴⁵Lao momo herea e siaidia, idia taudia e ani, bona parapara danu, idia e habuadia.

⁴⁶Edia uma anidia na rautunutunu e henidia, bona edia hekwarahi huahuadia na kwadi e henidia.

⁴⁷Edia vine na medu hetari amo e habuadia tari, bona edia suke audia danu keru amo.

⁴⁸Edia boromakau na medu hetari amo e hadikadia, edia mamoe danu kevaru amo.

⁴⁹Ena badu ḡaraḡara na idia latadiai e halasia, badu bona daḡedaḡe bona hahehisi, hahedika anerudia oreana ta na heto.

⁵⁰Ena badu dalana e lailaia; mase amo se rauadia, a dai-hanai goreredia amo e hamasedia.

⁵¹Aitupto taudia natudia roboadia iboudiai e aladia mase, edia goada roboadia, Ham ena kalaga lalodiai.

⁵²Bena ena orea taudia e hakaudia lasiva, mamoe na heheto, tano ḡaḡaena ai e hakaudiava, seri na heto.

⁵³Dala namona ai e hakaudia, taunabunai asie gari; a inaidia na davara ese e habubunidia.

⁵⁴Ena tano helaḡana ai e hakaudia lao, ia imana idibana e kwalimu ororona ai.

⁵⁵Bese idau-idau na idia vairadia amo e luludia oho, edia tano e haridia; Israel iduhudia na idia edia kalaga ai e hanohodia.

⁵⁶A idia ese Dirava Herea-mikamika e tohoa bona e gwau edeede henia; ena hereva momokanidia asie badinadia.

⁵⁷E raka muri, e kara koikoi, tamadia heḡereḡeredia; e kara gageva-gageva, peva dikana, koikoi ḡauna, na heto.

⁵⁸Badina be edia atai gabudia helaḡadia amo e habadua, edia kaivakuku e koro ḡaudia amo e havaḡeḡea.

⁵⁹Dirava e kamonai negana ai, ia na e badu dikadika, ia ese Israel e dadaraia vaitani.

⁶⁰Ena noho kalagana Silo ai e rakatania, taunimanima bogaragidiai e noholaiava ḡauna;

⁶¹ena siahu e negea, heabi-mauri ḡauna ai ela. ia hairaina e negea, inai tauna imana ai.

⁶²Ena orea taudia na dare matana ai e henidia, ia dihina e badu henidia.

⁶³Lahi ese edia uhau e haḡoledia oho; edia ulato na asi edia headava anedia.

⁶⁴Edia hahelaḡa taudia na dare matana ai e moru, vabudia ese idia taidia asie tai.

⁶⁵Bena Ḡaubada na mahuta amo e noga, goada tauna vine ranuna e inua dainai e lolomu na heto;

⁶⁶ia inaina e hakarohodia rohoroho, e hahemaraidia ela hanaihanai.

⁶⁷Ia ese Iosef ena kalaga e dadaraia, bona Efraim iduhuna se abia hidi;

⁶⁸a Iuda iduhuna e abia hidi, Siona ororona, ena lalokau.