SALAMO 78:3-67

³Ai ese ai kamonai bona diba, aiemai tamadia ese ai dekenai idia hamaoroa gaudia, be do lau gwauraia.

⁴Aiemai natudia dekena amo inai sivarai ai hunia lasi, to Lohiabada ena siahu karadia bona iena hoa karadia, be gabeai idia vara bese taudia dekenai do ai hamaoroa.

⁵Dirava ese Israela taudia dekenai taravatu ia henia, bona oda danu, be Iakobo ena bese taudia dekenai ia henia. Ia ese iseda sene taudia ia hamaoroa, iena taravatu be edia natudia dekenai do idia hadibaia.

⁶Unai dekena amo gabeai do idia vara bese taudia ese, inai taravatu do idia diba, bona idia ese edia natudia dekenai ma do idia hadibaia.

⁷Bona unai dala dekenai, edia natudia ese Dirava do idia abidadama henia, bona iena kara do idia laloaboio lasi, to iena taravatu do idia kamonai henia nega ibounai.

⁸Unai dekena amo danu edia tamadia, unai laloa auka bona kamonai lasi taudia, edia kara hegeregerena do idia karaia lasi. Unai edia tamadia edia abidadama be goada momokani lasi, bona idia ese Dirava idia badinaia momokani lasi.

⁹Eparaima taudia, be mai edia peva bona diba edia imadia dekenai, to idia be tuari dinana dekenai idia heau lou.

¹⁰Idia ese Dirava ena gwauhamata idia badinaia lasi, bona iena taravatu kamonai henia kara idia negea.

¹¹Dirava ena kara be idia laloaboio, bona iena hoa karadia ia hedinaraia gaudia danu, be idia laloaboio.

¹²Edia sene taudia be, edia matadia dekenai unai hoa karadia idia itaia, Aigupito tano dekenai bona Soana tano palaka dekenai danu.

¹³Dirava ese danu davara ia hapararaia, bona idia ese idia raka hanaia. Ia ese ranu ia haginia, magu ruaosi bamona.

¹⁴Dina dekenai ia ese ori korema dekena amo ia hakaudia, bona hanuaboi ena nega ibounai, be lahi ena diari dekena amo ia hakaudia.

¹⁵Taunimanima idia noho lasi tano dekenai, Dirava ese nadi ia hapararaia, bona inua ranu be idia dekenai ia henia, dobu gabudia dekena amo.

¹⁶Dirava ese danu nadi dekena amo ranu ia mailaia. Inai ranu be ia heau lao, sinavai bamona.

¹⁷To idia ese edia kara dika Dirava dekenai idia karaia noho. Tano kaukau dekenai, Ataiai Herea Dirava dekenai idia dagedage henia.

¹⁸Idia ese Dirava idia tohoa. Idia ese idia ura aniani be Dirava dekena amo idia gwauraia.

¹⁹Idia ese Dirava idia hereva dika henia, idia gwau, “Dirava ese tano kaukau dekenai, aniani patana ia abia hegaegae diba, a?”

²⁰Idia gwau, “Momokani, nadi ia botaia neganai, ranu ia bubua diho bada herea, to Dirava ese aniani do ia henia diba, bona iena bese taudia dekenai vamu do ia henia diba, a?”

²¹Lohiabada ese edia hereva badubadu ia kamonai neganai ia badu. Ia ese iena bese taudia lahi dekena amo ia hadikadia. Iena badu be Israela taudia dekenai ia bada lao,

²²badina idia ese ia dekenai idia abidadama henia lasi, bona idia ese Dirava ena hamauria siahuna idia hamomokania lasi.

²³To Dirava ese guba ataiai dekenai ia hereva henia, ia ese guba ena iduara ia kehoa.

²⁴Bona ia ese mana aniani, be guba dekena amo ia siaia diho. Ia ese guba ena aniani iena bese taudia dekenai ia henia, do idia ania totona.

²⁵Vadaeni idia ese aneru ena aniani idia ania. Bona Dirava ese aniani bada ia siaia, edia ura hegeregerena momokani.

²⁶Dirava ese danu, dina ia daekau kahana dekena amo lai ia havaraia, bona iena siahu dekena amo, diho kahana dekena amo ma lai ta ia havaraia,

²⁷bona iena bese taudia dekenai roho manudia ia siaia diho, momo herea, kone ena miri bamona.

²⁸Edia kamepa ena huana dekenai idia moru diho, edia noho palai rumadia idia hagegea.

²⁹Unai dainai taunimanima idia aniani, bona edia bogadia idia kunu. Dirava ese idia ura gaudia ia henidia.

³⁰To idia ura dikadika aniani idia do ania noho neganai, aniani be do ududia edia lalonai,

³¹be Dirava ese idia dekenai ia badu, bona edia goada herea taudia be ia ese ia alaia mase. Israela ena eregabe taudia, tau namo hereadia be Lohiabada ese ia hamasea.

³²Inai matakani be Dirava ese ia henidia, to idia be idia kara dika noho. Hoa karadia momo Dirava ese ia karaia, to idia ese ia dekenai idia abidadama henia lasi.

³³Unai dainai ia ese edia mauri ia hadokoa, hahodi tamona bamona. Edia mauri lagani, mai gari bada danu ia haorea haraga momokani.

³⁴Dirava ese idia haida ia alaia mase neganai, oredia ese ia dekenai idia giroa lou. Idia ese edia lalona idia giroa, bona ia dekenai idia giroa momokani.

³⁵Idia laloa lou, Dirava be idia edia Nadi Badana. Bona idia laloa lou, Siahu Ibounai Dirava be edia hamauria Tauna.

³⁶To edia hereva ibounai be koikoi sibona. Idia ese Dirava idia hanamoa koikoi.

³⁷Idia be Dirava dekenai idia giroa momokani lasi, bona edia gwauhamata ena anina ia dekenai idia karaia lasi.

³⁸To Dirava ese, iena bese taudia dekenai ia bogahisihisi henia. Idia edia kara dika ia gwauatao, bona ia ese idia ia hadikaia ore lasi. Nega momo ia ese iena badu ia hakerua, bona iena badu ena siahu momokani ia havaraia lasi.

³⁹Ia laloatao, idia be taunimanima sibona. Idia be lai bamona, nega tamona sibona ia toa, bona ia toa lou lasi.

⁴⁰Nega momo, taunimanima idia noho lasi tano dekenai, iena bese taudia ese Dirava idia kamonai henia lasi, mai dagedage danu. Io, nega momo tano kaukau dekenai, idia ese Dirava ena lalona idia hisihisi henia.

⁴¹Dirava ena bogahisihisi idia tohoa lou, tohoa lou, bona idia ese Israela edia Helaga Dirava idia habadua.

⁴²Iena siahu bada herea be idia laloaboio. Dirava ese dagedage taudia dekena amo ia hamauridia dinana, be idia ese idia laloaboio.

⁴³Unai dina dekenai, Dirava ese Aigupito dekenai kara badadia ia karaia, bona hoa karadia danu Soana tano palaka dekenai ia karaia.

⁴⁴Aigupito edia sinavai be rara dekenai ia halaoa, bona Aigupito taudia, be sinavai edia ranu idia inua diba lasi.

⁴⁵Dirava ese lao momo herea idia edia huanai ia siaia, bona idia hisihisi henidia. Paroparo danu be ia ese ia siaia, edia tano idia hadikaia.

⁴⁶Dirava ese danu kwadi momo herea ia siaia, edia uma edia anina idia ania ore.

⁴⁷Edia vain huahua be medu, aisi nadi bamona, dekena amo ia hadikaia ore, bona edia fig audia be keru dekena amo idia mase ore.

⁴⁸Edia boromakau be medu, aisi nadi bamona, dekena amo ia aladia ore, bona edia mamoe danu, be kevaru dekena amo ia aladia ore.

⁴⁹Ia ese iena badu bona iena dagedage, be idia edia latanai ia bubua diho. Ia ese idia ia hisihisi henidia momokani. Iena mase havaraia aneru orea ta idia dekenai ia siaia.

⁵⁰Iena badu be ia ese ia hakerua lasi. Mase dekena amo ia hamauridia lasi. To ia ese hanaia gorere dikana dekena amo ia aladia mase.

⁵¹Aigupito taudia edia vara guna natudia tau ibounai, be Dirava ese ia aladia mase, Hamo bese ena vara guna natudia tau ibounai.

⁵²Unai neganai Dirava ese iena bese taudia ia hakaua mai, mamoe naria tauna ese iena mamoe ia hakaua bamona. Ia ese taunimanima idia noho lasi tano kaukau dekenai, ia hakaudia, idia raka hanaia.

⁵³Dala namona dekenai ia hakaudia, vadaeni idia gari lasi. To idia dekenai idia tuari henia taudia, be Dirava ese davara ena lalonai ia hamasedia.

⁵⁴Dirava ese iena bese taudia ia hakaua, ela bona iena tano helagana dekenai idia ginidae. Unai ororo be ia sibona ese, tuari ena kwalimu dekena amo ia abia guna vadaeni.

⁵⁵Iena bese taudia idia raka hanaia neganai, unai tano noho taudia be Dirava ese ia luludia ore, bona edia tano be Israela iduhu ta ta edia huanai ia haria. Edia ruma be Israela taudia dekenai ia henia.

⁵⁶To Israela taudia ese Siahu Ibounai Dirava idia tohoa, bona idia kamonai henia lasi. Idia ese iena taravatu idia utua.

⁵⁷Mai hekokoroku danu Dirava ena hereva idia utua, edia tamadia hegeregerena. Idia edia kara be gagevagageva, peva gagevagagevana bamona.

⁵⁸Idia ese dirava koikoidia dekenai boubou patadia idia haginia, ma unai dainai Dirava ia badu. Bona idia ese idia koroa kaivakuku gaudia dekena amo, Dirava idia habadua.

⁵⁹Inai bamona idia karaia, be Dirava ese ia itaia neganai, ia badu mai siahu danu. Unai dainai ia ese Israela taudia ia negea momokani.

⁶⁰Vadaeni Dirava ese iena Palai Dubu, Silo dekenai ia noho gauna ia rakatania. Unai Silo Palai Dubu, be taunimanima edia huanai Dirava ia noho guna gauna.

⁶¹Bona Dirava ese, Israela taudia dekenai idia tuari henia taudia ia koua lasi, unai dainai idia ese Taravatu Maua idia abia. Inai Taravatu Maua, be Dirava ena siahu bona iena hairaina ena toana.

⁶²Io, Dirava ese iena bese korikori taudia dekenai ia badu, bona idia dekenai idia tuari henia taudia ia koua lasi, unai dainai Israela taudia momo idia mase.

⁶³Tuari dekenai Israela uhau taudia momo idia mase, bona edia kekeni be mai edia headava dalana lasi, uhau taudia lasi dainai.

⁶⁴Unai idau bese tuari taudia ese, Israela hahelagaia taudia idia alaia mase, bona edia vabu idia taravatua, edia tau totona do idia taitai lasi.

⁶⁵Vadaeni Lohiabada be mahuta dekena amo ia noga, goada tauna uaina ia inua dainai ia boiboi bamona.

⁶⁶Ia ese ia dekenai idia tuari henia taudia ia tuari henidia, ia ese idia ia lulua ore. Ia luludia ore, ia halusidia momokani, mai edia hemarai danu.

⁶⁷To ia ese Iosepa ena bese taudia ia ura lasi, ia negea, bona Eparaima iduhu danu ia abia hidi lasi.