SALAMO 78:20-60

²⁰Ia ese nadi e botaia, bena ranu e aru lasi, koupa-koupa e aru rohoroho; a aniani danu baine heni diba, eiava vamu na ena orea taudia baine henidia diba a?”

²¹Taunabunai Iehova e kamonai negana ai na e badu dikadika, Iahi e ara Iakob enai, ena badu e ḡaraḡara Israel enai;

²²badina be Dirava asie abiabiraia, ena hahemauri siahuna asie abidadama henia.

²³Ḡau tamona, ia ese guba atai ai e haḡanidia, bona guba iduaradia e kehodia;

²⁴mana na latadiai e hadihoa medu na heto, adia, guba anianidia e henidia.

²⁵Taunimanima ese aneru adia aniani e aniva; ia na aniani momo e siaia, adia.

²⁶Guba ai lai mairiveina e toa, ena hahedua dainai, ena siahu amo lai diho e hakaua lasi;

²⁷vamu na latadiai e hadihoa gahu na heto, roho manudia e hadihodia kone mirina na heto;

²⁸ia ese e hamorudia edia taruha bogaraginai, edia noho gabudia heḡeḡemadai.

²⁹Idia na e aniani, bogadia e kunu; e gadodiava ai e urava ḡaudia na e henidia.

³⁰A dounu e gadova negana ai, aniani na dounu ududia ai,

³¹Dirava ena badu na e vara latadiai; bena goada-herea taudia ia ese e aladia mase, Israel ena abi-hidi taudia ia ese e hamasedia.

³²Ena be unu e kara toma, to idia na dounu e kara havara; ena be ena hoa karadia e ita, to idia na asie abia dae.

³³Taunabunai, ia ese edia dina e ha-oredia, hahodi tamona na heto, edia laḡani danu gari ai e ha-oredia.

³⁴E aladiava negadia ai, idia ese ia e tahuava, e helalo kerehaiva, bona Dirava e tahua malaka-malakava.

³⁵E helalo taova, Dirava na edia nadi-gini, Dirava Herea Mikamika na idia ihamauridia.

³⁶A ududia amo e hanamoa kava, maladia amo e koia;

³⁷lalodia na asie hatutukadia ienai, ena taravatu asie badinaia.

³⁸Ḡau tamona, ena hebogahisi dainai ia ese edia dika e gwau tao, bona se habuadia tari; nega momo ena badu e dogoa tao, ena badu siahuna idoinai asine havaraia.

³⁹E helalo tao, idia na hidio mo, lai nega tamona e toa bena ma se toa lou.

⁴⁰Nega momo idia ese tano ḡaḡaena ai e gwau edeede heniava, oibe, tano deḡedeḡe rahu ai lalona e hahisihisiava.

⁴¹E tohoa loulouva, Israel edia Helaḡa Diravana e habaduava.

⁴²Ena siahu asie laloa taova, inai tauna imana amo e hamauridia dinana na asie laloa taova.

⁴³Una negana ai, ia ese ena toa e kara Aigupto ai, bona ena hoa karadia Soan taorana ai.

⁴⁴Edia sinavai na rara ai e halaodia, taunabunai edia sinavai ranudia asie inu dibava.

⁴⁵Lao momo herea e siaidia, idia taudia e ani, bona parapara danu, idia e habuadia.

⁴⁶Edia uma anidia na rautunutunu e henidia, bona edia hekwarahi huahuadia na kwadi e henidia.

⁴⁷Edia vine na medu hetari amo e habuadia tari, bona edia suke audia danu keru amo.

⁴⁸Edia boromakau na medu hetari amo e hadikadia, edia mamoe danu kevaru amo.

⁴⁹Ena badu ḡaraḡara na idia latadiai e halasia, badu bona daḡedaḡe bona hahehisi, hahedika anerudia oreana ta na heto.

⁵⁰Ena badu dalana e lailaia; mase amo se rauadia, a dai-hanai goreredia amo e hamasedia.

⁵¹Aitupto taudia natudia roboadia iboudiai e aladia mase, edia goada roboadia, Ham ena kalaga lalodiai.

⁵²Bena ena orea taudia e hakaudia lasiva, mamoe na heheto, tano ḡaḡaena ai e hakaudiava, seri na heto.

⁵³Dala namona ai e hakaudia, taunabunai asie gari; a inaidia na davara ese e habubunidia.

⁵⁴Ena tano helaḡana ai e hakaudia lao, ia imana idibana e kwalimu ororona ai.

⁵⁵Bese idau-idau na idia vairadia amo e luludia oho, edia tano e haridia; Israel iduhudia na idia edia kalaga ai e hanohodia.

⁵⁶A idia ese Dirava Herea-mikamika e tohoa bona e gwau edeede henia; ena hereva momokanidia asie badinadia.

⁵⁷E raka muri, e kara koikoi, tamadia heḡereḡeredia; e kara gageva-gageva, peva dikana, koikoi ḡauna, na heto.

⁵⁸Badina be edia atai gabudia helaḡadia amo e habadua, edia kaivakuku e koro ḡaudia amo e havaḡeḡea.

⁵⁹Dirava e kamonai negana ai, ia na e badu dikadika, ia ese Israel e dadaraia vaitani.

⁶⁰Ena noho kalagana Silo ai e rakatania, taunimanima bogaragidiai e noholaiava ḡauna;