SALAMO 76:5-11

⁵Goada taudia ese edia tuari dekena amo idia abia kohu, be haida ese idia abia, bona unai goada taudia, be mase ena mahuta ese ia abidia vadaeni. Idia edia siahu be anina lasi, bona edia goada be ia ore vadaeni.

⁶Iakobo ena Dirava e, oi ese oi gwau henidia neganai, hosi mai edia guia taudia danu idia mase ore.

⁷To taunimanima ibounai ese oi idia gari henia noho. Oi be oi badu momokani neganai, daika ese oiemu vairana dekenai do ia gini diba?

⁸Guba dekena amo oiemu kota hereva oi gwauraia, vadaeni tanobada taudia be idia gari bada, bona mai regena ta lasi oiemu vairana dekenai idia gini noho.

⁹Unai neganai Dirava ia toreisi, kota hereva do ia gwauraia totona, bona tanobada dekenai idia hisihisi noho taudia ibounai, be do ia hamauria totona.

¹⁰Momokani taunimanima edia badu ese oi ia hanamoa noho, bona oiemu badu ia ore murinai do mauri noho taudia ese, oi do idia tomadiho henia.

¹¹Emui Dirava, Lohiabada, dekenai gwauhamata do umui henia, bona gwauhamata ena anina do umui karaia. Dirava umui hagegea noho taudia ibounai ese, ia dekenai harihari gaudia do umui henia be namo, badina ia dekenai taunimanima idia gari noho.