1Dirava baine tore isi, ia inaina baine hakarohodia rohoroho; e inai heniamu taudia na ia vairanai bae heau.
2Lai ese kwalahu e odaia ohomu heḡereḡerena unu bae odadia oho toma; Wax na lahi badibadinai e vevemu na heto, kara dika taudia na unu bae mase toma, Dirava vairanai.
3A kara maoromaoro taudia na bae moale; Dirava vairanai bae hisi dae, moale ai bae honu honu dae.
4Ane avabia, Dirava ena, ia ladana ba hanamoa emu ane ai; ane ba ladaia isi, ori ai e guimu Diravana ena; ia ladana na Iehova, ia vairanai ba hisi dae.
5Dirava na ihareha tamadia bona vabu igimadia, ena noho gabuna helaḡana ai.
6Dirava ese noho-edea taudia edia iduhu e henidiamu, iḡui taudia e hakaudia lasimu, e hataḡadiamu; a gwau-emuri taudia na tano kaukauna ai e nohomu.
7Dirava e, emu orea taudia vairadiai o raka lasi bona tano gagaena o rakaia hanai negana ai, (Selah)
8tano e laga bona guba medudia e diho badabada, Dirava vairanai. Sinai ororona bunai, Dirava vairanai e heude-heude, Israel Diravana vairanai.
9Dirava e, medu o hadihoa badabada; emu tano e kaukauva negana ai o hapariparia;
10emu seri na ia lalonai edia noho gabuna e davaria. Dirava e, emu kara namo bagunai ogoḡami taudia adia o henidia.
11Ḡaubada ese ena hahedua herevana e gwauraiamu hutuma bada ese e piuamu;
12tuari oreadia pavapavadia e heaumu, e heaumu. Ruma ai e nohomu hahinedia ese tuari ai e dadi kohudia e haridiamu,
13mamoe edia maḡu ai e nohomu hahinedia ese. Pune hanina na silver amo e heḡova, hanina huidia na gold gadoka-gadokana amo e heḡova.
14Siahu-idoinai Diravana ese hanua pavapavadia na Salmon ai e hakarohodia negana ai, snow na unuseni ai e diho.
15Ororo badana e, Basan ororona! Dorina momo ororona e, Basan ororona!
16Dorina momo ororona e, dahaka o hamuemu? Dirava e uramu baine noholaia ororona, Oibe, Iehova baine noholaia hanaihanai ororona, dahaka hamuena o karaiamu?
17Ḡaubada na Sinai amo gabu helaḡana ema, mai kariota aukadia gerebu rua ida, oibe, mai kariota daha daha ida.
18Oi na ororo ḡaulatalatana ai o dara dae, iḡui taudia na murimu ai o hakaudia dara. Herahia ḡaudia na taunimanima edia amo o abi, oibe, gwau-hemuri taudia edia amo danu, Ḡaubada Iehova unuseni ai baine noho na totona.
19Ḡaubada aita hanamoa! Ia ese dina iboudiai e abida isimu; Dirava na eda mauri. (Selah)
20Eda Dirava na hahemauri Diravana; Ḡaubada Dirava ese mase amo e harohoda maurimu.
21A Dirava ese ia inaina kwaradia baine huaridia, ena kara havara ai e rakamu tauna na tubuana mai huina baine huaria.
22Ḡaubada eto: Basan amo baina loulaidia, davara dobuna gabudia amo baina loulaidia,
23aemui na rara ai ba hadigudia totona, bona emui sisia maladia na inaimui raradia bae demaria totona.
24Dirava e, mai hairaimu ida o raka hanaimu, egu Dirava, egu Pavapava, na gabu helaḡana ai e raka vareaimu, mai hairaina ida.
25Ane e abimu taudia na vairai e rakamu, hatai-hatai ḡaudia e hataimu taudia na muri ai, bogaragi ai na ulato ese edia tareko e hareḡemu.
26Hebou badana ai Dirava ba hanamoa, Israel ena ranu-lohilohi gabuna amo o maimu taumui, Ḡaubada ba hanamoa.
27Beniamina, tau muritai, na vairai; Iuda lohiadia na mai edia orea ida, Sebulun lohiadia bona Napatali lohiadia danu unuseni ai.
28Dirava e, siahumu avabia, Dirava e, goadamu ba hahedinaraia, emu siahu karadia vada o kara, ai daimai ai.
29Emu Dubu Helaḡa Ierusalem ai dainai, pavapava ese edia herahia e mailaimu emu.
30Siriho ai e nohomu boromadia ba gwau henidia, boromakau mamaruanedia seridia bona taunimanima edia boromakau natudia ba gwau henidia. Heaiva kohuna iabina e uramu taudia ba moidia tao, tuari e moalelaiamu besedia ba hakarohodia.
31Auri labora-labora na Aigupto amo bae mailaia, Etiopia ese mase mauri imana na Dirava baine toi roro henia.