SALAMO 38:6-17

⁶Egu kwarana lau atoa diho, bona lau moru diho noho. Dina ena hora ibounai lalonai lau tai noho, tai noho.

⁷Egu kopina be ia siahu noho, bona egu tauanina be ia goada lasi.

⁸Lau be lau manoka vadaeni, badina haida ese lau idia botaia patapata. Egu kudouna ia hisihisi noho, bona hisihisi dainai lau tai noho.

⁹Lohiabada e, egu ura ibounai oi diba. Egu taitai, be oi dekena amo ia hunia lasi.

¹⁰Egu kudouna be ia gaukara haragaharaga noho, egu goada ia ore, bona egu matana ena diari ese, lau ia rakatania vadaeni.

¹¹Egu toto dainai, egu turana bona egu bamona taudia, ese lau idia vadivadi henia lasi. Egu bese taudia danu be lau dekena amo idia noho siri.

¹²Lau idia alaia gwauraia taudia ese, lau abia totona tarapu idia atoa vadaeni, bona lau idia hadikaia gwauraia taudia ese, hadikaia hereva dekena amo lau idia hagaria noho. Dina ibounai doko lasi, idia ese lau hadikaia totona, dala idia tahua noho.

¹³Lau be taia kudima tauna bamona, lau kamonai diba lasi. Lau be hereva diba lasi tauna bamona, egu uduna lau kehoa diba lasi.

¹⁴Io, lau be kamonai diba lasi tauna bamona. Lau be lau haere lasi, badina lau be hereva lau kamonai lasi tauna bamona.

¹⁵To Lohiabada e, lau ese oi lau abidadama henia noho, bona oi be Lohiabada, lauegu Dirava dainai, oi ese lau do oi haere henia.

¹⁶Mani emu kara, lau idia hadikaia gwauraia taudia do oi koua, vadaeni idia ese egu hisihisi do idia kirikirilaia lasi. Egu moru dekenai, mani emu kara do idia hevaseha lasi.

¹⁷Badina lau be kahirakahira lau moru diho noho inai, bona egu hisihisi, be nega ibounai ena mamina lau abia noho.