SALAMO 37:23-35

²³Tau namona ena ae-raka na Iehova ese e reḡuamu, bona ena dala e moalelaiamu tauna na ia ese e haginiamu.

²⁴Ia na baine keto, to basine moru dobi; badina be Iehova ese ia imana amo e dogoa taomu.

²⁵Lau be gunaguna na eregabe, harihari vada na buruka; a lau ese nega hata kara maoromaoro tauna ta vada e baia na do asina itaia, eiava natuna na aniani e noi hegame ai do asina itaia.

²⁶Ia na nega iboudiai e hariharimu bona e heni torehaimu, bona ia natuna na taunimanima ihanamodia taudia ai vada ela.

²⁷Kara dika ba rakatanidia, kara namo ba kara; bena ba noho hanaihanai.

²⁸Badina be Iehova na kara maoromaoro e ura heniamu; ena helaḡa taudia na basine rakatanidia. Kara maoromaoro taudia na bae mauri hanaihanai; a kara dika taudia natudia na bae henege daure.

²⁹Kara maoromaoro taudia ese tano bae abia, bae noholaia hanaihanai.

³⁰Kara maoromaoro tauna uduna ese aonega herevadia e gwauraimu, ia malana ese hahemaoro herevadia e gwauraimu.

³¹Ena Dirava ena taravatu na lalona ai; ia aena na se dedimu.

³²Kara dika tauna ese kara maoromaoro tauna e itaia taomu, ia iala-masena dalana e tahuamu.

³³Iehova ese ia imana ai basine negea, bona bae hahemaoro henia negana ai baine rudia, basie revaia.

³⁴Iehova ba naria, iena dala ai ba raka, bena baine abimu dae, tano na bavabia oiemu; kara dika taudia ihabua-taridia danu ba itaia.

³⁵Kara dika tauna vada na itaia, e lao hereava, e tubu badabadava, Lebanon ai sida auna ta na heto;