SALAMO 119:63-173

⁶³Lau na e gari henimumu taudia iboudiai bona emu hahedua herevadia e badinadia taudia bamodia.

⁶⁴Iehova e, tanobada na emu hebogahisi ai eme honu honu dae, emu taravatu ba hadibagu.

⁶⁵Iehova e, emu hesiai tauna vada o kara namo henia, emu hereva heḡereḡerena.

⁶⁶Lalo-parara bona aonega ba hadibagu, badina be emu haheḡani na abi daemu.

⁶⁷Hisihisi do se abigu negana ai na raka muri, a harihari emu hereva na badinaiamu.

⁶⁸Oi na namo, bona o kara namomu; emu taravatu ba hadibagu.

⁶⁹Dirava garina asie garimu taudia ese hereva koikoidia amo e hadikagumu, a lau ese mai lalogu idoinai emu hahedua herevadia na badinadiamu.

⁷⁰Lalodia na digara uduna masemasedia na heheto; a lau na emu taravatu na moalelaiamu.

⁷¹Hisi na ani be namo, unu amo emu taravatu na lalo davari.

⁷²Udumu taravatuna na namo herea egu ai, gold bona silver monidia daha daha e hereadiamu.

⁷³Oi imamu ese vada e karagu, oromagu vada e henigu; lalo-parara danu ba henigu, emu haheḡani baina lalo davari helaoreana.

⁷⁴Oi garimu e garimu taudia bae itagu, bena bae moale, badina be emu hereva vada na laroa.

⁷⁵Iehova e, lau dibagu emu hahemaoro herevadia na mamaoro, bona heabidadama ai vada o hahisigu.

⁷⁶Emu lalokau ese taugu ihalona baine lailaia, emu hesiai tauna o gwau henia hamata heḡereḡerena.

⁷⁷Emu hebogahisi na egu ai baine kau, baina mauri totona; badina be emu taravatu na egu moale ḡauna.

⁷⁸Dirava garina e garimu taudia na bae hahemaraidia, badina be edia koikoi amo vada e dibaḡanigu; a lau ese emu hahedua herevadia baina haerodia.

⁷⁹Oi garimu e garimu taudia ese lau bae haḡeregu, bena emu hahediba herevadia bae dibadia.

⁸⁰Lalogu na asi kererena baine noho emu taravatu ai, bena basie hahemaraigu diba.

⁸¹Laumagu ese emu hahemauri e ura henia lalo dikamu; emu hereva na laroamu.

⁸²Matagu e vaburamu emu gwauhamata inarina ai; na henanadaimu, na toma “Edena nega ai taugu ba haloa?”

⁸³Lau na vine ranuna ivedailaina kopina kwalahu ai e hetau daemu na heto, to emu taravatu asina lalodia boio.

⁸⁴Emu hesiai tauna baine haheauka ela bona edena nega ai? Edena nega ai e daḡedaḡe henigumu taudia ba hahemaoro henidia?

⁸⁵Dirava garina se garimu taudia ese rikiriki vada e karaia, lau iabigu totona, idia na emu taravatu asie badinaiamu.

⁸⁶Emu haheḡani iboudiai na momomo kakani; kara koikoi amo e hadikagumu; a kahagu.

⁸⁷Mokona vada e hamasegu tanobada ai, a lau ese emu hahedua herevadia asina rakatanidia.

⁸⁸Emu hebogahisi ai ba hamaurigu, bena udumu ena hahediba herevadia baina badinadia.

⁸⁹Iehova e, emu hereva na guba ai e mia hanaihanaimu.

⁹⁰Emu heabidadama na e hesiriumu ela bona uru. iboudiai; tanobada vada o hadaia, e gini tutuka-tutukamu.

⁹¹Oi o gwau maoro dainai hari dina ai idia na gigini, badina be ḡau iboudiai ese oi isiaimu e lao henimu.

⁹²Emu taravatu basinama moalelaia, egu hisihisi ai bama mase.

⁹³Emu hahedua herevadia basina lalodia boio, lasi vaitani; badina be idia edia amo mauri vada o henigu.

⁹⁴Lau na oiemu, ba hamaurigu; badina be emu hahedua herevadia vada na tahudia.

⁹⁵Kara dika taudia na e bani taomu, bae alagu mase totona, a lau ese emu hahediba herevadia na haerodiamu.

⁹⁶Vada na itaia, asi ḡauna ta tanobada ai vada e namo guḡuru, a emu haheḡani na ḡamoḡa bada.

⁹⁷Emu taravatu na ura henia lalo dikamu; ia na egu haero-haero ḡauna dina idoinai.

⁹⁸Egu aonega ese inaigu edia aonega e hereaiamu, emu haheḡani ese lalogu vada e hapararaia dainai; badina be ia na egu ai hanaihanai.

⁹⁹Egu lalo-parara ese e hadibagu taudia iboudiai edia lalo-parara e hereadiamu, badina be emu hahediba herevadia na egu haero-haero ḡaudia.

¹⁰⁰Egu diba ese tatau burukadia edia diba na e hereaiamu, badina be emu hahedua herevadia na badinadiamu.

¹⁰¹Aegu na dala dikadia iboudiai amo na rudiamu, emu hereva ibadinana totona.

¹⁰²Emu hahemaoro herevadia amo asina raka siri, badina be oi ese vada o hadibagu.

¹⁰³Emu hereva mamidia egu ai na daka gaiho! Edia gaiho mamina ese bada-ranuna gaihona e hereaiamu udugu ai.

¹⁰⁴Emu hahedua herevadia ese lalogu vada eme hapararaia, una dainai lau ese dala koikoidia iboudiai na inai henidiamu.

¹⁰⁵Emu hereva na lau aegu lamepana, bona egu dala diarina.

¹⁰⁶Vada na gwau hamata, bona egu gwauhamata vada na hamomokania, emu hahemaoro herevadia maoromaorodia baina badinadia.

¹⁰⁷Egu hisihisi na bada; Iehova e, ba hamaurigu, emu hereva heḡereḡerena.

¹⁰⁸Iehova e, egu heimodai herevadia bavabi dae; emu hahemaoro herevadia ba hadibagu.

¹⁰⁹Nega idoinai egu mauri na imagu ai, a emu taravatu asina reaiamu.

¹¹⁰Kara dika taudia ese idoa vada e karaia, bae idoagu eto; a emu hahedua herevadia amo asina raka siri.

¹¹¹Emu hahediba herevadia na lau ahugu, ela bona hanaihanai; oibe, idia na lalogu ena moale badina.

¹¹²Lalogu vada eme heḡaeḡae, emu taravatu karadia baina kara, nega iboudiai, ela bona dokona.

¹¹³Lalo-rua taudia na inai henidiamu, a emu taravatu na ura heniamu.

¹¹⁴Oi na egu komu gabuna bona egu kesi; emu hereva na laroamu.

¹¹⁵Kara dika taumui e, egu amo ba raka oho, bena egu Dirava ena haheḡani baina badinadia diba.

¹¹⁶Ba imudagu, emu gwauhamata heḡereḡerena, bena baina mauri, bona egu helaro ai tau ta ese basine hahemaraigu.

¹¹⁷Egu imuda ai baola, bena baina mauri, bona emu taravatu baina lalodia loulou.

¹¹⁸Emu taravatu amo e raka siri taudia iboudiai na o dadaraidiamu; oibe, edia aonega na asi anina.

¹¹⁹Tanobada ena kara dika taudia iboudiai na negenege ḡaudia ai o halaodiamu; taunabunai emu hahediba herevadia na ura henidiamu.

¹²⁰Hidiogu e heude-heudemu, oi garimu na garimu dainai; emu hahemaoro herevadia danu na gari henidiamu.

¹²¹Vada na kara ḡoevaḡoeva, vada na kara maoromaoro; e daḡedaḡe henigumu taudia imadia ai basio rakatanigu.

¹²²Turagu ai baola; Dirava garina asie garimu taudia ba laodia ahu, basie daḡedaḡe henigu.

¹²³Matagu vada eme hesiku, emu hahemauri irohana ai, bona emu gwauhamata maoromaoro ihaḡuḡuruna irohana ai danu.

¹²⁴Emu hebogahisi heḡereḡerena ai emu hesiai tauna ba kara henia, emu taravatu ba hadibagu.

¹²⁵Lau na emu hesiai tauna; lalo-parara ba henigu, bena emu hahediba herevadia baina diba.

¹²⁶Iehova ena kara baine hedinarai negana vada eme kau, badina be haida ese emu taravatu vada e tataia utu.

¹²⁷Taunabunai emu haheḡani na ura henidia badamu, gold daenai, oibe, gold namo-hereana daenai.

¹²⁸Una dainai emu hahedua herevadia iboudiai heḡereḡeredia ai aegu na davemu, dala koikoidia iboudiai na inai henidiamu.

¹²⁹Emu hahediba herevadia na nanamo heherea; una dainai laumagu ese e badinadiamu.

¹³⁰Emu hereva ikehodia ese diari e havaraiamu, asi aonegadia taudia lalodia e hadiaridiamu.

¹³¹Udugu na haḡaiamu, na hodi dae hodi daemu, badina be emu haheḡani na ura henidia lalo-dikamu.

¹³²Ba haḡeregu, ba bogagu hisi, vaia oi ladamu e ura heniamu taudia o kara henidiamu heḡereḡerena.

¹³³Egu raka ba ha-aukaia, emu gwauhamata heḡereḡerena, kara dika ta basine biagugu.

¹³⁴Taunimanima edia daḡedaḡe amo ba hamaurigu, emu hahedua herevadia baina badinadia totona.

¹³⁵Oi vairamu diarina amo emu hesiai tauna ba hadiaria, emu taravatu ba hadibagu.

¹³⁶Iruru-matagu e aru badabadamu, badina be taunimanima ese emu taravatu asie badinaiamu.

¹³⁷Iehova e, emu kara na mamaoro-mamaoro; emu hahemaoro herevadia na mamaoro-mamaoro.

¹³⁸Emu hahediba herevadia na kara maoromaorodia ai vada o duanai, bona heabidadama idoinai Ialonai danu.

¹³⁹Lalogu siahuna ese e aragumu, badina be inaigu ese emu hereva e lalodia boiomu.

¹⁴⁰Emu gwauhamata vada e hekara toho ḡoeva; emu hesiai tauna ese e ura heniamu.

¹⁴¹Lau na maraḡi, bona vada e dadaraigu, ḡau tamona, emu hahedua herevadia asina lalodia boiomu.

¹⁴²Emu kara maoromaorodia na maoromaoro hanaihanai, bona emu taravatu na momokani.

¹⁴³Hekwarahi bona hisihisi badadia na latagu ai eme kau, to emu haheḡani na moalelaidiamu.

¹⁴⁴Emu hahediba herevadia na maoromaoro hanaihanai, lalo-parara ba henigu, bena baina mauri.

¹⁴⁵Mai lalogu idoinai na taimu; Iehova e, a haere henigu; emu taravatu baina badinadia.

¹⁴⁶Na tai henimumu; a hamaurigu, bena emu hahediba herevadia baina badinadia.

¹⁴⁷Daba do se kiniamu na tore isimu, hekaha totona na taimu, emu hereva na larodiamu.

¹⁴⁸Hanuaboi gima negana ai matagu e nogamu, emu gwauhamata baina haeroa totona.

¹⁴⁹Emu hebogahisi ai gadogu a kamonai; Iehova e, emu kara maoromaoro ai do ba hamaurigu.

¹⁵⁰Edia lalo-hadai dikadia daidiai e daḡedaḡe henigumu taudia na e raka kahimu; idia bona emu taravatu padadia na daudau.

¹⁵¹A oi, Iehova e, oi na kahira-kahira, bona emu haheḡani iboudiai na momomo-kakani.

¹⁵²Nega daudau emu hahediba herevadia vada na dibadia; vada o haginidia, bae gini hanaihanai.

¹⁵³Egu hisihisi ba itaia, ba hamaurigu, badina be emu taravatu asina laloa boiomu.

¹⁵⁴Idurugu herevana ba gwauraia, ba hamaurigu; mauri ba henigu, emu gwauhamata heḡereḡeredia.

¹⁵⁵Hahemauri bona kara dika taudia padadia na daudau, badina be idia ese emu taravatu asie tahudiamu.

¹⁵⁶Iehova e, emu hebogahisi na bada; mauri ba henigu, emu kara maoromaoro heḡereḡeredia ai.

¹⁵⁷E daḡedaḡe henigumu bona e inai henigumu taudia na hutuma, a emu hahediba herevadia amo asina raka sirimu.

¹⁵⁸Asi edia heabidadama taudia na itadiamu ai na lalogu e dikamu, badina be emu haheḡani asie badinadiamu.

¹⁵⁹Ba laloa, emu hahedua herevadia na ura henidia badamu; ba hamaurigu, emu hebogahisi heḡereḡerena ai.

¹⁶⁰Emu hereva iboudiai anidia na momokani, bona emu hahemaoro herevadia maoromaorodia iboudiai na e hesiriu hanaihanaimu.

¹⁶¹Lohia ese e daḡedaḡe henigumu, asi badina; a lalogu ese emu hereva e matauraidiamu.

¹⁶²Emu hereva na moalelaiamu, abi-dadi kohudia e davarimu tauna ena moale na heto.

¹⁶³Koikoi na inai heniamu, na inai henia badamu; a emu taravatu na lalokau heniamu.

¹⁶⁴Dina ta ta ai, nega hahitu na imodaimumu, emu hahemaoro herevadia maoromaorodia daidiai.

¹⁶⁵Emu taravatu e wa heniamu taudia na maino badana e abiamu, ḡau ta ese basine hahekwakwanaidia diba.

¹⁶⁶Iehova e, emu hahemauri na laroamu, bona emu haheḡani na badinadiamu.

¹⁶⁷Laumagu na emu hahediba herevadia e badinadiamu; na ura henidia lalo-dikamu.

¹⁶⁸Emu hahedua herevadia bona emu hahediba herevadia na badinadiamu, badina be egu dala iboudiai na oi vairamu ai.

¹⁶⁹Iehova e, egu taitai aine vasi oi vairamu ai; lalo-parara ba henigu, emu hereva heḡereḡerena ai.

¹⁷⁰Egu noinoi aine dae vasi emu ai; ba hamaurigu, emu hereva heḡereḡerena ai.

¹⁷¹Udugu bibinadia ese heimodai herevadia e gwaurai momomu, emu taravatu o hadibalaigumu dainai.

¹⁷²Malagu ese emu hereva baine anelaia, badina be emu haheḡani iboudiai na mamaoro-mamaoro.

¹⁷³Imamu na lau ikahagu baine heḡaeḡae, badina be emu hahedua herevadia vada na abidia hidi.