SALAMO 119:109-144

¹⁰⁹Nega idoinai egu mauri na imagu ai, a emu taravatu asina reaiamu.

¹¹⁰Kara dika taudia ese idoa vada e karaia, bae idoagu eto; a emu hahedua herevadia amo asina raka siri.

¹¹¹Emu hahediba herevadia na lau ahugu, ela bona hanaihanai; oibe, idia na lalogu ena moale badina.

¹¹²Lalogu vada eme heḡaeḡae, emu taravatu karadia baina kara, nega iboudiai, ela bona dokona.

¹¹³Lalo-rua taudia na inai henidiamu, a emu taravatu na ura heniamu.

¹¹⁴Oi na egu komu gabuna bona egu kesi; emu hereva na laroamu.

¹¹⁵Kara dika taumui e, egu amo ba raka oho, bena egu Dirava ena haheḡani baina badinadia diba.

¹¹⁶Ba imudagu, emu gwauhamata heḡereḡerena, bena baina mauri, bona egu helaro ai tau ta ese basine hahemaraigu.

¹¹⁷Egu imuda ai baola, bena baina mauri, bona emu taravatu baina lalodia loulou.

¹¹⁸Emu taravatu amo e raka siri taudia iboudiai na o dadaraidiamu; oibe, edia aonega na asi anina.

¹¹⁹Tanobada ena kara dika taudia iboudiai na negenege ḡaudia ai o halaodiamu; taunabunai emu hahediba herevadia na ura henidiamu.

¹²⁰Hidiogu e heude-heudemu, oi garimu na garimu dainai; emu hahemaoro herevadia danu na gari henidiamu.

¹²¹Vada na kara ḡoevaḡoeva, vada na kara maoromaoro; e daḡedaḡe henigumu taudia imadia ai basio rakatanigu.

¹²²Turagu ai baola; Dirava garina asie garimu taudia ba laodia ahu, basie daḡedaḡe henigu.

¹²³Matagu vada eme hesiku, emu hahemauri irohana ai, bona emu gwauhamata maoromaoro ihaḡuḡuruna irohana ai danu.

¹²⁴Emu hebogahisi heḡereḡerena ai emu hesiai tauna ba kara henia, emu taravatu ba hadibagu.

¹²⁵Lau na emu hesiai tauna; lalo-parara ba henigu, bena emu hahediba herevadia baina diba.

¹²⁶Iehova ena kara baine hedinarai negana vada eme kau, badina be haida ese emu taravatu vada e tataia utu.

¹²⁷Taunabunai emu haheḡani na ura henidia badamu, gold daenai, oibe, gold namo-hereana daenai.

¹²⁸Una dainai emu hahedua herevadia iboudiai heḡereḡeredia ai aegu na davemu, dala koikoidia iboudiai na inai henidiamu.

¹²⁹Emu hahediba herevadia na nanamo heherea; una dainai laumagu ese e badinadiamu.

¹³⁰Emu hereva ikehodia ese diari e havaraiamu, asi aonegadia taudia lalodia e hadiaridiamu.

¹³¹Udugu na haḡaiamu, na hodi dae hodi daemu, badina be emu haheḡani na ura henidia lalo-dikamu.

¹³²Ba haḡeregu, ba bogagu hisi, vaia oi ladamu e ura heniamu taudia o kara henidiamu heḡereḡerena.

¹³³Egu raka ba ha-aukaia, emu gwauhamata heḡereḡerena, kara dika ta basine biagugu.

¹³⁴Taunimanima edia daḡedaḡe amo ba hamaurigu, emu hahedua herevadia baina badinadia totona.

¹³⁵Oi vairamu diarina amo emu hesiai tauna ba hadiaria, emu taravatu ba hadibagu.

¹³⁶Iruru-matagu e aru badabadamu, badina be taunimanima ese emu taravatu asie badinaiamu.

¹³⁷Iehova e, emu kara na mamaoro-mamaoro; emu hahemaoro herevadia na mamaoro-mamaoro.

¹³⁸Emu hahediba herevadia na kara maoromaorodia ai vada o duanai, bona heabidadama idoinai Ialonai danu.

¹³⁹Lalogu siahuna ese e aragumu, badina be inaigu ese emu hereva e lalodia boiomu.

¹⁴⁰Emu gwauhamata vada e hekara toho ḡoeva; emu hesiai tauna ese e ura heniamu.

¹⁴¹Lau na maraḡi, bona vada e dadaraigu, ḡau tamona, emu hahedua herevadia asina lalodia boiomu.

¹⁴²Emu kara maoromaorodia na maoromaoro hanaihanai, bona emu taravatu na momokani.

¹⁴³Hekwarahi bona hisihisi badadia na latagu ai eme kau, to emu haheḡani na moalelaidiamu.

¹⁴⁴Emu hahediba herevadia na maoromaoro hanaihanai, lalo-parara ba henigu, bena baina mauri.