Sɑ̃ɑrun Woodɑ 15:18-33

¹⁸Kurɔ kɑ durɔ bɑ̀ n mɛnnɑ, be kpuro bɑ koo woburewɑ kɑ nim. Adɑmɑ kɑ mɛ, bɑ koo bu gɑrisiwɑ disigibu sere kɑ yokɑɔ.

¹⁹Tɔn kurɔ ù n yɑsɑ mɔ̀, bɑ koo nùn gɑrisiwɑ disigii sɔ̃ɔ nɔɔbɑ yiru. Wi u nùn bɑbɑ kpuro u kuɑwɑ mi disigii sere kɑ yokɑɔ.

²⁰Kpin yee tè sɔɔ u kpunɑ kpuro, tɑ kuɑwɑ mi disigiru. Ye u mɑɑ sinɑri kpuro yɑ kuɑwɑ mi disigiɑ.

²¹Wi u mɑɑ kurɔ win kpin yeru bɑbɑ, u koo win yɑ̃nu teɑwɑ kpɑ u wobure. Adɑmɑ kɑ mɛ, u ko n sɑ̃ɑwɑ disigii sere kɑ yokɑɔ.

²²Goo ù n bɑbɑ ye kurɔ wi, u sinɑri, yɛ̃ro u koo win yɑ̃nu teɑwɑ kpɑ u wobure. Adɑmɑ kɑ mɛ, u ko n disi mɔwɑ sere kɑ yokɑɔ.

²³Gɑ̃ɑ ni nu wɑ̃ɑ win kpin yee ten wɔllɔ ǹ kun mɛ ye u sinɑrin wɔllɔ, wi u yen gɑɑ bɑbɑ, u kuɑwɑ mi disigii sere kɑ yokɑɔ.

²⁴Tɔn durɔ goo ù n kɑ nùn mɛnnɑ, mɑ win yɛm mu nùn tɑ̃re, durɔ wi, u kuɑwɑ mi disigii sere sɔ̃ɔ nɔɔbɑ yiru. Kpin yee tè sɔɔ u gesi kpunɑ tɑ mɑɑ disi duurɑwɑ mi.

²⁵Tɔn kurɔ wi u yɛm wĩimɔ, win yɑsɑn sɑɑ bɑɑsi, ǹ kun mɛ, mu wĩimɔ mu win yɑsɑn sɑɑ kerɑ, bɑ koo nùn gɑrisiwɑ disigii yɛm wĩi bin sɑɑ kpuro sɔɔ nge win yɑsɑn sɑɑ.

²⁶Kpin yee tè sɔɔ u kpunɑ kpuro kɑ ye u sinɑri kpuro, yɑ kuɑwɑ mi disigiɑ nge sɑnɑm mɛ u win yɑsɑ mɔ̀.

²⁷Wi u kpin yee te bɑbɑ, ǹ kun mɛ sin yee te, u koo win yɑ̃nu teɑwɑ kpɑ u wobure. Adɑmɑ kɑ mɛ, u kuɑwɑ mi disigii sere kɑ yokɑɔ.

²⁸Sɑnɑm mɛ yɛm mɛ, mu yɔ̃rɑ u koo kowɑ sɔ̃ɔ nɔɔbɑ yiru bu sere nùn gɑrisi wi u dɛɛre.

²⁹Yen sɔ̃ɔ nɔɔbɑ itɑse sɔɔrɑ u koo kpɑrukonu yiru ǹ kun mɛ totobɛrɛnu yiru kɑsu kpɑ u kɑ yɑ̃ku kowo dɑɑwɑ Gusunɔn kuu ten kɔnnɔwɔ.

³⁰Kpɑ yɑ̃ku kowo u nin teu suɑ u kɑ torɑrun suurun yɑ̃kuru ko kpɑ u mɑɑ teu geni suɑ u kɑ yɑ̃ku dɔ̃ɔ mwɑɑrɑrugiru ko. Yen biruwɑ u koo kurɔ wi dɛɛrɑsiɑbun wororu koosi Yinni Gusunɔn wuswɑɑɔ kpɑ u dɛɛrɑ.

³¹Yinni Gusunɔ u kpɑm Mɔwisi kɑ Aroni sɔ̃ɔwɑ u nɛɛ, i Isirelibɑ sɔ̃ɔwɔ i nɛɛ, bu de bu kɑ nɛn kuu te tɑ wɑ̃ɑ ben suunu sɔɔ tondɑ sɑnɑm mɛ bɑ disi mɔ kpɑ bu ku rɑɑ gbi.

³²Woodɑ yeni yɑ wɑ̃ɑwɑ kentugibun sɔ̃ kɑ wìn sen nim mu yɑri

³³kɑ tɔn kurɔ wi u yɑsɑ mɔ̀ kɑ tɔn durɔ wi u yɛm wĩimɔ win tɔn durɔrun di kɑ tɔn kurɔ wi yɛm wĩimɔ win tɔn kurɔrun di kɑ mɑɑ tɔn durɔ wi u kɑ tɔn kurɔ disigii kpunɑ.