Sòm 25:1-22

¹Se yon sòm David. Seyè, m'ap fè lapriyè m' moute devan ou. Bondye mwen, se nan ou mwen mete tout konfyans mwen.

²Piga ou fè m' wont, pa kite lènmi yo pase m' nan betiz.

³Wi, moun ki mete konfyans yo nan ou p'ap janm wont. Men, moun ka soti wont yo, se moun k'ap trayi ou pou gremesi.

⁴Seyè, fè m' konnen jan ou vle m' viv la! Moutre m' nan ki chemen ou vle pou m' mache a!

⁵Moutre m' sa pou m' fè pou m' viv yon jan ki konfòm ak verite ou la, paske se ou menm ki delivrans mwen. Se sou ou mwen konte tout jounen.

⁶Seyè, chonje jan ou gen kè sansib, chonje jan ou renmen nou depi nan tan lontan.

⁷Pa chonje peche ak fòt mwen te fè lè m' te jenn. Seyè, jan ou renmen m' sa a, jan ou gen bon kè, tanpri, pa bliye m'!

⁸Seyè a bon, li pa nan patipri, li moutre moun k'ap fè sa ki mal yo jan pou yo viv.

⁹Li pran men moun ki soumèt devan l' yo, li fè yo mache nan bon chemen an, li moutre yo jan li vle pou yo viv la.

¹⁰Moun ki kenbe kontra li fe ak yo a, moun ki obeyi kòmandman l' yo, li fè yo wè jan li renmen yo, jan li p'ap janm lage yo.

¹¹Seyè, poutèt non ou pote a, padonnen peche m' yo, paske yo anpil.

¹²Si yon moun gen krentif pou Seyè a, Seyè a va moutre l' chemen pou l' pran.

¹³L'ap toujou gen kè kontan. Pitit li yo va pran peyi a pou yo.

¹⁴Seyè a, se zanmi moun ki gen krentif pou li. Li fè yo konnen kontra li pase ak yo a.

¹⁵Se sou Seyè a m'ap gade tout tan, l'ap delivre m' lè m' nan move pa.

¹⁶Seyè, vire je ou bò kote m'. Gen pitye pou mwen, paske mwen pou kont mwen, mwen san fòs.

¹⁷Pa kite m' ak kè sere sa a. Wete m' nan tray m'ap pase a.

¹⁸Gade nan ki mizè mwen ye! Gade jan m'ap soufri! Padonnen tout peche m' yo.

¹⁹Gade tout kantite lènmi mwen genyen! Gade jan yo rayi m', jan y'ap pousib mwen.

²⁰Pwoteje m' non! Delivre m' non! Piga ou fè m' wont, paske se bò kote ou m'ap chache pwoteksyon, se anba zèl ou mwen vin kache.

²¹Fè m' viv yon jan ki san repwòch. Fè m' mache dwat pou ou ka pwoteje m', paske tout espwa mwen se nan ou li ye.

²²O Bondye, delivre pèp Izrayèl la anba tray l'ap pase yo.