Psalms 25:1-22

¹(David ko wur) O Yawe, aninga Kaem, ani nikate la ira sanamasam.

²Aninga angamang motam nikate la bita lagasam; ni aninga sangaru se aga kager kari me agarak kapamon ale dolara aisimonko.

³Awiriya noko ikia nikate la bita lagoso, mu me ta dolurukko; bare kariimet awiriya kawel munan te lagasan mu dolomonko.

⁴O Yawe, nika munan ningo aga kasuru ale nika lage ningo aga kasuruko.

⁵Nika den nunguning te aga kiti gurugu ale ikia sinar aisko, mu awuk, ni aninga Kaem se aga Saonga Kari; ani kowarkalal maiya nika ko amotam bita lagasam.

⁶Nika gemang lila se nika kua nangara, girakala la bita lagasam, mu ko kamili me saparukko.

⁷O Yawe, aninga kulak te munan memek beterem, ale asupuling lagara ko kiwem beterem, mu ko kamin me tugumko; nika ningo, se nika kua nangara ko munan mu te ago ko iki ale aga sangaruko.

⁸Yawe mu ningo se diram la; se nu kariimet memek bitawara mu, nu noko munan nunga kasurso se nuna karo tusan.

⁹Nunumi karogo kapara ko kariimet mu, nu nunga kiti guruguso ale munan diram mu nunga kasurso se karo tusan.

¹⁰Kariimet noko den balam mu karo tusan mu, noko munan mu yawarakala se diram la nongote bita lagoso.

¹¹O Yawe, nika nip biya mu ko ningo ko, aninga memek duap duap suen la mu siwu aisuko.

¹²Kariimet awiriya Yawe bowa ningi la bagasan, mu nu lage ningo nunga kausok se nuna karo tumonko.

¹³Nuna daiga bagara ningo arigimonko, se nunga kuriang gue ali imi te terong baga lagamonko.

¹⁴Se nuna munan umu te Yawe nunga balso noko tiran ningo maso, ale noko den nongorak kaolam mu nunga kasurso.

¹⁵Aninga amotam mu Yawe kote la loaga lagasam, mu awuk, nu kota aninga sanguk se dagarok memek mu kiarikko.

¹⁶O aga Biya, gemang aisu ale kema gurugu aisuko, mu awuk, ani angimik saonga bo mena se angimik sokel menaram.

¹⁷Aninga angamang motam ko ikup mu lagaram, se ikup mu te aga sangaru se angimik guyak arukko.

¹⁸Aga angamang yaman se angamang ikup agarak gi ale aga memek suen la siwu waruko.

¹⁹Arikko! Aninga kager kari mu suen biya nunguningkiri! Nuna nunga ikia te ani ago ko nongomang ninguru tala magoso!

²⁰Se ni aga sangaru to ale aga bitaru se dolara me aisimonko, mu awuk, ni aninga yumura kuwim.

²¹Munan ningo se munan diram mu te aga sangaru, se ani te sokel ago sanamarikko, mu awuk, ani nikate la amotam bita lagasam.

²²O Kaem, ni ka kariimet Israel nunga ikup suen la te nunga sangaruko!