Ruma 8:7-15

⁷Ngala li-mangaji nalarrku, jalinyamba-yurruj urrumanji nyamba-nykalanykarrinjarra mijanganthawu nuwarnu-wardiyu, jalini li-nganji yiku ki-Kada, barranamba li-yinjatha yiku. Jalu-ngajbirrinji nuwarnu-yuwawu ki-Kada, kurdardi kalu-ngayangayarrinjima nuwu-mangaji nuwarnu-yuwawu, kulu kurdardi kalu-ngayangayarriyu.

⁸Alunga liyi-mangaji kurdardi kumba-riyarrabanjima Kada, barnikumba-riyarrabarru alunga liyi-mangaji.

⁹Ngala yirru, kurdardi kirrima barranamba li-mangajiwuthu, waraba kirrinyamba-nykalanykarrinj ima nuwarnu-wardiyu yurrngumantha ngala jirra-nykarrinji Na-ngawulu Kada yurrngumantha kangka nya-mangaji Na-ngawulu jiwini yirruwa wurdulula. Namba bajalu nalarrku, bardabarda yiku nyuwu-mangaji Nuwa-ngawuluwu ki-Kada, bardabarda yiku Nuwa-ngawuluwu ki-Jijaj Kurayij, nya-mangaji Na-ngawulu arrkula, namba nalarrku jalini bardabarda yiku nyuwu-mangaji, kulu waraba barra kalima likungu ki-Jijaj, kurdardi barra likungu.

¹⁰Ngala ngambala, marrirru, namba Na-ngawulu Jijaj Kurayij jiwini wurdulula ngambalaa, kulu ngambala-ngawulu kambala-nama lhungku, ngambala-ngawulu kambala-nama lhungku ngambala-yurrngu, kangka kambalilu-yibarra ki-Jijaj, kambalilu-yibarra ngambala nmanthawu barranamba yurlurr yiku ki-Kada, ngala minja ngambala-manka kambalamba-mirrala, minja kambalamba-mirrala kangka nuwarnu-wardiyu ngala ngambala-ngawulu kambala-nama lhungku.

¹¹Jijaj Kurayij, kumba-mirra ngala ki-Yijandu ki-Kada kilu-lhungkuma, kilu-lhungkuma nya-mangaji ngabangaku. Namba jiwini wurdulula ngambalaa Na-ngawulu Kada, namba jiwini mankanda ngambalaa nganinyanga ngalingambala li-lhungku, kulu kambalilu-lhungkumala ngambala ngambala-ngabangaku baku ngulakari. Kambalamba-mirrala ngala baku ngulakari kambalilu-lhungkumala ki-Kada, kambala-wingkala ngambala ngambala-lhungku li-mankawiji namba Na-ngawulu Kada ngambalaa jiwini mankanda nganinyanga.

¹²Marrirru, kangka kambalilu-ngunda Na-ngawulu nganinya, kulu kurdardi kambalamba-nykalanykarriyu mijanganthawu nuwarnu-wardiyu, kurdardi kambala-wingkarru nganinya, kambala-wingkayanama yabi yiku.

¹³Namba kambala-wingkayima wardingala, namba kambalamba-nykalanykarrinj ima mij anganthawu wardimanthawu yurrngumantha, kulu kambalamba-mirrala bawuji. Namba kambala-wingkayima nykarrinjarra yiku Nuwa-ngawuluwu ki-Kada, namba kambala-ngayangayarrinjima nya-mangaji baki kambalamba-ngarrarnmanjima wardiman thawu, kulu kambala-nama lhungku ngambala-ngawulu ngambala-yurrngu.

¹⁴Kangka ngambala wumba jambalamba-wirringundayi yiku Nuwa-ngawuluwu ki-Kada, ngambala li-jawina likungu, mili jambalini likili-ardu ki-Kada, wurrbi likili-ardu.

¹⁵Na-ngawulu ki-Kada, jiwini marringaya, kurdardi kambalilu-wardimanjima ngambala-wurdu ngambala wardankayawu ki-Kada yurrngumantha, ngambala nyamba-nykalanykarrinj awu yiku ki-Kada ramanthawu ngambalanga, ngala minja jambalilu-yibarranji ngambala nmanthawu likili-ardu ki-Kada. Kulu nya-mangaji Na-ngawulu, jilu-yunduyundumanji Kada ngambalanga ngambala-wurdu, nya-mangaji Yijan nyangambalanga-biyi, ngambala nyamba-lhawarrmanthawu yiku, “Biyi! Wunyatha!” Nganinya barra ngambala, jambalini mirdan ngambala-wurdu, jambalini likili-ardu ki-Kada.