Ruku 2:24-38

²⁴Mwi entara e Kotira nraamwuqi uro ntera nyaamwa taaratana minrunra voti hira mwinranro Kotirani qiaqaa kyairaro itamwa taiqa kyaarive, tura. Mariaakya Iosepikya mwi quara rieqatama Ierusaremini vura.

²⁵Ierusaremini uro varuvaro mwini vaisi mpo Simioniva varura. Mwi vaisiva avuqavuma kyero nrohiqaro Kotira nrutu tuaahere varuva variqaro mwiva Isareri mwatanaahuaqa ntaqikyiani vaisirara taqe varura. Taqe varuvaro Kotira mwanraquravanto mwiavata variqaro

²⁶vuni mwia timwa mwinro tiqaro, E hia qati qutu vinanrave. E nronravanto titaani vaisira, Mesaiaa mwia taqera qutu vinanrave, tura.

²⁷Kotira mwanraquravanto mwitaa tuvaro Simioniva varuvaro mwi entara Kotira mwanraquravanto mwia vitero Kotira nraamwuqi vuvata Iesusira nrohua qohua nkyiari mwaanra qua rieqatama Iesusira vita vareta Kotira nraamwuqi vuvaro

²⁸Simioniva nraaqiara mwia taqero mwia kyavuhu kye tutero Kotira nrutu tuaaherero tiqaro,

²⁹Nronrao, e haaru turava mate qutaama qovarama viho. E qioma ni ena kyaiqa vaisi titairaro ni mutukyaqitairo kyuqe hiraqe quankye.

³⁰Ekyaa mpo mwatanaa mpo mwatanaahua taqaate tira, e tiri kyaahaqa hianinra mwia titaarana nte mate ntena puqotaina mwia taqauqo.

³²Mwiva omwa votima kyero itamwaqiro vi varirata nkyiariara qumina mpo mwatanaa mpo mwatanaahua i okyara ntapihi kyeta taqevarave. Mwi vaisiva i nraakye qora Isareri kyaahaqa hiraro mwihua nrutuvanto nronraqa hiarive, tiro.

³³Simioniva mwitaa tuvata Iesusira nrohua qohua airi nraato tita tiqata, Qikye, nanra quave mwiva Iesusirara tiho? tuvaro

³⁴Simioniva Kotirara aakyara ntero tiqaro, E mwitanahuavata mwihua nraaqiara mwiavata kyuqema nyataante, tiro. Timwa kyero mwiva mwia nronra Mariaara timwa mwinro tiqaro, Riaante. Kotiva titai nraaqiarava mwaava varirata Isareri vaisi mpo nramwuvanto mwiaqaatai tumu ntita uaqiama vi varivata mponramwuvanto mwia qamwata mwateta mwihua sivita kyuqema varivarave. Kotiva nai okyara nraakye qoravanto taqaate tiro, nraaqiara mwia titaiva varirata nraakye qora airivanto mwia qoririma mwatevarave.

³⁵Nraakye qora airivanto vu nraato tutera mwiva qovarama kyaananrove. E variraro nraamwunruqa taari inraikyava paipa voti hiariva i mwutukya ruananrove, tiro.

³⁶Simioniva Mariaarara mwitaa tuvaro poropeti nraakye Kotira qua qovarama kyeqaro timwa nyi varu nraakyeva Anaavavata varura. Mwia qova Panueriva Asara okyaravanto varura. Anaava qoraisi varatero 7 ihi vara kyovaro

³⁷mwia vaativanto qutu vuvaro mwiva mwiaqaatairo tetoqaqama kyero variqiro viro kyontaqama viro airi ihi 84 ihi vara kyero, mwiva mpo enta mpo enta Kotira nraamwuqi uro nteqaro entaqivata, iheravata, Kotira nrutu tuaahereqaro kyara aurama tero Kotirara aakyara ntamwaqiro vi varura.

³⁸Mwitaa huvara tiro, mwi entara Anaava Kotira nraamwuqi vera ntero Iesusira taqero nraaqiara mwianra rieqaro Kotirara kyuqeve tura. Mwitaa tuvata mpo uhua mwini varita Kotiva mwihua kaahaqa hirata Ierusaremiqi kyuqema varirara vekya varura. Mwi nraakye qorahua varuvaro Anaava Iesusira okyarara mpo qua mpo qua mwihua timwa nyunra.