LUCAS 2:24-38

²⁴Lex wa men waron xgoon men zegne re lo xley Dëdyuzh: tsasan men txup ngug o txup mëër.

²⁵Cheguin ke wuu te mén ne la Simeon gyëz-Jerusalén. Xnëz wbán men, kesentyent wzaknon men Dëdyuzh; kambë́z men kwii men men ne yselaa men-Israel lo dol. Laa Espíritu Sant raknonen men,

²⁶por laa Ne waknan men ne guetetgue men axtegue ne kwii men XeCrist Dëdyuzh.

²⁷Laa Espíritu Sant wguu lextoo men ne wa men lenxeydoo Dëdyuzh chene wano ke xegwzan Jesus Jesus lenydoo chen ylaa xegwzan Jesus zegne zëëd lo ley.

²⁸Lex wnëëz Simeon ne, wlen men ne, wzelo men rdee men dexkyizhtee lo Dëdyuzh, re men:

²⁹Dëde, orree si betre tsadet lextoo noo, che zak ydee de si guet noo, porke che wlaa de ne na de lo noo ne nak noo men ne rlaa xdxiin de.

³⁰Porke le noo che wii zhan ne yselaa mén lo dol,

³¹zhan ne wxaal de lo yrandxee mén ne nuu ydendxee gyëzlyu.

³²Laa zhaa nak bnii ne yzenii lo yrandxee mén ne nakdet men-Israel, no laa zhaa nak gyelenzoon por men-Israel ne nak xpén de.

³³Wzee wzak Xeb yrup Xeb xnaa Jesus por yra ne re Simeon por laa ne.

³⁴Lex wsan Simeon men ledxnya Dëdyuzh yra men mëëd guin, re Simeon lo Mli xnaa ne: ―Mëëdree che nunla ne ne ndal men-Israel ylaleedxdet ne, per ndal ke men ylaleedx ne. Zëëd ne zëdzëët ne ne rlaan Dëdyuzh, per ndal mén ylaandet ne yzëët ne.

³⁵Zenga gyakbeey pezee rlebleedx te te mén. Per le laa de sak de zegnak chene raaz te spad lextoo mén chene le yra neree gak.

³⁶Nga lenydoo guin zu te wnaa ne che kesentyent gol ne nak profet. Ana la men, xsaap Fanuel nak men, xnëz Aser zëëd men. Menyundxee men chene wtsëlnya men; guedxegue iz wbán men yrup men xemgyeey men.

³⁷Che wzaa taplalno-tap iz wet xemgyeey men, no axtegue rruudet men lenydoo, dxe gyëëltee rnab men lo Dëdyuzh, rkwan men rudet men.

³⁸Laatee orguin wbig men wdee men dexkyizhtee lo Dëdyuzh. Wluzh nga wzelo men wzëët men xkwent mëëd guin lo yra mén ne kambë́z ne yláá men-Jerusalén.