Ruk 10:34-41

³⁴Hinhina isip mara ohe duupnong aprisa gapah han ihir ma ina mong mong suta ohe batbet oh ha pang hatinoh rim orhe wer sano wain tom gap sano oh dar amongopri. Amorpat aban deingopri. Aban deipat tapama orhe donki basnong deipat apteinong pangopri. Pasa iraire kakun sus timapti han ire apnong oh mara den pandemo paptema timatiri.

³⁵Timorimdapat kutwi mong da hatporhan oh saporim mani tan yot tit dara ap wamat pat han ohnong Ohe ap ma indiproh ohe ap yano den pandiproh ohe yano oh mama napir ohmur. Ihan go ohnonghe pomat papindinmur. Pomat papatina yan oh tit hatip hahhanhe noh it apris yan napripramur pora yan apris sangopri. Ihtipari pongopri.

³⁶Giporpat sawa mengnong am hat pat han ohnong Gin arwananah ire danong ham ma bopor deipti da oh gin mama yitir han maihir de han oh ihtin dasi hat apris gapah han ihir rum hemat itiri han ohnong ambur yah matipo. Go ritino pongopri.

³⁷Potporhan sawa mengnong am hat pat han oh Ohra hanip ohnong ma hinhina mar panggeitip han oh ama han orhor ihtin dasi ham ambutipmur pongopri. Potporhan Ihan ohe ma mahaw goshat pati han ohnong hinhina mar ma panggeitipru hat orhor gohe ihirnong hinhina mar yahwi mar panggeit pisashenmur pongopri.

³⁸Gahan Jisas oh orhe pinggit pisapat han ihirsi irair susa Mata uhe pat aptei oh kotpari. Kotperhan uh Gin nohe apnong sus den damo hatiprohemur por ambur pisangopri.

³⁹Ambur pisusa uh den tendeipatin arwap Maria uh Jisas oh ihirnong meng am deipat ohe meng oh amratporo rim ohe tong duup oh tongnoma meng amrat angopri.

⁴⁰Meng amrat patin Mata uh Maria uh nohnong na napanggeipat moho. Noh norhap den temaro ruumsan tamreipat moho daham da er hapat apris Jisas ohnong Hanipyaha. Uh nohnong na napanggeitporhan noh norhap tamreipat moh go kinham na dahapat. Ihan daham Go uhnong panggeitina potinmur pongopri.

⁴¹Potporhan Hanipyah oh We. Kora kora. Go tihan tihan danong oh ham da ruumsup hatipra.