Romans 5:2-11

²Nil God.an kan-ngul ngangk minangam iiy-iiyan ngampar, aꞌ ngamp yimanangana ngangk minangam ngul iiy-iiyanampa, puth ngampan meeꞌmiy nil God.angan ngulan kalow ngampang aak nungantangan wun-wunāmpa.

³Inan thampa, nungkway aak wayan nath wampow ngampar-a, ngampan puth ngangk minangam iiy-iiyāmpa, nil puth God.angan ngangk ngul thay-thayanathow ngampang.

⁴Ngamp kan-ngulan ngangk thayanaman iiy-iiyanampan-a, an ngampa min-minam ngul iiy-iiyanampa. Puth thon ina, ngampa meeꞌmiy ngula nil God.angan ngulan ngampang kalow aak nungantamakana.

⁵Nilan ngampang keꞌ monkan-thenchiy ngampang, yaꞌa, nil ngampangan kan-kanam ngul kalow aak nungantamakana. Ngampan meeꞌmiy nilan kan-kanam kaangk paththam wunan ngampar, nil puth Ngeen-Wiy Min nungantamana kuchan ngangk ngamparamangan wun-wunow.

⁶Ngamp keꞌaman yippak God.an ngangkangaman piꞌ-piꞌampan-a, ngampiya way anman yump-yumpampa, keꞌ minan iiy-iiyimp-a, an puth yaꞌangama. Aak anan kan-ngul wampant-a, nil God.angan miꞌa, nil Christ an-aniyangan utham pam wanch way il-ilantan ngampara.

⁷Nil puth weeꞌ kaangk uthamowan e? pam min alantamaniy e? aak nungantamangan e? An yaꞌ natha! Nath pam thonam puya nil kaangkan uthamowana pam min paththam alantamana, yaꞌ natha.

⁸Puth nungkway ngampana way anman iiy-iiyamp-a, nil Jesus Christ.an utham ngampara, anpalana God.angan meenath ngampar nil kaangk paththam wun-wunan ngampar.

⁹Nil puth Christ.angan chaapar nungantaman theetath ngampar, amanam ngulana nil God.angan way ngamparaman keꞌ-ngul ngaantam-ngeey-ngeeyow, inan thampa nil kan-kanaman ngampang keꞌ kuchiy aak nungantam anpalana.

¹⁰Ngamp kaꞌathaman wayan yump-yumpamp-a, an ngamp God.an ngangk kul yump-yumpamp nunangana. Puth nungkway ngamp wayan yump-yumpamp-a, nil God.angan nhengk nungantaman kuch nunang uthamowan ngampar, nil yipam way ngamparaman keꞌ-ngul ngaantam-ngeey-ngeeyow. Aꞌ nil Jesus Christ.an mulaman eka, anpalmana, ngamp kan-kanam ngul ngaantam-ngeey-ngeeyanamp nunang God.an nil ngulana an min-minam piꞌ-piꞌow ngampang aꞌ aak nungantang ngulan wun-wunāmp.

¹¹Aꞌ putha inan thampa, ngampan piip God anman thaaꞌ-kuump-kuumpanampa, puth nil Jesus.an utham way ngamparamakan aꞌ nil God.ana kan-ngul kon-ngath nunang way ngamparam anangan, nil ngurp min nungantam ngul yump ngampangana.