Romans 16:3-10

³Heia laa dagu hagaaloho gi Priscilla mo Aquila, go ogu ihoo hai hegau gi Jesus Christ,

⁴ala gu de hagahuodia nau mouli i di au. Au e danggee gi meemaa, hagalee ko au hua, gei nia nohongo dabu digau tuadimee huogodoo ala i golo labelaa.

⁵Dagu hagaaloho labelaa ang gi nia gau daumaha ala e dagadagabuli i di nau hale. Dagu hagaaloho ang gi dogu ihoo hagaaloho go Epaenetus, tangada ne daamada ne hagadonu a Christ i Asia.

⁶Dagu hagaaloho ang gi Mary dela nogo ngalua hagamahi adu gi goodou.

⁷Dagu hagaaloho labelaa ang gi Andronicus mo Junias, nia daangada o Jew ala nogo i gimaadou i lodo di hale galabudi. Meemaa guu hai nia daangada e modongoohia ai digau agoago hagau, gei meemaa guu hai nia dama a Christ mai hua i ogu mua.

⁸Dagu hagaaloho ang gi Ampliatus, dogu ihoo i mau hagadaubuni ang gi Tagi.

⁹Dagu hagaaloho ang gi Urbanus, tadau ihoo hai hegau gi Christ, mo Stachys, go dogu ihoo hagaaloho.

¹⁰Dagu hagaaloho ang gi Appeles dela guu donu dono hai hegau gi Christ. Dagu hagaaloho ang gi digau di hale o Aristobulus.