Romanos 3:16-24

¹⁶Baini kaire kwian joge ngwadi kwian ene age me no daba na ole, kwian ene daba na gbe ta olire tanre boi daga ngwale.

¹⁷Kwian ene diali tañachuge age me no alin giti daba na ole, kwian ene ni tañachuge sidri daba na ta gbe nga suga no giti.

¹⁸Kwian ulita age me no ene, kwian ulita ene me mo ta dbe kwachie Chube ngeru ama kle age giti.”

¹⁹Chube gerua degaba unsuialin gerule ene kwian ulita giti, geru e jo degaba che kwian israelita ulita alin, geru e giti chke uñale che kwian israelitage kwian israelita me israelita ulita agenga me no, ulita jiske Chube gwage, ene ni kwian gdaite ñage gerule: “Cha me agenga me no, cha me jiske Chube gwage.” Ulia kwian ulita agenga me no, kwian ulita jiske Chube gwage.

²⁰Moisés nu Chube gerua degaba kwian geru e gai dage, kwian age geru e gerule kare, e alin allabi giti ni kwian gdaite be chege no trate Chube gwage, e giti kwian mi tien gitiru ji chugege ama age me no gdale, geru e jo degaba che ulita alin ta gbagda, ene chke uñale chege che kwian ulita agenga me no.

²¹Nege uñale trate che ulitage Chube kwian jwen siere mine ji chugege kwian agedu me no gdale, ene kwian chege no trate Chube gwage. Moisés nu Chube gerua degaba gerule no e giti, kaire kwian Chube gerua ketanga nu Chube gerua degaba gerule no e giti, geru e ulita no, agwa uñale trate chege kwian me chege no trate Chube gwage age Moisés chadalla alin gerule kare giti, me ene,

²²Jesucristo alin giti Chube kwian jwen siere ji chugege kwian agedu me no gdale, kwian ulita bai kaire mo ta gbe Jesucristo gai ulia mo tale, kwian ene ulita israelita me israelita chege no trate Chube gwage.

²³Kwian israelita kwian me israelita ulita agenga me no, ni kwian gdaite age no trate ulita diali Chube takalin kare.

²⁴Kwian agenga me no agali me ñage age lle gwealege ene ama tien gitiru ji chugege ama agedu me no gdale ene ama no trate Chube gwage. Chube ta du no kwian ulita alin, malen Chube Jesucristo kagu kwian ulita alin, Jesucristo jokeda kwian ulita alin kwian agedu me no giti, ene kwian mo ta gbe Jesucristo gai ulia kwian ene tien gitiru ji chugege ama agedu me no gdale, kwian ene chege no trate Chube gwage, Jesucristo giti Chube gwage kwian enedi kwian me agedu me no kare. E giti ñage suge kwiange Chube kwian ulita gbe jiske kwian agedu me no gdale, agwa kwian bai kaire Jesucristo gai ulia, Chube kwian ene jwen siere ji chugege age me no gdale. Unsuialin nga unsuialin Jesucristo bebi chie chuiage Chube ta du no kwian toidu e suiale ole kaire, kwian e agedu me no Chube me skochiu blike ama ole, Chube taidu dage amage malen Chube me ji gbu blike kwian alin kwian agedu me no gdale.