Roma 11:12-34

¹²Manggaledok so, nae, hataholi Yahudi la laꞌolena hata fo ndoos. Huu ndia de hataholi feꞌe kala leme basa daebafok katematuan mai, fo bisa lameda Manetualain dale malolen. De, hataholi Yahudi la, laheni lalan seli. Tehuu ndia ana tao nala hataholi ta Yahudi la hambu nanala inahuuk. Naa, doo-doo, fo mete ma basa hataholi Yahudi la boe malole fali lo Manetualain, na, ndia malolen lena bali!

¹³Naa! Au sangga afada ei hataholi ta Yahudi, leoiak: Manetualain nadenu au so, fo au laꞌo uu afada ei, laꞌeneu Ndia Hala Malolen. Huu ndia de au mbalak au eing, fo akalalaꞌok ues ia, fo lolen ana seli.

¹⁴Te mete ma au akalalaꞌok ues ia no malole, na, nafo au tao ala au hataholi Yahudi nggala mesa kasa ala dale hedi, losa sila luma hambu sodak leme sila sala-singgo nala mai.

¹⁵Faik fo Manetualain timba heni Ndia hataholi Yahudi heheli nala, na, ndia soi dalak, fo hataholi feꞌe kala ala hambu lelak, fo bisa ala maso dadik leu Manetualain hataholi nala. Tehuu, leo ala mole-dame bali lo Manetualain, na, ndia malole hiak. Te ndia sama leo ala lasoda fali, leme sila mamaten mai!

¹⁶Haꞌi conto neme hataholi mana sangga tao loti. Mete ma ana haꞌi nala hade uu fa, fo feen neu Manetualain, na dei fo loti katemak ndia boe, dadik Manetualain enan fo malalaok. Ma mete ma hataholi fee ai huuk okan esa, fo dadik neu buna-boa sososak, fo feen neu Manetualain, na, dei fo ai ndia katemak boe, dadik neu Manetualain enan fo malalaok.

¹⁷Au nau akasasama hataholi nusa Yahudi no ai setun fo nasoda nai osi. Manetualain beta heni ai ndia ndanan luma. Tehuu ei ta Yahudi la, sama leo setun fui. Basa de, Manetualain beta nala ei ndanan luma, de nakadiditan neu ai manai osi ndia dalek. No leondiak, na ai manai deak, simbok nala ndia sodan neme ai manai dalek. Ndia sama leo ei ta Yahudi la, de simbok mala Manetualain dale malolen, fo teteben Ana sangga feen neu Ndia hataholi Yahudi nala.

¹⁸Tehuu, mata neuk bou! Boso koao, huu ei duduꞌa mae ei mima deak mai ndia, malolen lena neme ndanak fo Manetualain beta heni sala so! Mete ma o nau sosoꞌuk aok, na boso mafalende henin, te kada o ndanak esak! O ta ndia tao matea ai ndia. Te, okak ndia ana tao nala ai ndia dadik natea!

¹⁹Fama o sangga mae, “Manetualain beta heni ndanak esa neme ai fo nasoda nai Ndia osin dale, fo ana nakadidita falik au nai ndia, fo nggati neu ndana laak”.

²⁰Ndia tetebes. Tehuu boso mafalende henin, mae, Manetualain beta heni ndana kala sila, huu ala ta lamahele neu Karistus. Ma o nggati sala, huu o mamahele neu Ndia. De, boso koao! Malolenak o mata neuk, ma boso tao mata-matak!

²¹Te hataholi Yahudi la, sama leo ndana isi-isik fo moli nakahuluk. Tehuu Manetualain ta ela sala lahele lala dook lai ndia. De, mete ma o ta mamahele makandoo neu Ndia, na boso mamahena Ana nau ela o mahele nai ndia!

²²De, ei musi duduꞌa neulalau dei. Manetualain dalen malole. Tehuu Ndia boe nalelak fee huhuku belak. Dei fo Ana huku hataholi fo mana tudak, fo ta nau malole no Ndia. Tehuu soaneu ei hataholi ta Yahudi la, Manetualain natudu Ndia dale malolen neu ei, sadi ei nanambaꞌak nakandoo mia Ndia, ma feen lelak fo ela Ana tao malole fee ei. Tehuu mete ma ei ta feen lelak fo ela Ana tao leondiak, na Ndia boe oo nau beta nggali heni ei mima Ndia huun mai.

²³Leondiak boe no hataholi Yahudi la. Mete ma ala hondak, fo mulai lamahele neu Karistus, na dei fo Manetualain nau nakadidita falik sila neu ai huu isi-isik ndia. Te Ndia naena koasa, fo bisa tao leondiak!

²⁴Te ei fo hataholi ta Yahudi, sama leo ndanak neme ai setun fui, fo makahulun ana moli aon nai osi deak. Mae ai fui feꞌek mesa kana ma ai manai osi mesa kasa feꞌe, tehuu Manetualain hele nala dua sala, fo Ana nakadidita kasa neu ai setun huun malole, fo Ana selen nai Ndia osin. Te mete ma hataholi ta Yahudi bisa dadik leondiak, na, nakalenak hataholi Yahudi la. Ndia bisa lena bali, mete ma Manetualain nakadidita fali kasa leu ai la huu dadadin.

²⁵Tolanoo kala malai Roma! Au afada dedeꞌak namaninok neu ei, fo ei boso koao, mae ei malelak. Leoiak: hatematak ia, hataholi Yahudi la dale batuk, ma tala nau lamahele neu Karistus. Tehuu ala ta leondiak lakandondoo henin. Tungga Manetualain hihii-nanaun, basa hataholi ta Yahudi la, fo Manetualain hele nala sala so, musi lamahele leu Karistus dei. Mete ma sila dedesin nala manadaik, na bei fo hataholi Yahudi la boe lamahele neu Ndia boe.

²⁶De, mete ma fain ndia losa so, na, dei fo Manetualain fee sodak neu basa hataholi Yahudi la leme sala-singgo nala mai. Ndia sama leo nana sulak nai Susula Malalaok so, nae, “Dei fo hambu Hataholi esa mai, fo tao nasoda ita teme soe mai. Ana mai neme lete Sion, nai kota Yerusalem. Ndia dei fo tao Yakob numbu-sadu nala ala hondak. Ala musi hondak, huu ala lasoda ta mbali Au, ma ala heok lasadea Au dala soda ndoong.

²⁷Au nau koka heni sila sala-singgo nala. Te Au mbaꞌa heheluk ua sila leondiak”.

²⁸Neu faik hataholi Yahudi la lamanene Karistus Hala Malolen, na, ala tao ao nala leo musu, fo laban Ndia. No leondiak, na, ala fee lelak neu ei fo ta Yahudi la! Mae leondiak, tehuu Manetualain bei sue sala, huu Ana sue sila bei-baꞌi nala, ma Ana hele nala sala fo dadik neu Ndia hataholi nala.

²⁹Te mete ma Manetualain fee heni hata esa, na Ana ta hela fali kana. Ma mete ma Ana noke nala hataholi so, fo maso dadik Ndia hataholin, na Ana ta husi heni sala bali.

³⁰Makahulun, ei hataholi ta Yahudi la ta nau mamanene neu Manetualain. Tehuu hatematak ia, ei mana simbo Manetualain namemeda kasian, huu hataholi Yahudi la fo ta nau lamanene Ndia.

³¹De, hatematak ia, sila ia, ta tao tungga Manetualain hihii-nanaun. Huu ndia, de, Manetualain bei nau natudu Ndia namemeda kasian neu ei. Ma dei fo, Ndia boe nau kasian neu sala bali.

³²Hatematak ia, Manetualain suli hataholi Yahudi la, na, sama leo hataholi ta Yahudi. Te sila basa sala, ta tao tungga Ndia hihii-nanaun, sama leo sila nana longgak, de ta bubuluk dala kaluan. Ana ela sala leondiak, fo bisa natudu namemeda kasian neu basa hataholi la.

³³Manetualain malelan ana seli! Ma Ndia boe pake Ndia malelan, fo tao dedeꞌa malole. Ta hambu hataholi bisa nalelak tebe-tebe Ndia. Ta hambu hataholi ana bubuluk tebe-tebe Ndia nakeketu dedeꞌan. Ta hambu hataholi esa boe bubuluk, hatina de Ana tao dedeꞌak esa.

³⁴Ta hambu hataholi esa, bubuluk tebe-tebe ita Lamatuan duduꞌan. Ta hambu esa boe, fo bisa nanoli-nafada neu Ndia.