Rom 7:10-19

¹⁰Iwe, üa mäla. Itä ewe allük epwe aworato manau, nge a chök aworato mäla ngeniei.

¹¹Tipis a küna eu fansoun mi fich, o ren ewe allük tipis a atupuei o nieila.

¹²Iei usun än Moses kewe Allük ra pin o mine ewe allük a apasa a pwüng o mürina.

¹³Met wewen ei? Epwe wewen pwe mine a mürina a aworato ai mäla? Apwi, esap fokun ina! Tipis a föri ei. Ren an aea mine a mürina, tipis a aworato mäla ngeniei, pwe epwe pwäpwäla wesewesen lapalapen tipis. Iei usun ren ewe allük a pwäla pwe tipis a fokun ngau.

¹⁴Kich mi silei pwe ewe Allük sokun ngün, nge ngang sokun fituk, pwe üa nom fän nemenien tipis.

¹⁵Üsap weweiti mine üa föri. Pun üsap föri mine üa mochen föri, nge üa föri mine üa oput.

¹⁶Iwe, lupwen üa föri mine üsap mochen föri, a pwä pwe üa tipeeu ngeni pwe ewe Allük a pwüng.

¹⁷Iei usun sap ngang wesewesen ewe mi föri ei, nge ewe tipis mi nonom loi.

¹⁸Ngang üa silei pwe mine a mürina esap nom loi, wewen esap nom lon fitukei. Pun inamwo ika a nom rei ewe mochenin föri mine a mürina, nge üsap tongeni föri.

¹⁹Ngang üsap föri mine a mürina usun üa mochen, nge üa föri mine a ngau, ewe sokun föför ngang üsap mochen pwe üpwe föri.