Rom 2:6-15

⁶Oga tibakonan pepejig a8ian adi kagi inakamigizindjin.

⁷Nandam a8iagog apan kitci nak8i8ag 8e8enda kidji inadizi8adj. Onada8enima8an Kije Manidon kidji minigo8adjin icpendagozi8ini, kidji min8adjimigo8adjin, acitc kidji minigo8adjin pimadizi8ini ega 8ikad ke ick8asenig. Kije Manidon dac oga minigo8an kagige pimadizi8ini.

⁸Kodagiag dac a8iagog ka8in o8i ndota8asi8a8an Kije Manidon, acitc ka8in o8i nosoneasina8a teb8e8ini, acitc motci madji inakamigizi8ag. 8ina8a dac, Kije Manidon oga sogi pajacteogo8an.

⁹Kakina igi8e ka nta madjakamigizi8adj kada kitci kodagito8ag acitc kada kitci sanagendjige8ag, Coda8innig acitc dac ega ka Coda8inni8i8adj.

¹⁰Kakina dac ka mino ijitcige8adj, Kije Manidon oga minigo8an icpendagozi8ini, oga min8adjimigo8an, acitc oga minigo8an pekadendamo8ini, Coda8innig acitc dac ega ka Coda8inni8i8adj.

¹¹Kakina mega a8ian pejig8an otoda8an Kije Manido.

¹²Ega ka Coda8inni8i8adj ka8in okikendasina8an Inakonige8inan kagi minadjin Kije Manido Coda8innin. Kada 8anicinog dac opatado8ini8an odji, ega 8ikad egi odji kikendamo8adjin ini Inakonige8inan. Coda8innig dac okikendana8an ini Inakonige8inan. Apitc dac ega nosoneamo8adjin ini Inakonige8inan, Kije Manidon oga tibakonigo8an e abadjitondjin ini Inakonige8inan.

¹³Ka8in eta ogagi motci ndotasinan a8iag ini Inakonige8inan kidji k8aiak8abamigodjin Kije Manidon. Panima ki nosoneagin kicpin nda8endag kidji k8aiak8abamigodjin.

¹⁴Ega ka Coda8inni8i8adj ka8in okikendasina8an ini Inakonige8inan. Apitc dac 8ina8a tibina8e odji inendamo8adj kidji todamo8adj kagi inakonigemaganigin, mi iidi eji 8abadai8e8adj e kikendamo8adj epitci k8aiak8adizi8ag8en kek8an epitci panaage8ag8en.

¹⁵8abadai8e8ag Kije Manidon egi atondjin odei8akag ini Inakonige8inan, kidji odji kikendamo8adj adi ke inadizi8adj. Okikendana8a adi enendagozi8adj kidji todamo8adj. Okikendana8a epitci mino todamo8ag8en kek8an dac epitci panaage8ag8en.