Rom 2:6-15

⁶Enekwei sohokwe, God hiykwe uwrsa lowpwarowp me kokwe, hom pay mey ke meio e, hiykwe seyr mey sohok ko liy-liy-aw ma-sahre kow.

⁷Uwrsa, yor yaprue me-aw ma mon wayr, seyr God so panpaniowni o, uru ihey-ar o, lokrue ey lopa o, seme ma pawk mokwe, hme kokwe God hiykwe su lwayr peyow peyow ey se ya kow a.

⁸Sawk uwrsa ompreir kawk yor non o, seyr okar-ok me hyaw ma lwak o, seyr yor piap-araw mo meyki ma ley o, hme kokwe God hiykwe, hyo kasaw lon hohuaw yor aw-mar ipey-ar non hokwe, ipey-ar swanonay kow ey.

⁹Uwrsa lowpwarowp, yor piap-araw me ma mon yorpayor wayr somokwe, hmo owh mon kokwe low aiopey o, aw aiopey hay nak-ok ey o, sohom lousne ey. God so aw-mar hokwe peyr Juda me loum pie nok, hai, uwr-kayn irweyk me ma-loum ok.

¹⁰Sawk uwrsa yor yaprue me-aw ma mon wayr mokwe, hme kokwe panpaniowni yor o, uru ihey-ar o, seyr liwak marowhway yor o, seme kow ey. Hiykwe Juda me hiy-mon pie nok, hai, uwrkayn irweyk me hiynak-mon ihey ok.

¹¹God hiykwe uwrsa me lira mesor anon anon ankin, hiykwe uwrsa, uwrku saku penkin mon lwak e, hiykwe lowpwarowp me kokwe mo liy-liy-aw lira anon anon ey.

¹²Uwr-kayn irweyk me kokwe Moses so sow me kow pa. Uwrsa somokwe yor piap-araw me meio ankin, lokrue pror ha ey, mo hom Moses so sow lopa lwak hi. Seyr liy-liy-aw, uwrsa Moses so sow me ma nakruok, seyr yor piap-araw me ma mon, hmekwe Moses so sow hokwe senkin lira me anon ey, homkwe heyn non.

¹³Payhokuaw, uwrsa Moses so sow me kwahnaw ma lonuayk, sawk meyki nak-pyay lopa me kokwe, God hiykwe luw-luw-aw-ok liy me ley. Sawk uwrsa, sow lowpwarowp God hiy Moses se ma kow seme ma lonuayk pyay meio wayr mokwe, God hiykwe hme-aw luw-luw-aw-ok me ey.

¹⁴Okar, uwrkayn irweyk homkwe Moses so sow me lonok pa. Sawk homkwe hmo sow arian, homkiaw hmo uron arian mon ma nanpanan mo meyki mon nak-pyay meio. Suw senkin mesair kow, uwrkayn irweyk hom Moses so sow me lonok lopa lwak hi, hmekwe hmo sow arian homkiaw hiy-anok anok.

¹⁵Uwr-kayn irweyk mo liwak yor senkin mokwe, hreme senkin mesair kow, ok-kopi har Moses so sow hok ma me mokwe hmo uron mon po mey iawon. Enekwei uwrsa sohom yor piap me mon ankin, hmo nanpanan yor, uron ko homkwe hme senkin me-kow, “Homkwe heyn non”, seyr hom yor yaprue me mon ankin, hmo nanpanan yor, uron ko homkwe hme senkin me-kow, “Homkwe heyn lopa.”