Rom 11

1

2

3

4

5

6

7

8

9

10

11

12

13

14

15

16

¹Te bidi Aisaiago te tobage po asęai baso, eno e po hanalu obao, te Godigo aga hani we bidi aga digi sela sąyabo homu me yaliwe? Mu menio. Ena me ena te Israel bidi dao. Te bidi Abraham te eno wąį mu dao. Ena te Benjamingo hani dao.

²Te Godigo hani augwali te agai polobadu koneyu hagea sai, agai te augwali me sela sąwai menio. Dagego te Godigo po pusali profet bidi Elaijago po te Godigo po bukude elalubo te dagego koneani. Elaijago gedu haluasa po olama, tama te Israel dabe augwali te Godigo gesabide po tų ela mawai. Agai te wali po e dao,

³“Genuai Bidi, augwaligo te nago po pusubo bidi profet dabe augwali ela muyu yali. Tama augwaligo te nagebolo mabo nai ulubo alta sai aluali. Tama ena deli naga ena bidibao. Tama augwaligo ena gegebo sę eyu, tama ena ela muainogo ebo dao,” Elaijago te po wai.

⁴Tiali goli Godigo agabolo mena po wei ponaniwe? Agai te po wai, “Eno digi ena bidi dabe te bidi sese hauwa 7,000 bidi sali, tama augwaligo te tibo god Bal dologoba pelama teba lotu me wasiąwai dao,” Godigo te po wai.

⁵Te tama megi e sogo me te hani bugai meba elalubao, Godigo te aga olo tau mabo wiegi yai kolesagago te augwali hagea siyu ma sai dao.

⁶Agai te olo tau siyu mabo wiegi yai kolesaga ebaso tama augwali sali. Tama agai te augwaligo yali sęde homugo te augwali me sabeo. Tama augwaligo te sę ebode te Godigo augwali siyu da, teda te olo tau siyu mabo wiegi yai kolesaga ebo te olo munu me ma egi menigi dao.

⁷Tama tibaso dago te Israel dabede magi po waibawe? Te Israel dabe augwaligo te Godigo augwali doloba pai we bidi nogi poabo tų suainogo te sę dene yali goli, te tų augwaligo me susiąwai. Te Godigo meba we bidi naga dią selama, tama augwaligo te tų suali. Tama gasa bage, te augwaligo Godigo po odobo hagela eyu, tama augwa olo dąų wali.

⁸Te Godigo po bukude wali po tiwai gilama yali, te po wai, “Godigo te augwaligo homu kolesaga te godege pibo tiwai ilali. Agai te augwaligo gedu te susiąbo tiwai ilama, tama ologo te po me odosiąyu yalio. Tama augwali te tiwai bidali, tama megi e sogoba usu nagasai dao.”

⁹Tama Devitgo me te boi bidi dabede Godibolo te tiwai po olama wai, “Te eno homugo te nago tilama, tama augwaligo wei ebo naigo te augwali te konesiąwai bidi tiwai ilao, te aga te subigila peyu te no aselama bidibo bidi te konegobeo. Te bidi tiwai nago augwali tiwai ilao. Tama augwali tulolumainao, augwali wei ponao.

¹⁰Te eno homugo nago augwali gedu hulia somainu elama, tama augwaligo te hulia sai pedalumainogo elama, tama augwaligo gedu pedama suainogo ebo usu me egobeo. Tama nago augwalibolo sęgę mao, tama augwaligo tudi sugunama, tama augwali te tiwai sesemane sogo bidimainogo yao,” Devitgo te po polobadu wai.

¹¹Te eno te po hanalu obao, te Juda dabe augwaligo te Kraisde konealubo po dąų wasiąyu tama tulaluama, tama augwali tede mu dolaliwe? Mu menio. Augwaligo te dwai sę eyu tama te tų geda mubaso, tama tede te Godigo te gasa hani dabe augwali ma sai. Godigo homugo te wiegi yai kolesaga agai te gasa hani dali ebo te Israel dabe augwaligo suyu tama augwali pesa emainogo tiai dao.

¹²Augwaligo te dwai sę ebaso, tama tede Godigo te tigidali tǫde bidibo we bidi tau mu sidubadi geaibao. Augwaligo te Godigo kolesagade tulalubaso, tama tede te Godigo te Juda ąǫ isąwai gasa we bidi hani augwalibolo wiegi yai kolesaga mu yai. Tama tibaso, tigidali Israel dabe Godiba ma geasa asobaso da, teda tigidali hani wiegi yai mu bidaibao, me deli dwai bidigobeo.

¹³Tiali goli megi eno po te dage gasa we bidi hani dabe dagebolo mawainogo obao. Godigo ena tagala palali, te eno dage Juda hani isąwai gasa we bidi dagede sę emainogo yai. Tama tibaso eno homu pemene wiegi yai te sęde elama, tama te sę bidigo gedude ugwaba siyu tama eno te sę ebo dao.

¹⁴Magi baso meni, te sęde eno homugo te eno hani Juda bage augwaligo te Godigo dage dali yali wiegi yai kolesaga sulama pesa eyu, tama eno te augwali tomode meba te eno ma sainogo ebo dao.

¹⁵Edao. Godigo te Juda dabe augwali sela sąnama, tama tede agai te tigidali tǫde bidibo bidi selama, tama augwaligo deli homu aga dali pedalabo tų dawai. Te dwagi yai kolesaga dao. Tiali goli, Godigo te Juda dabe augwali ma sabo si, te wiegi yai mu yaibao, te isali bidi aga gų pagede ma hodalobo tiwai yaibao.

¹⁶Te po digi po si begelama tama eno dagebolo obao. Te Juda dabe augwaligo tubo nai bret nigibo si, tama hasia augwaligo te dwasianu pedai bret nigibo plaua te Godibolo hasia mabo dao, te Godigo nai dao, te po wabo dao. Tama tibaso, dago koneani, te plauago nigibo bret tigidali te Godigo nai dao. Tama te ni pedali dabe te Godigo da wida, teda te ni nologo dabe augwali me te Godigo naga dao. Tama te tiwai me te Juda dabego wąį dabe augwali Godigo we bidi bidalibaso, te megi bidibo Juda bage me te Godigo we bidi me bidibao.

¹⁷Tama augwali te gide elalubo ni oliv tiwai bidiyu, tama Godigo te ni oliv nologo meba dwali togolama sela sąnama, tama agai dage olo ni oliv nologo te bulude elalubadi selama, tama dage te gide elalubo ni olivgo nologo togwali pesagede wadolali. Tama dagego augwali hasegelama, tama megi dage bugagia bidibao. Tama dage te elalubo dwagi yai ni olivba wadolobaso, tama dage dali te ni aga nologo mu dali te dagego te ni oliv pedalidu asobo ąįgo ili sabo dao, te nigo bomo me dagego sabo dao.

¹⁸Tiali goli dagego te togwali ni nologo dabe augwalibolo te posobo po munu me olamuo. Te dagego duga nogi ugwaba siyu, augwalide posobo po wai wida, teda dagego homu bugagia koneyu bolo yao. Dagego te ni pedali me ugwaba sagolobo menio. Te ni pedaligo dage sagolobo dao.

¹⁹Tiali goli dagego te duga nogi ugwaba sabo po wabo homu yaibao: “Godigo te ni oliv nologo dabe togwali madi, te ena augwali togwali pesagede wadolomainogo yai,” waibao.

²⁰Awe, te mu dao. Tiali goli, te augwaligo Kraisde konealubo po dąų me wasiąwani, tama te tialigo naga agai augwali togwa sąwai. Tama dagego konealubo po dąų obaso, tama dage bugagia bidibao. Tiali goli dua dao, dagego hagoma me elamuo. Te dage wi iyąo.

²¹Polobadu, Godigo te Juda dabe, te nigo nologo mu dabe augwali me sula tagalasiąwai, tama tiwai naga te dage tuloluyu da, te agai dage me te me sula me tagalogobeo.

²²Tialima, dagego te Godigo te we bidi dali ebo tau sabo kolesaga me te agai sesena pabo kolesaga dali me bugagia suiyąo. Te aga kolesaga tagalali bidi dabe augwalibolo, te agai augwali sesenaibao. Me ma, dage te Godigo dage homu dene eyu tau sabo dao. Tama dagego te aga dage dali ebo kolesagade puba hwi weyu tama agade homu kęą pai we bidi bidiyu da, te usu da. Ma, te meni yani da, te agai dage me togolama sela sąwaibao.

²³Tama te Juda dabe, te ni olivgo nologo mu, te augwaligo te Kraisde konealubo po dąų wabo hagelabo homu tagaluyu da, teda Godigo augwali te augwali togwali pesagede ma wadolaibao. Awe, Godigo te augwali ma wadoligi pabo usu yaibao.

²⁴Magi baso meni. Dage gasa hani we bidi da, te buside holali ni oliv nologo naga tiwai dao, te ni oliv mugo nologo meni. Tiali goli Godigo dage te nide togolama, tama agai dage te gide elalubo ni oliv muba wadolali. Tama te Juda bage augwali da, te gide elalubo ni oliv dao. Tama tibaso, Godigo te augwali polobadu te ni nologo tiwai togwa sąnama, tama augwali te augwa oliv niba digi te augwa ma wadoloyu ebo usu mu dao, te pedalisiąbo sę meni.

²⁵Eno ama dede, dage homu hagoma me idali weyu tama eno homugo dage te polobadu geme dualali po page gisiga koneao. Te e tiwai dao: te Israel hani we bidi me badugo homu palia sali, tama te kolesaga augwalide osogo elalubadi tama te gasa haniani hani we bidi augwali te Godiba asiyu, tama te sogo augwaligo hani nambaba usu nagasaibao.

²⁶Tama te kolesagago te Godigo te Israel dabe tigidali ma dobola saibao. Te agai po asęani bukude wali po tiwai gilama yaibao, “Te we bidi ma dobola sabo bidi aga te Saion buludu asaibao. Te agai te Jekopgo bidi hanigo yali Godigo po sela sąbo kolesaga te agai sela sąwaibao.

²⁷Tama te sogo eno te po dąų augwali dali waibao, Te po e dao, Te eno augwaligo dwai sę ebo tigidali sela sąwaibao.”

²⁸Te Godigo gesi noma wiegi yai po pusubo sęde te Juda dabe augwaligo Godide te boi bidi homu ebo dao, tama tede Godigo dage gasa hani we bidi tau sobao. Tiali goli, te Godigo augwali polobadu sa muani sęde, te augwali da aga abagi hani dao. Magi baso meni, polobadu mu agai te augwaligo wąį dabede mu po dąų walai dao.

²⁹Tama tiyu, te Godigo agai te bidibolo olo mani wiegi yai naide te enabolo ma mao po munu me wagobeo. Agai te bidi sa munama tama i obaso da, teda agai homu te sęde me nosali ma hasegelegobeo.

³⁰Polobadu dagego te Godigo po sela sąwani. Tama megi te Juda hani bidi augwaligo agai po sela sąnama, tama Godigo augwali osogo tagalabaso, tama agai dage gasa haniani hani we bidi dali homu dene eyu tau salio.

³¹Tama te tiwai me augwaligo me te Godigo po sela sąbao. Magi basowe? Te Godigo dage dali homu dene eyu tau sali kolesaga naga ebo gilama agai augwali dali me emainogo yaibao.

³²Magi baso meni, Godigo te po sela sąbo kolesagade te tigidali we bidi dali kalabus ilama, te agai tigidalibolo me homu dene eyu olo tau sabo wiegi yai kolesaga yainogo tialio.

³³Ei tegoba! Te Godigo wiegi wiegi yai homu kolesagade ena noma sobao. Te agai sę yabo homu kolesaga dali, agai koneani kolesaga dali, te mu pągąna pelama, tama te tamu ąį gebo dabo tiwai gilama aiyaba mu dulai. Da bidigo agai yali homu kolesaga page tigidali konemainogo ebo usu me egobeo. Dago agai da dali ebo sę page me munu me kuna konegobeo, da tede usu me egobeo.

³⁴Te agai po bukude te tiwai po me asęani, “Dego te Genuai Bidigo homu kolesaga koneai dawe? Dego te mobo mabo po agabolo mabo usu egowe?

³⁵Dego te nai me deli hasia agabolo mani, tama agai te nai wei ponomainogo yaliwe?”

³⁶Bidi menio. Magi baso meni. Aga tigidali nai nigali bidi dao, tama agade te tigidali elalubo nai te bidibo ula elalubo dao. Tama tigidali naigo te aga nogi ugwaba somainogo eyu bidibo dao. Tama eno homugo dago sesemane sogo bidada peyu aga nogi ugwaba sao. Mu tama dao.