Rasuli 2:15-30

¹⁵Inontarai ninisa wiro emayeru kariri meteyoawa kaha, weo kameaine rai arahio araha ureng indiata ninai.

¹⁶Wape fianai aino rahida bonini mewatioai ninai, Seng Allai medurai kawuru na fafongfa ria nabi Yoweli ampa.

¹⁷Amani Allai medu deyo, ‘Rerai we rahida Sengnei kife nunei foi mani, ambori yenatu Nuhuaninu Mirarebana nei we kaiwasanei sentenang ki. Ampafe mene arikangnesa, wiwing tuti mang, ambori emadu fio yohonai wesa we emadura fo, amani kariri fio ambori kawariai fo. Bariboaiwasa ambori ewati fiainawiaio yeinawiai wesa we ewatioa fo. Wawafosa ambori etamiei kariri amieio yohoni wesa foi ki.

¹⁸We nehu womingnesa kontai, wiwing tuti mang, ambori yenatu Nuhuaninu Mirarebana nei na rahida bonani we sensonisa. Ambori emadu fio yohonai wesa we emadura fo, amani kariri fio ambori kawariai fo.

¹⁹Ambori yeinawi fitantuma bitoya na rorafaisi, tuti fitantuma fiebai na kofa na nunei, toyari atio rika tuti adia, tuti riraung dautai tikahipa kontai ki.

²⁰Wiro Rahida Fiebai Mirarebana foi, amani rahida Sengnei daraberahi nai ma foi kaharai mae, wofaisi ambori memantiti ki, tuti embaifaisi ambori berika kariri rika ki.

²¹Rabuang bonani mandoni dino sahu Sempaisi wonongfo mani ambori kiaharai weru ne karirafo.’

²²Doroi bohi inontarai Israeli ne meaine. Metaramio kaiwo fianai aino imadurai ninai kariri Yesusi na Nazareti foi. Na fitantuma fuba Seng Allai niari rahang mea na Yesusi, deinawiai kasau we mea weo yuaisi, demi biari we mea meu. Ne nanai mewaitawanai ampa.

²³Kariri mantauni ne enetituaitafo kiutuai we dohong Yesusi we mea meu, wape memuni, amani metua inontarai eharira fosa epahui na aitabafoia mireha.

²⁴Wape Seng Allai duwiri suwi na marareha rorong foi aha. Mararehafoi kiari, wape Allai fioresuwi weru warangfo, weo todoni kontaio mararehafoi yu weduari kaha rai.

²⁵Yesusi nini dino raminde Dauti medu kariri kontai deyo, ‘Iwati Sengnei doari pampang na arohune, Da ria yau na warahu domoya nei, ampafe fiani kontaio dohong yau irirora kaha.

²⁶Nanai wedaya enehurorongnei mirising, ifiai Sempaisi na borohunei, tuti iminohiwau enehutawang Sempaisi pampang.

²⁷Weo wiro tua nuhuaninunei wiatai na marareha rorong foi kaha, tuti wiro tua nemu Mano Mirarebana ne yau inaia iworu na fafo rorong fo kaha.

²⁸Boinawiai we yau ampa rangno da to numainufo. Ambori bohong yau ifaraise katui ahang kaha, weo weriria yau pampang fefe.’

²⁹Doroi bohine mea, tawaitawanai ampa weo tane werengno Dauti mireha ampa tuti esarai ampa, paria sobu rahida bonini ne fafofoi wia rahang tatane, ampafe fi medu kariri ne taraifoi we wioru kaha fo mani dotu we mantauni kaha, wape kariri manei siai.

³⁰Wape nabi dine, ampafe deitawanai weo Seng Allai dereraia fefora tutirai, weo ambori yuai manei na ne riria rabuang foi we wemananu ki.