Aposel 2:15-30

¹⁵Oro lau dah badeh, ba-un gwa boto-on bwe. I buku bale ado badeh, bwe. Kon mandraben kahis le oh, mada an barala ndro ari adeh!

¹⁶Arile, idoh lakou mene propet Jowel asehek nyala aliy:

¹⁷“Kindrei anya, ‘Suniya len anya kano kameh, jo kameh solowei Malawik i la-u lau mari badu kon munyak. Ya iri nadu ado mwan ma badih kameh asehek sahou i buku iri propet, ma iri lau loweu tado kameh amekes lele, ma hawe oro lau tado ndrala bada ndramak kameh ameh solo-an.

¹⁸Ma hawe oro lohowan tek mwan ma badih na len eme kameh, jo kameh solowei Malawik i la-u oro, ya oro kameh winiyan asehek sahou i buku iri propet.

¹⁹Jo kameh leheya kalem udu bada kandrah loken, ma udu bada munyak andri ale. Idah kameh, ndra ma hawe jih ma hawe kasu-er hutuwen kameh asahan.

²⁰Ya an kameh amak ma kon ilik, ma bun kameh asaram i buku ndra. Ya lakou doh kameh asahan bwena op. Ano len tinan ta lomadan ta Laban asahan.

²¹Ya lau amekes salom na nyara Laban ma ndremenya iy ta seben kameh, iy winiyan sebenei iri.’

²²“Ado lau badu Isra-el kanuhun sahou doh. Jises Krais badu Nasaret mene, Kindrei suni iy ewek hawe ado. Ya iy mene amekes lahou tinan ma amekes kalem tinan na boto-on ta Kindrei edeu i tan udu ndrokowa ado. Ya ado tanan iy.

²³Bwena mene Kindrei ndratanan iri lakou kameh asahan hamon, ma iy bwidi iri lakou asahan na le tanan ma seken tan. Eme ma, ado badeh, atehei iy i mine iri lau ndra-in, ma iri atahi iy imek i bada kei tondreh.

²⁴Arile, Kindrei mete-ei iy amak eme awas ja ta imek; ma sebenei iy ta sisi-in ta imek. Tasah, imek badeh, winiyan batawi iy bwe.

²⁵Tasah, Debit mene asehek nyalan i buku doh: ‘Jo badeh, anyolom Kindrei udu madak na len mari. Tasah, iy badeh, udu loboho lim salin hawek ya jo winiyan banoh bwe.

²⁶Eme bwidi ndrinek sekesek ma jo asehek ta aliy, Ma jo ale atondrok ta lakou mwasin handru kameh asahan hamon.

²⁷Tasah, ou winiyan baruwani jo bamak bado bolo munyak dah bwe. Ma ou winiyan baruwani bada lau tam mwasin labai sabola sado bolo lek.

²⁸Ou badeh, ndraleheyani jo ta san mwasin ta akohok kohak handru ta udu le buku doh. Ou kameh ado hawek ma atehei sekesek tinan labai eme tek.’

²⁹“Ado nadu tine, jo katiye tado kamwenen. Tubu taha Debit mene imek ma ahi iy. Ya lek tan asah udu hawe to kahis le eme taku dah.

³⁰Iy badeh, propet ya iy tanan tandrakan ta Kindrei mene tandrakan iy. Kindrei badeh, tandrakan ta lundriyen oro ari kameh asahan kabin, i buku le iy amwenen.