Bè-wénia 2:15-30 - Dónbeenì páaníi fĩnle vũahṹ

Bè-wénia 2:15-30

Click on verse(s) to share them!

¹⁵Ɓa ɓúi wee leéka le ɓa nùpua mu ɲun sú wee khée, ɛ̀ɛ ká ɓùeé. Lé bìo á mu lé le yìnbíi lɛ́ɛ̀rèwa bìo dènú níi á wa wi yi!

¹⁶Bìo ó o ɲi-cúa fɛɛro Zowɛɛle hĩ́a bía lé bṹn lan wee wé hã laà na kà wán.

¹⁷Bìo kà lé bìo le Dónbeenì bía: ‹Hã pɔ̃̀nna vaa véeníi á ĩ ì bɛn ĩ Hácírí à le è fè ɓa nùpua ɓúenɓúen. Mi zà-báawa lè mi zà-hĩ́nni á wé è fɛɛ ĩ ɲi-cúa. Mi yàrón-fĩ̀a á wé è mi mu bìowa ɓúi na ɓa lá yí dà máa mi. Mi nì-kĩ́a á hã kònkórá wé è ɲì yi.

¹⁸Mu bon. Hɔ̃́n pɔ̃̀nna so yi á ĩ ì bɛn ĩ Hácírí á le è fè ɓa báawa lè ɓa hã́awa na lé ĩ ton-sáwá, á ɓa wé è fɛɛ ĩ ɲi-cúa.

¹⁹Mu bìowa ɓúi na sìí yí zũ á ĩ ì lén yòó ho wáayi, á à wé mu yéréké bìowa ho tá wán. Le cãni, lè ho dɔ̃hṹ, lè le minka yiìní á à kɛń.

²⁰Le wii á à dé mí yuumu á ho pĩihṹ á à wé cṹɛncṹɛn lòn cãni. Bṹn bìowa so ɓúenɓúen á à wé è vé ó o Ɲúhṹso wizon-beenì na cùkú wi á à dãnáa.

²¹Hón pã̀ahṹ so yi ká nùpue lée nùpue na tà von o Ɲúhṹso yèni à wón á à fen.›

²²«*Isirayɛɛlesa, mi ɲí bìo á ĩ ì bío á à na mia: O Nazarɛɛte nìi Yeesu fù lée nùpue na le Dónbeenì zéenía bìo làa mia le mí wiráa. Mu yéréké bìowa na wee zéení le Dónbeenì pànká na le wó là a níi mi tĩ́ahṹ, lé bṹn wee zéení mu. Minɛ́n miten yàá zũ mu.

²³O nìi mu á le Dónbeenì dó mí níní yi làa bìo á le wi à mu wéráa. Le fèra zũ bìo mi ì wé làa wo. Minɛ́n lé bìa dó a bìa yí zũ le Dónbeenì níi yi, á ɓa ɓúaa wo ho *kùrùwá wán, ó o húrun.

²⁴Ká le Dónbeenì màhã́ fáa wo mu húmú níi yi, le vèenía wo. Mu húmú lá yí dà máa yí pànká o wán hùúu.

²⁵O *Daviide hĩ́a bía bìo kà o dã́ní yi: Ĩ hĩ́a wee wé mi a Ɲúhṹso ĩ yahó fɛ́ɛɛ. Orɛ́n lé yìa wee ɓua miì bèra a na á ĩ yí dɛ̀dɛ́ɛka.

²⁶Lé bṹn nɔn á ĩ sĩi wan, á bíoní ɓúenɓúen lée sĩ-wɛɛ bíoní. Hàrí à ĩ zũń ĩ húmú bìo, á ĩ sĩi pá à hĩ̀.

²⁷Lé bìo á fo máa día mi á ĩ máa va hen na ɓa nì-hía wee va yi. Fo máa tà ũ ton-sá na á ũ wa á máa soo.

²⁸Fo zéenía mi lè ho wɔ̃hṹ na wee va le mukãnì lahó yi. Hen ká ĩ wi ũ nìsã́ní à ĩ sĩi wa wa dà khĩí.

²⁹«Wàn zàwa, mi le ĩ bío wàn ɓùaa Daviide bìo wéréwéré na mia: O Daviide hĩ́a húrun á ɓa nùuna, á búure pá dà wee zéení ho zuia.

³⁰Bìo ó o hĩ́a lé le *Dónbeenì ɲi-cúa fɛɛro, á zũ le le Dónbeenì hĩ́a báa á dóráa mí ɲii nɔn le mí ì na a bɛ́ɛnì o mɔ̀nmànía nì-kéní ɓúi yi,