Psalms 89:2-23

²Pwe i indinda: Mak joutuk eu pan pwarado, o kom pan kotin kolekol ar melel nanlan.

³I inauki oner, ai pilipildar akan; I kauki oner Dawid nai ladu:

⁴Kadaudok om pan mimieta kokolata, o I pan kauada mol om jan eu kainok lel eu. Jela.

⁵Nanlan ap kapina omui manaman akan, Main Ieowa, o omui melel nan pokon en japwilim omui jaraui kan.

⁶Pwe ij nan tapok kan me rajon Ieowa? De ij me rajon Ieowa nan pun en me lapalap akan?

⁷Kot meid manaman nan pokon en me jaraui kan, o meid kapuriamui on me kaukaujon re a.

⁸Main Ieowa, Kot Jepaot, ij me rajon komui. Omui melel kin kapil komui pena.

⁹Komui me kotin kaunda madau anian. Komui kin kamoleilei iluk kan ni ar pan kokoda.

¹⁰Komui me kotin tiakedi Raap dueta kamelar amen. Kom kotin kamueit pajaner imwintiti kan ki lim omui manaman.

¹¹Lan o jappa me japwilim omui, jappa o audepa. Komui me kotin pajonedier.

¹²Komui me kotin wiadar pali apon o pali air, Tapor o Ermon kin nijinijki mar omui.

¹³Lim omui me mananan o kumut en lim omui me rojon, lim omui pali maun me ileile.

¹⁴Melel o pun iei pajon en mol omui; kalanan o melel kin tion mo omui.

¹⁵Meid pai aramaj kan, me aja nijinij! Ieowa, re pan weweid ni marain en jilan omui.

¹⁶Re kin polauleki mar omui jan ni manjan lel jautik, o re kin pwai kida omui pun.

¹⁷Pwe linan en ar kelail komui, o komui pan pokada oj at.

¹⁸Pwe Ieowa pere patail o me Jaraui en Ijrael, i atail Nanmarki.

¹⁹Maj o kom kotin majanier ki kajanjal kai on me lelapok kan: I kamanadar me Lapalap amen, I kajapwiladar pilipildar amen jan ren aramaj akan.

²⁰I diaradar ai ladu Dawid, I keiekidier i ai le jaraui.

²¹Pa i pan kolekol i, o pa i pan kamanada i anjau karoj.

²²Imwintiti kan jota pan kak widin on i, o me japun kan jota pan kak kaloedi.

²³I pan kamela me palian i mo a, o I pan kaloke ir, me kailonki i.