Psalms 73:4-25

⁴Pwe jota apwal kot lel on irail ni ar pan mela, re kin kelail o war arail wilar melel.

⁵Jota ar apwal kot dueta aramaj tei kan, o re jota pan kalokolok dueta aramaj tei kan.

⁶Ari aklapalap, iei kapwat en tapin wor arail, o arail likau, iei arail tiak weit.

⁷Por en maj arail tikitik o jued kilar ar wilar, o re kin wiada, me re inon ion.

⁸Re kin mamaleki meakaroj, o re kin lokelokaia me jued, o re kin lalaue o lokaia ni ar aklapalap.

⁹Dene arail lokaia tapi jan nanlan, o me irail indinda, dene i eta me pun nin jappa.

¹⁰I me aramaj akan lokidi on irail; o pil totoia re kin nimala.

¹¹Re kin inda: Iaduen, Kot pan kotin injenoki irail? O menda ren me lapalap irail?

¹²Kilan, iduen me doo jan Kot akan; irail meid pai nin jappa, o re pan kapwapwala.

¹³Iaduen, likamata jota katepa ai kamakelekeladar monion i o kaminela pa i kat ni me pun?

¹⁴Pwe ran karoj i pan kalokolok, o ni manjan karoj ai kamekam mia.

¹⁵Koren ion i pil pan indinda dueta irail, a jo, pwe i de pan juedeki japwilim omui jeri kan karoj jan maj kokodo lel met.

¹⁶I ap madamadaua duen mepukat, pwen dedeki, a i jota kak on.

¹⁷Nai lao pedelon on mon mol en Kot jaraui o kilaner imwin me doo jan Kot akan.

¹⁸Melel kom kotin pwili kin irail edi waja likakerij; kom kotin kapup irail edi on nani pwel.

¹⁹Iaduen arail madan joredier. Irail lokidokila, o imwila ’rail meid kamajapwek.

²⁰Main Ieowa, kom kin kotin kawela mom arail nan kanim o dueta auramen.

²¹Ni ai madak nan monion i, o waiwairok nan ai mudilik kan,

²²I ap diaradar, me nai ol pweipwei men, me jota aja meakot; dueta man amen mo omui.

²³Ari jo, i pan mimieta re omui kokolata, pwe komui kotin kolekol eta pa i pali maun.

²⁴Komui kin kalua ia duen kupur omui, o kom pan kotin kajamo ia nan linan omui.

²⁵Ma komui ta ai Kot, i jota pan anane meakot nanlan de jappa.