Psalms 18:5-28

⁵Jal en wajan mela kol ia dier, o jal en mela kaloe ia dier.

⁶Ni ai majak i likwir on Ieowa o weriwer on ai Kot; I ap kotin ereki nil ai jan nan tanpaj a, o ai likwir lel on karon a kan.

⁷Jappa rerer o mokidedar, o pajon en nana kan ititekok o rerer, ni a kotin onionidar.

⁸Atiniai koda jan nan jilan i, o kijiniai kelail jan nan au a, ap kareda liol.

⁹O a kotikidier nanlan o kotidido, o rotorot impan aluwilu a kan.

¹⁰O a kotikot pon Kerup amen o kotin pirwei, o a kotin dake pa en an.

¹¹Tanpaj a im pwal iei rotorot, o katau laud, o tapok rotorot, kapil pena i.

¹²Linan me mi mo a, kamueit pajan tapok kan ian akel o liol.

¹³O Ieowa kotin wiadar nanjapwe nanlan, o me Lapalapia kotin poronelar kapit i ian akel o liol.

¹⁴A kotin kajik wei japwilim a kanan en kajik katieu, o kotin kamueit irail pajan. A kotin wiadar liol toto o kamajak irail adar.

¹⁵Al en pil akan ap janjaladar, o pajon en jappa weiweidar ki ar onion Main, mon an en jilan omui.

¹⁶A kotikidier lim a jan nan waja ileile, a kotin kol ia di o kotin api ia dar jan nan pil kalaimun akan.

¹⁷A kotin dore ia la jan ai imwintiti kelail akan, jan ir, me kailon kin ia, ir me i jota itar on.

¹⁸Irail kaloe ia dier ni ai ran apwal, a Ieowa kotin wialar jauaj pa i.

¹⁹O a kotin kalua ia wajan jaladok, a kotin kamaio ia da, aki a kotin kupukupura ia.

²⁰Ieowa kin kotin jauaja ia duen ai pun, a kotin katini on ia duen makelekel en pa i kan.

²¹Pwe i kin weweid nani al en Ieowa, o i jota kin katiwo on ai Kot.

²²Pwe a majan akan mi mo i, o i jota pan kaje jan ia a kujoned akan.

²³Pwe nai unjokalar mon jilan i o juedeki ai japun.

²⁴O Ieowa kotin katini on ia duen ai pun, o duen makelekel en pa i kan mon jilan i.

²⁵Komui me kalanan on me mau kan, o lelapok on me lelapok kan,

²⁶O makelekel ren me makelekel akan, o japun ren me japun kan.

²⁷Pwe kom kin kotin dorela aramaj luet akan, ap kadukiedi maj en me aklapalap akan.

²⁸Pwe kom kin kotin kamaraini ai lamp, Ieowa ai Kot kin kamaraini ai rotorot.