1I KIN pok on komui Main, ai kel.
2Ieowa ai paip, ai kel, ai jaundor ai Kot, ai paipalap, me i kin liki, pere pa i, menkamaur pa i o jile pa i!
3I kin nidinid on Ieowa, me kapin en ko on, o i pan dorela jan ai imwintiti kan.
4I lodi oner jal en mela kan, o pilap en Pileam akan kamajak ia er.
5Jal en wajan mela kol ia dier, o jal en mela kaloe ia dier.
6Ni ai majak i likwir on Ieowa o weriwer on ai Kot; I ap kotin ereki nil ai jan nan tanpaj a, o ai likwir lel on karon a kan.
7Jappa rerer o mokidedar, o pajon en nana kan ititekok o rerer, ni a kotin onionidar.
8Atiniai koda jan nan jilan i, o kijiniai kelail jan nan au a, ap kareda liol.
9O a kotikidier nanlan o kotidido, o rotorot impan aluwilu a kan.
10O a kotikot pon Kerup amen o kotin pirwei, o a kotin dake pa en an.
11Tanpaj a im pwal iei rotorot, o katau laud, o tapok rotorot, kapil pena i.
12Linan me mi mo a, kamueit pajan tapok kan ian akel o liol.
13O Ieowa kotin wiadar nanjapwe nanlan, o me Lapalapia kotin poronelar kapit i ian akel o liol.
14A kotin kajik wei japwilim a kanan en kajik katieu, o kotin kamueit irail pajan. A kotin wiadar liol toto o kamajak irail adar.
15Al en pil akan ap janjaladar, o pajon en jappa weiweidar ki ar onion Main, mon an en jilan omui.
16A kotikidier lim a jan nan waja ileile, a kotin kol ia di o kotin api ia dar jan nan pil kalaimun akan.
17A kotin dore ia la jan ai imwintiti kelail akan, jan ir, me kailon kin ia, ir me i jota itar on.
18Irail kaloe ia dier ni ai ran apwal, a Ieowa kotin wialar jauaj pa i.
19O a kotin kalua ia wajan jaladok, a kotin kamaio ia da, aki a kotin kupukupura ia.
20Ieowa kin kotin jauaja ia duen ai pun, a kotin katini on ia duen makelekel en pa i kan.
21Pwe i kin weweid nani al en Ieowa, o i jota kin katiwo on ai Kot.
22Pwe a majan akan mi mo i, o i jota pan kaje jan ia a kujoned akan.
23Pwe nai unjokalar mon jilan i o juedeki ai japun.
24O Ieowa kotin katini on ia duen ai pun, o duen makelekel en pa i kan mon jilan i.
25Komui me kalanan on me mau kan, o lelapok on me lelapok kan,
26O makelekel ren me makelekel akan, o japun ren me japun kan.
27Pwe kom kin kotin dorela aramaj luet akan, ap kadukiedi maj en me aklapalap akan.
28Pwe kom kin kotin kamaraini ai lamp, Ieowa ai Kot kin kamaraini ai rotorot.
29Pwe ni ai ian komui i kak kaloedi karij en jaunpei kan, o ni ai ian ai Kot, i kak lujwei pon kel takai.
30Al en Kot me unjokala; majan en Ieowa me makelekel. I pere pan karoj, me liki i.
31Pwe ia amen Kot impan Ieowa, de ia paip eu impan atail Kot?
32Iei Kot, me kotin aude kin ia manaman, o kaunjokala al ai.
33A kin kotin wiai on nä i kan dueta nä en tia, o kotin kajapwil ia dan waja ileile.
34A kotin padaki on pa i kan tiak en mauin o, pwen kak on kaonopada kajik katieu mata.
35Kom kotiki on ia pere pan maur omui, o lim omui pali maun kamana ia da, o omui opampap me kajapwil ia da.
36Kom kotin kaonopadar al, me i pan weweid ia, pwe nä i kan ender krijedi.
37I pan tan won ai imwintiti kan o kono irail edi, o i jota pan puredo, lao karoj lodier.
38I pan kamor irail pajan, re jota pan kak palian ia, o re pan pupedi on pan nä i kan.
39Kom kak kamana kin ia omui manaman on ni pei; Kom kak kajedi on pan nä i kan karoj me palian ia.
40Kom kin kotin kaloedi on ia ai imwintiti kan, pwen kawela, me kailon kin ia.
41Re kin likelikwir, a jota jauaj parail ren Ieowa, a jota kotin japen ir.
42I pan juk irail pajan dueta pwel par nan kijinian; i pan kaje ir ala dueta pwel jamin jan nani al o.
43Kom kin kotin dore ia jan ren akamai en aramaj, o kom kotin kajapwil ia dan men liki kan; o wei eu me i jaja kin upa on ia.
44Ni ar roner, re peiki on ia er, o nain men wai kan peikion ia ni linkapin.
45Nain men wai kan poridier o rerer o pwarado jan nan ar im kalaimun akan.