Psalms 119:67-164

⁶⁷Mon ai aktikitikala, i kin japujapun, a met i kin apapwali omui majan.

⁶⁸Komui me mau o kapunlol, kotin padaki don ia japwilim omui kujoned akan.

⁶⁹Me aklapalap akan kin kalikama ia; a nai kin apapwali omui kujoned akan jan nan monion i.

⁷⁰Monion arail majul kila wi; a i kin peren kida omui kapun.

⁷¹Meid mau on ia omui kaopampap ia la, pwe i en padakki omui kujoned akan.

⁷²Kapun jan nan jilan omui mau on ia, jan kold o jilper kid toto.

⁷³Lim omui kan kapik o wia ia dar, padaki on ia, pwe i en aja omui kujoned akan.

⁷⁴Me kin majak komui, pan kilan ia, ap peren kida, pwe i auiaui omui majan.

⁷⁵Main Ieowa, i aja, me omui kadeik kan me pun, o kom kotin kaopampap ia la ni omui melel.

⁷⁶Omui mak pan kamait ia la, duen me kom kotin inauki on japwilim omui ladu.

⁷⁷Kom kotin kupura ia, i ap pan memaur eta, pwe i kin peren kida omui kapun.

⁷⁸Me aklapalap akan en jarodi, pwe re japun on ia ni jokarepa; a nai madamadaua duen omui kujoned akan.

⁷⁹Me majak komui, ren waroki on ia, o me aja duen omui kadede kan.

⁸⁰Monion i en pun ni omui kujoned akan, pwe i ender jarodi.

⁸¹Nen i kin inon ion omui dore ia la, i auiaui omui majan.

⁸²Por en maj ai kin anane omui inau, kalelapok: Iad me kom pan kotin kamait ia la?

⁸³Pwe i luetalar rajon deun pil eu nan adiniai, i jota monokela omui kujoned akan.

⁸⁴Arai da, japwilim omui ladu pan memaurada? Iad me kom pan kotin kadeikada ai imwintiti kan?

⁸⁵Me aklapalap akan weiradan ia por akai, irail me jota kin duki on japwilim omui kapun o.

⁸⁶Japwilim omui kujoned akan karoj me melel. Irail raparapa kin ia ni jota karepa; kom kotin jauaja ia!

⁸⁷Me ekij, re pan kame ia la jan nin jappa, a nai jota muei jan omui kujoned akan.

⁸⁸Kamaur ia da duen omui kalanan, a nai pan kolekol kadede en jilan omui.

⁸⁹Main Ieowa, omui majan pan potopot eta nanlan.

⁹⁰Omui melel kin jan eu kainok lel eu; komui me kotin kajonedier jappa o a pan mimieta.

⁹¹Irail karoj mimieta lao lel ran wet, duen omui kujoned akan, pwe karoj kin upa komui.

⁹²Ma omui kapun jota pan kaperen pa i, i pan mela ni ai luet.

⁹³I jota pan monokela omui kujoned akan kokolata, pwe ir me komui kakela kin ia da.

⁹⁴Nai japwilim omui, kom kotin jauaja ia! Pwe i inon ion japwilim omui kujoned akan.

⁹⁵Me doo jan Kot akan majamajan ia, pwen kame ia la; i kin apwali omui kadede kan.

⁹⁶I kilaner imwin meakaroj, a japwilim omui kujoned pan mimieta.

⁹⁷Ia wan ai pok on japwilim omui kapun! Nin ran karoj i kin kajokajoi due.

⁹⁸Kom kin kalolekon kin ia omui kujoned akan jan ai imwintiti kan, pwe irail pan ieian ia kokolata.

⁹⁹Nai lolekon jan ai jaunpadak kan karoj, pwe i kin madamadaua duen omui kadede kan.

¹⁰⁰Nai lolekon jan me ma kan, pwe i kin apapwali japwilim omui kujoned akan.

¹⁰¹I jota mueid on nä i, en weweid pon al japun, pwe i en kolekol omui majan.

¹⁰²I jota wuki wei jan omui kujoned akan, pwe kom kotin padaki on ia er.

¹⁰³Omui majan me iau jan onik nan au ai.

¹⁰⁴Omui kujoned akan kin kalolekon ia, i me i kin tataki al japun karoj.

¹⁰⁵Japwilim omui majan me jer pan nä i, o kamarain pan al ai.

¹⁰⁶I kaukilar, me i pan kolekol omui kujoned pun kan, o i pan kapwaiada.

¹⁰⁷I injenjued melel; Main Ieowa, re kotin kamaur ia da duen omui inau.

¹⁰⁸Main Ieowa, kom kotin kupura kijakij en au ai, o kotin padaki on ia omui kujoned akan.

¹⁰⁹I kin wewa maur i nan pa i kat; i jota monokela omui kapun.

¹¹⁰Me doo jan Kot akan injenjare ia, a i jota wuki wei jan omui kujoned akan.

¹¹¹Omui kadede kan iei ai jojo joutuk, pwe re kaperenda monion i.

¹¹²Monion i kin inon ion kapwaiada omui kujoned akan anjau karoj kokolata.

¹¹³I kin kailonki me lol riapot, o i kin pok on omui kapun.

¹¹⁴Komui ai kadauk o pere pa i, i kaporoporeki omui majan.

¹¹⁵Komail me jued akan en muei jan ia! I men apapwali kujoned en ai Kot akan.

¹¹⁶Jauaja ia duen omui inau, i ap pan memaur eta; o kom der kotin mueid on, i en namenokala ni ai kaporopor.

¹¹⁷Kamana ia da, i ap pan kelailada, i ap pan apapwali omui kujoned akan anjau karoj.

¹¹⁸Kom kin kotin tiakedi karoj, me pan wuki wei jan omui kujoned akan; pwe arail japun me dir en likam.

¹¹⁹Kom kin kotin kaje jan jappa me doo jan Kot akan karoj dueta jamit; i me i kin pok on ki omui kadede kan.

¹²⁰I kin majak komui, i me i kin mujerereki, o i kin majak omui kadeik kan.

¹²¹I kin apapwali me inen o pun; kom der kotin pan ia lan ren me kin wia jued on ia.

¹²²Jauaja japwilim omui ladu o kamaitala i; me aklapalap akan ender jued on ia.

¹²³Por en maj ai inon ion omui kamaur ia, o omui inau pun.

¹²⁴Wia on japwilim omui ladu duen omui kalanan, o kotin padaki on ia omui kujoned akan.

¹²⁵Nai japwilim omui ladu; kotin padaki on ia, pwe i en dedeki japwilim omui kadede kan.

¹²⁶Anjau leler, me Ieowa pan kotin wiawia; pwe irail kawela japwilim omui kapun.

¹²⁷I me i kin pok ki on japwilim omui kujoned akan, jan kold o kold linan.

¹²⁸I me i kin kajampwaleki japwilim omui kujoned akan karoj, i tata ki al en likam karoj.

¹²⁹Omui kadede kan meid kapuriamui, i me monion, i apapwali kin ir.

¹³⁰Ma omui majan pan janjalada, a pan kareda peren o lolekon on me opampap akan.

¹³¹Au ai kin jar pajan o inon ion japwilim omui kujoned akan; pwe i kin anane ir.

¹³²Kom kotin wukedoke don ia, o maki on ia, duen me kom kin wiai on ir, me pok on mar omui.

¹³³Kotin kainenela al ai nan japwilim omui majan, o der mueid on, me jued kot en wiawia ia.

¹³⁴Kotin dore ia la jan mor jued en aramaj akan, a i ap pan kolekol omui kujoned akan.

¹³⁵Kotin kamarainiki omui ladu jilan omui, o kotin padaki on ia duen omui kujoned akan.

¹³⁶Por en maj ai me dir en pil, pweki ar jota peiki on omui kapun.

¹³⁷Main Ieowa, komui me kotin pun, o omui kujoned akan me pun.

¹³⁸Komui me kotiki on kit er kadede pan omui pun o melel, pwe i en nantion kapwaiada.

¹³⁹I injenjued melel, koren ion mela, pweki ai imwintiti kan monokela omui majan akan.

¹⁴⁰Omui majan meid makelekel, o japwilim omui ladu kin pok on.

¹⁴¹Nai me tikitik o me mal amen, a i jota kin monokela omui kujoned akan.

¹⁴²Omui pun me pun joutuk eu, o omui kapun me melel.

¹⁴³Majak o apwal lel don ia; omui kujoned akan ai peren.

¹⁴⁴Pun en japwilim omui kadede kan me joutuk, padaki on ia, i ap pan memaur eta.

¹⁴⁵I nidinid jan nan monion i; Ieowa kom kotin mani ia! I pan apapwali omui kujoned akan.

¹⁴⁶I likwir won komui, kom kotin jauaja ia, a i ap pan kolekol omui kadede kan.

¹⁴⁷Nin joran i kodo o nidinid; i auiaui omui majan.

¹⁴⁸I kin pirida ni ailep en pon, pwen madamadaua duen omui majan.

¹⁴⁹Ereki nil ai duen ar kalanan; Main Ieowa, kamaur ia da duen omui kujoned akan.

¹⁵⁰Ai imwintiti jued akan koren ion ia, a re doo jan japwilim omui kapun;

¹⁵¹Main Ieowa, komui me koren ion ia, o omui kujoned akan karoj me melel.

¹⁵²I aja jan maj o, me komui kajonedier japwilim omui kadede kan, pwen potopot eta.

¹⁵³Kom kotin ireron ai luet, o kamaio ia da! Pwe i jota monokela omui kapun.

¹⁵⁴Kotin apapwali ia, o dore ia la, o kamaur ia da duen omui inau.

¹⁵⁵Me doo jan Kot akan kin doo jan maur, pwe re jota kin ijenoki omui kujoned akan.

¹⁵⁶Omui kalanan meid laud, Main Ieowa; kom kotin kamaur ia da duen omui kujoned akan.

¹⁵⁷Me pakipaki ia, o palian ia me toto; ari jo, i jota wuk wei jan omui kadede kan.

¹⁵⁸I kin kilekilan me mor jued akan, ap pokela, o i kin juedeki, pwe re jota kin peiki on omui kujoned o.

¹⁵⁹Kotin majando, me i kin pok on japwilim omui kujoned akan; Main Ieowa, kotin kakel ia da, duen omui kalanan.

¹⁶⁰Omui majan me dir en melel, o majan en omui kapun pan duedueta.

¹⁶¹Jaupeidi kan kin majamajan ia ni jokarepa; a monion i kin majak omui majan akan.

¹⁶²I kin peren kida omui inau dueta amen, me diaradar pai kajampwal eu.

¹⁶³I kailonki likam o juede kin irail, a i kin pok on japwilim omui kapun.

¹⁶⁴Pan ije pak i kin kapina komui ni ran ta ieu, pweki kujoned en omui kapun kan.