Proverbs 22:2-12

²Kari bo kumik mel suen biya ago agi, se kari bo mu kumik mel mena, kituwura agi, bare mel biya nunguning mu Yawe nuna wete nunga nungam.

³Kari sinar mu ikup ari se mu, numi tagi batagarso ale kia kaposo; bare kari sinar mena mu ngual kasik geraga nama ningi kaposo ale memek arigiso.

⁴Nanimi karogo kapara ko munan se, Yawe bowa ningi bagara ko munan mu mel ningo ningo, bagara aolak ningo, se nup biya nangarso.

⁵Kari memek ko tuang te mu mutim ilu beteman ale dagarok kira beteman se aniso; bare kari ko aolak ko sinar taso mu memek mu duap te me namoso.

⁶Kuriang gotek bo munan ningo nu te pempem lagarukko mu gotek la kasuru mu, tom nu garukaruk mu nu pempem la karo tui se lagarukko.

⁷Kari kumik mel mena, kituwura mu, kari kumik mel ago mu bowa ningi dungan bagoso; se kari bo, bo isarso se mel tuso mu, kari mel tuso umu bowa ningi dungan bagoso.

⁸Awiriya kiwem memek mu tam bo iwita aguso, mu ko nunguning mu memek tagi kumik te beteso; ale ko bu, kariimet saki te nunga bita maguwu lagaram, mu kilikilik maukko.

⁹Kari ko munan yawara mu, nup ningo se marak ningo kumik ko kaparukko, mu awuk, nu ko mel suen la mu kituwura alo nongorak numi tui no lagoso.

¹⁰Ikia ningo suwik sapara ko kari mu karo sapara mu te, ining singi se tagira gurungumura ko kiwem memek mu menarukko.

¹¹Awiriya munan diram la ko kueso ale ko munak mu welang yawara la, mu king ko tiran yawara ko bagarukko.

¹²Ikia ningo mu Yawe ko motam se ko bitua bowa ningi aniso; bare nu diram la me kaora ko den mu sokel menawuso.